明目•偷情 後話: 第一次接觸 (3)

第一次接觸 (3)
~~~~~~~~~




緊張到個心就快跳出嚟果時，姑姐終於開口講嘢…

「子華，你嚟咗嗱。」



「係…係呀…」

「唏，人老咗睇嘢唔清。」姑姐响個手袋抄咗副眼鏡出嚟，副眼鏡鏡片勁厚…

咁即係佢好深近視，頭先睇唔見我哋癡纏？？

掂哂，鬆開佢隻手再行開就無証無據！！

我想甩開Molly隻手，佢發覺到就扣到實。鬆唔開就想企起身借力，Molly就用另一隻手㩒低我。我哋開始糾纏，旁人無辦法睇我哋唔到。



「你哋搞咩呀？？」唔知道係邊個親戚問，因為我成個慌哂無留意。我就慌，Molly就好淡定：「佢想走呀，快啲捉住佢！！」

我想走？？

「子華想走咁大膽？？」舅父幫手㩒低我，然後講：「呀婆生日你點解要走？？」

「我…我…」形勢轉變得太快，明明同Molly纏綿緊俾姑姐搗破，然後發展到我要著草…

個腦實哂，Hang哂機喇！！



俾舅父逮捕時，呀媽都過咗嚟。

「子華你做咩呀？」呀媽講完都見到我哋拖手，Molly就講：「子華想走，我咪同舅父一齊捉住佢囉。」

「係呀，我同夢妮捉住佢。」

「哎呀，冤枉呀！！」聽Molly解釋到拖手事件，我都唔再Lag機：「我唔係走，只係想去廁所咋。」

「係咩？」Molly對我發出奸笑。

「係呀，就瀨喇。」

「咁你快啲去喇，就快開席喇。」呀媽講。

「好，好。」舅父鬆開手，但係Molly仍然拖住我！！



我望住Molly，唔知佢到底想點？

「你好可疑，無喇喇急？想借尿遁呀！」Molly講：「除非你發誓，如果唔係我唔放手！」

「發誓？去廁所都要發誓？？」

我講完之後Molly哼一聲鬆開手，跟住行去另一邊…

佢發脾氣？

我語氣唔係好惡啫？？

我激嬲佢？？



我一路痾一路諗，當然無答案。
 
去完廁所出返嚟，見到大部份親戚圍埋張圓枱，迫到實哂舅父就同個經理講緊嘢。
 
「坐到咁鬼逼，加多張枱嚟喇。」
 
「張生，無哂枱喇。你哋訂枱果時我都講過唔夠坐，而家俾圓櫈你哋前後坐喇。」
 
「坐圓櫈都逼唔落，我哋19人個圓櫈都係放得18張，唔掂喎！！」
 
「咁吖…」經理講：「陣間我播住音樂，你哋就排隊圍住張枱行。音樂一停就鬥快坐低，最慢果個無得食，你覺得如何？」
 
「咁樣…」舅父講：「都係一個好方法嘅，各位讚唔讚成？」
 
「讚成！！」婆婆叫得最大聲，爭櫈仔遊戲正式展開！！


 
音樂聲奏出，成間酒樓個個靜哂，連唔關事嘅都在旁觀戰。在場選手一路行，一路厲起雙眼，對座位虎視擔擔。
 
Molly呢？？
 
佢就慢條絲理、悠悠閑閑咁慢步，佢係嬲緊我所以無諗住食？？
 
既然係咁我幫佢霸位，同佢賠罪咯。
 
不過我做錯乜，佢又嬲乜呢？？
 
這個呀嫂真難明！！
 
諗緊Molly時音樂停頓，衆選手即刻爭相奪位。薑係老嘅辣，所以婆婆首先奪位。雖然如此，但其他選手無氣餒都奮勇奪得席位。我眼前有兩個空位，就等我攞哂佢同Molly齊齊坐！！
 


首先hold到一張，想再hold另一張果時發現姑姐坐咗…
 
我…
 
我想同Molly一齊坐，點解妳要咁做？？
 
頭先已經壞我好事，而家又嚟一次…
 
我望住佢，眼神流露出莫明無奈；姑姐都望住我，無幾耐就發出獰笑！！
 
「嘩哈哈，你想同我爭位？」姑姐猙獰面孔奸笑：「哈哈！！少年，你太年輕了！！」
 
「哈哈哈…」姑姐仰天長笑，果副嘴臉擺明撩交打！！
 
個個坐低哂，淨返Molly無位坐，咁我就讓佢坐喇。
 
「呀嫂，我…」我未講完就有人截糊。
 
「夢妮，我俾妳坐。」舅父作出搶答。你都有舅母喇，讓座哩家嘢俾我做喇好心！！
 
舅父話讓座，Molly睇一睇之後講：「唔駛喇。」
 
「唔駛？妳想企响度食？？」
 
「又唔駛企嘅。」Molly攝埋我面前，背對住我坐落我大脾！！
 
响衆目睽睽下坐我大脾？？
 
玩到咁大？？
 



(待續)