[陳子鋒系列] 大學入學篇: （四十九）對決炎冰（2）

「炎冰，醒下呀，你父母已經無事啦，記唔記得早幾個月我同你一齊救返佢哋，佢哋已經醒返無事啦。」
 
我抱着一絲希望，希望能透過言語喚醒他，但顯然沒有任何作用。
 
「點解要咁對我，點解要咁對我父母。」
 
既然言語起不了作用，那就只能把他制服了，但要在不傷到炎冰的情況下制服他，可說是相當困難。
 
「無辦法啦。」
 




我不想浪費時間，馬上運起九字護身法，希望能喚醒炎冰。
 
但我太天真了，在我運起九字護身法的同時，炎冰那邊亦做了同樣的動作，把我用來喚醒他的術式給抵消了。
 
「頂呀，犯規喎。」
 
炎冰不但抵消了我的術式，而且更乘着我錯愕的瞬間，從身上拿出了數把金錢劍向我扔過來。
 
那速度之快，我只能勉強躲開其中兩把，而另外兩把則把我的手臂和小腿劃出了一道血痕，幸好傷口並不深，只有傷及表面而已。
 




然而這樣的一下分神，炎冰已從我的視線中消失了。
 
「走咗去邊？」
 
我向四周看了一遍，始終無法找到他的身影，但四周分明沒有甚麼可以遮擋身影的物品，他還可以跑到哪裡去？
 
「炎冰！出嚟啦！你父母無事㗎啦！」
 
不管我如何叫喊，始終得不到任何回應，這令我再次想起某次在天命叔指導下，跟炎冰對練的情況。
 




『細路，你又話自己好勁嘅，你連炎冰喺邊都搵唔到喎，點搞呀你？』
 
『唓，佢由細到大又練武又練道術，我又啱啱先起步，跟唔上有幾奇啫。』
 
就在我向天命叔辯解期間，炎冰的身影突然從我的視線死角出現，桃木劍向我的後腹砍下來。
 
在經歷了他數次神出鬼沒的攻擊後，我雖然未能破解他用了甚麼技巧，但我基本上已掌握了他出手的時機，每當我的注意力未能集中時，他總是會從死角出現，所以我本能地向前方翻滾躲開攻擊。
 
就在我打算重整旗鼓之際，炎冰又一次在進入我的視線死角後隱藏了他的身影。
 
『喂，撞鬼你咩，又唔見咗人。』
 
由於已經受到同一招攻擊無數次，但我仍然無法破解，我開始失去了耐性，任由靈力膨脹向四方散發開來。
 
『細路，咪叫咗你唔好亂用囉！』




 
我沒有理會天命叔的說話，將靈力向四方擴散，暴漲的靈力將天命叔推移了數步，而本來失去了身影的炎冰亦被我的靈力波及，現出了原形。
 
『仲搵唔到你......』
 
正當我準備反擊之際，卻因靈力耗盡而無法攻擊，被炎冰拿下了一場。
 
『講咗好多次叫你唔好亂用，係唔聽。被你搵到炎冰喺邊又有咩用？』
 
『我......我諗住......靈力會夠用......』
 
當耗盡靈力的我，連說話也感到困難。
 
『同人同鬼怪對決嘅時候，靈力嘅消耗會被平時更快，一時嘅錯判隨時會要咗你條命。』
 




『唔係咁可以點啫，我都唔知佢點樣消失，你睇，依家佢又唔見咗人啦。』
 
『唉，我都話你蠢㗎啦，雖然人同靈體唔同，一個有實體一個無實體。你能夠見到人因為有光嘅反射，而靈體你只係以為自己能夠見到，但嚴格嚟講你係感應到佢哋嘅存在，再喺你腦入面形成影像，兩者係好唔同。既然人有實體，就唔可能無緣無故咁消失。』
 
『吓？啫係點呀？簡單啲得唔得。』
 
『唉，炎冰，出嚟啦。』
 
天命叔嘆了一聲後，便吩咐炎冰現身，然後我便看到炎冰突然在我面前出現。
 
『喂，你頭先講一大輪嘢又話咩光咩反射，佢喺我面前都睇唔到喎，點計先？』
 
『天命師叔無講錯，而其實你都經歷咗好多次呢種情況，講穿咗就係所謂嘅結界。』
 
『吓？唔好講笑啦，結界又要計咩方位，又要有道具，邊有可能咁易用到？』




 
『你講嘅雖然無錯，但其實結界有好多種，你講嘅要計好多嘢同用好多道具，通常係大型結界，要整個不存在嘅空間去迷惑對方以達到某啲目的。只係，如果我嘅目的好簡單，而且範圍好細，咁只需要簡單地提供靈力，就可以做到。你就想像成喺我面前，有一塊高我少少闊我少少嘅鏡，只要呢塊鏡一直喺度，你就唔會見到我嘅身影。當然，係應用呢種結界嘅同時，你都要將自己嘅存在感降低，先可以避免被對方發現。』
 
炎冰說明完畢後，他的存在感突然變得薄弱起來，那是一種很奇妙的感覺，分明他人在我面前，我能清楚看到他，但只要我不集中精神注視着他，他就像是融入了背景之中，難以察覺他的存在。
 
『所以你就係咁樣消失喺我眼前！』
 
我總算弄懂他的把戲了。