個晚訓着之後，我穿越左去第二個世界。: 第六章 (下)

「已經係好多年前嘅事，耐到我都唔太記得董明嘅臉孔。」爸爸放低咖啡杯，無奈地嘆氣。

由於剛才聽到爸爸話見過陸董明實在過於驚嚇，我忍唔住簡單收拾一下裝束就約左爸爸岀黎見面。

「係媽媽岀事之前發生嘅事？」

「講起都好巧合，我一見完董明就收到子予岀左事嘅電話。」爸爸此刻嘅眼神彷佛正翻到去個個我唔清楚嘅過去。

「你係點樣認識陸董明？係媽媽介紹你地兩個認識嘅？」我緊張地挪一挪身軀。





「董明係你媽媽嘅中學同學。我好耐以前已經成日聽佢提起。」

中學同學？估唔到媽媽會咁樣介紹陸董明。不過易地而處，都係正常嘅。即使係而家嘅我，都冇勇氣去同爸爸解釋我嘅遭遇。

「咁你地第一次見面，爸爸你⋯⋯係清醒嘅？」除左入夢，我實在諗唔到其他相見嘅方法。但點解媽媽要冒險帶爸爸入夢？

「我當然係清醒，我同董明仲好投契。我地就係街口個間西餐廳第一次見，子予仲笑稱我地係相見恨晚。」爸爸似乎憶起當時快樂嘅回憶而會心一笑。

當時三人嘅感情一定相當好，只可惜呢個畫面已經不復存在。





「等等先，你話係街口個間西餐廳？」我驚呆地望住爸爸。

「而家雖然係寵物店，但以前的確係西餐廳。」

唔係，重點唔係街口嘅店鋪究竟係西餐廳定寵物店。重點係點解陸董明會黎左呢個世界？咁佢嘅車禍又係黎呢度之前定黎呢度之後嘅事？

「咁佢而家係邊？」我焦急地拉起爸爸嘅手，打算立即起程尋找陸董明。

「我已經好耐冇見過董明，子予嘅意外後我地兩個都冇再聯絡彼此。」爸爸坐係梳化凳上沉思。





「咁佢嘅聯絡方法呢？」我重新坐到卡位上。