[陳子鋒系列] 大學入學篇: （六十二）貝爾菲格 - 談判（１）

「你到底想點？」
 
面對復活後的貝爾菲格，即使是狀態全滿的我，也不見得能撐上多久，更不用說我現在這副模樣，他要殺掉我，大概不需一秒便能做到。
 
「我想點？我咪講咗，我想同你談心囉。不過呢度嘅環境唔係咁好，你等我一陣。」
 
貝爾菲格看了四周一眼，然後伸出了雙手，喊出了一句：「復原吧」。
 
四周本已被弄得亂七八糟的地方，瞬間恢復了原狀，被破壞的植物也恢復了生機。
 




而那百多名營友，則被他集中到營火般邊，除了已經失去生命跡象的Raymond，依家躺在原地。
 
「哈，依家清爽好多啦。嚟，坐啦。」
 
貝爾菲格打了一下響指後，兩張椅子憑空出現，反正我也無力反抗，就順他的意好了。
 
「我睇下先，我哋大概有十分鐘左右嘅時間可以談下心。」
 
貝爾菲格一臉輕鬆地裝作看了看手錶，然後用似笑非笑的樣子看着我。
 




「唔該你，可唔可以唔好用炎冰個樣嚟咁樣笑，好嘔心。」
 
在我說完後，我感到小腿一陣劇痛，那撕心裂肺的痛楚差點令我失去知覺。
 
然後我便發現，我的右腿被整齊地切割開來，雖不至於斷掉，但也已經是見骨的程度。
 
「係咪好痛呢？我勸你唔好講啲我唔想聽嘅說話，因為我隨時都可以殺死你。而你亦都唔駛旨意會有啲咩人嚟救你，佢哋要過到嚟呢邊，至少需要十分鐘嘅時間。」
 
我忍受着疼痛帶來的不適，思考着他的話，聽他的意思，要等到拉斐爾他們過來，至少要耗上十分鐘的時間。
 




而他選擇了跟我談話的機會，就代表他暫時不會殺我。但他亦表明了只要他不高興，他可以隨時隨地按他意思來折磨我。
 
「你到底想點？唔好講咩談心唔談心啦，直接啲唔好嘥大家時間。」
 
「哎呀哎呀，陳子鋒你點可以咁樣對我㗎，我話晒都叫救咗你朋友呀。如果唔係猶大佢用帶有我力量嘅刀去拮傷你朋友，我就唔可能咁輕易借用佢嘅身體。但掉返轉頭嚟睇，如果嗰把只係一把普通嘅刀仔，你朋友可能已經因為失血過多而死啦。」
 
「哈，咁我真係多謝晒你喎。」
 
說完後，這次輪到我的左腳傳來一陣劇痛。
 
媽的，這傢伙這樣折磨我，倒不如乾脆點了結我比較輕鬆。
 
「陳子鋒，點解你係都要反抗呢，明明輕鬆就範就無事。」
 
「你要殺就殺，唔好係我面前咁多廢話。」




 
「你要咁硬頸呀嘛，好！」
 
貝爾菲格露出了嫌惡的表情，我感到雙耳，雙臂，身體各處都傳來劇痛。
 
正常來說，遭受這種劇痛的我，應該已經昏死過去才對，但我意識到，這是貝爾菲格刻意使我繼續保持清醒，好讓我能繼續感受他對我的折磨。
 
「或者咁樣你會聽話少少。」
 
「就係咁？」
 
我雖然已經痛得全身冒汗，但我早已經歷過不少次受傷的情況，而比起肉體受創，心靈的創傷對我來說才更是致命。
 
「你要口硬呀嘛，好！」
 




貝爾菲格沒料到我會如此倔強，一聲響指過後，我身上的傷勢完全復原，但在復原的同時，我的肉體又再經歷一次那種創傷。
 
就這樣不知道重複了多少遍，我好像已對這樣的刺激變得麻目。
 
「你真係唔怕死？」
 
「少廢話，都係嗰句，要殺就殺！」
 
「你喺人類之中都算係倔強，唔通你就無想要嘅嘢？」
 
「點呀，硬嘅唔得就用軟？我唔受呢一套。」
 
「陳子鋒，我已經明白晒你嘅性格，亦都清楚你重視嘅係乜嘢，我哋嚟做個交易啦。」
 
又是魔鬼的耳語，別以為我會上當。