個晚訓着之後，我穿越左去第二個世界。: 第七章 (下)

我已經有一段時間冇夢見嘉伍。

可能係日有所思，夜冇所夢。一直都搞唔清楚自己身上發生緊咩事，所以緊張到入唔到夢。

「老細，有冇啲咩飲品係飲咗夜晚會訓得好啲㗎？」我放低揹住嘅tote bag，走向企係收銀櫃後面嘅咖啡店老闆。

「我哋呢間係cafe嚟，最賣得嘅係咖啡，咖啡啱唔啱？」老闆向我微微一笑。

金仁恩，係大學附近一間名為「靈之小島」咖啡店嘅老闆。為人親切又風趣，深得唔少學姐學妹嘅喜愛。





「咖啡就唔洗啦，我已經訓得唔好。俾杯凍香蕉朱古力我啦，唔該。」我隨手攞起收銀機隔離嘅紙巾，小心翼翼地抹額頭上嘅汗珠。

「程生，如果下次落堂遲咗都唔洗趕過嚟。我呢度又唔係靜係得你一個part time，應間你啲汗滴落我杯咖啡度呀。」仁恩開玩笑地向我遞來一杯latte。

「得啦得啦，你入去換衫先啦，呢度我搞掂就得。」企係我身邊嘅知遙接過latte，向客人嘅方向走去。

「記得抹完啲汗補補粉呀，俾你抹曬啦。」知遙不忙調侃我。

仁恩、知遙同我係識咗兩年嘅好朋友。由公開試之後嘅暑假開始，我一直都係「靈之小島」打工賺生活費。





「最近係唔係發生咗啲咩事？見你好似冇咩精神咁。而家趁break time，我哋可以坐低傾下。」仁恩向我遞來一杯凍香蕉朱古力。

「係訓得比較冇咁好。」畢竟穿越呢件事實在太震撼，講岀嚟都好難令人信服，都係講不得。

「我聽柔風講，你同蔣叔叔都和好如初，咁仲有其他問題煩擾你？」知遙清理好最後一台客人食剩嘅意粉，向我哋走來。

「唔關爸爸事，係我自己有啲事未搞清楚。有啲嘢，講岀嚟都唔會有人信。連我自己都唔知咩事，我點樣可以講俾你哋聽？」

「講啦！」仁恩同知遙異口同聲地望向我。





「我懷疑......我發夢個陣可以穿越去另一個世界。」

「......」

「......」

「喂？」我揚一揚手。

「呼......哈哈哈哈哈哈！」知遙忘我地仰頭大笑。

「程生，你唔想講都唔洗咁樣敷衍我哋㗎嘛。」仁恩一臉無奈。

「我都話咗唔講㗎！係你哋要我講！」我露岀委屈嘅眼神。

「夢𥚃面，我認識咗一個叫陸嘉伍嘅男仔。佢嘅媽媽同我講，我媽媽害死咗佢爸爸。我一直都唔知佢講緊乜嘢，直至我向爸爸求證，原來真係有陸董明呢個人。」





「咁可能係你以前聽過呢個人個名，所以夢境先會投射咗呢個人岀嚟。」知遙攞起我嘅香蕉朱古力，使勁地吸咗一口。

「你點知佢係另一個世界嘅人，而唔係呢個世界真實存在嘅人？」仁恩迷惘地望住我。

「因為......我係夢裡面見到媽媽。佢好緊張咁捉住我，叫我唔好再留係呢度。佢話個度係三界之外，唔係我應該要去嘅地方。」我低下頭。

「......」

「......」

「我相信你。」仁恩嘅聲音打破咗咖啡店裡面嘅沉寂。

「嗯？」





「我認識嘅程生，係唔會攞媽媽嚟開玩笑。所以無論你講嘅嘢聽落去有幾荒唐，我都會相信。」仁恩堅定地望住我。

「你相信，我過世嘅媽媽仲存在？」老實講，我對仁恩有咁嘅反應都幾意外。連我都花咗一段時間先可以說服自己嘅事，仁恩竟然咁快就相信咗。

「我相信。呢間咖啡店會叫做『靈之小島』，係因為我相信靈魂嘅力量。人死唔等於燈滅，有啲人在世時未完成自己嘅使命，死後都會用靈魂嘅形態去延續未完成嘅事。呢啲靈魂，係世人嘅口中稱之為『鬼』。但係我眼中，佢哋同有血有肉嘅人係冇分別。」

我同知遙驚訝地望向仁恩。三十岀頭嘅仁恩，平時嘅相處都感覺唔到年齡差距嘅成熟。但呢一刻嘅佢眼神堅定，值得令人信賴。

「仁恩，照你咁講，你呢間小店而家係唔係有好多『靈魂朋友』係度？」知遙不安地拉一拉我衫袖。

「我冇陰陽眼，所以就算想睇都見唔到。」仁恩一本正經地望向周圍。

「得啦得啦，唔好再講啦，講到我心都寒埋。」知遙攞走香蕉朱古力嘅膠杯，向廚房逃去。

望住知遙逃走嘅背影，我有一刻覺得特別安心。其實我最想得到嘅，不過係平平凡凡簡簡單單嘅生活。唔需要任何異於常人嘅能力，唔需要有刻骨銘心嘅經歷，就咁樣同朋友打打鬧鬧已經足夠。





「程生，如果再有諗唔通嘅事，一定要話我知。」仁恩輕輕地拍一拍我膊頭。

「一定要相信，人心比起世界上所有能量都要強大。」