自從女神做咗我讀者之後: 認識

「你呃我！」佢一路喊，一路好激動咁講。
「我唔想架，你聽我解釋阿。」我伸隻手埋去想留住佢
「放手阿，你咁樣同佢有咩分別阿！我好討厭你阿！可能我哋關係由一開始，已經建基於謊言上面，我唔知你幾時講真，幾時講假，幾時有呃我，幾時係對我講真話阿，我覺得我哋需要分開冷靜下！」講完佢就係個商場跑走咗。
「我真係真係唔係諗住咁阿，我唔想呃你架...」我係原地好細聲喊住咁講,而我亦都唔好意思跑上去追...
究竟發生咩事？咁要由上年開始講起...
---------
我叫黃浩軒，一個普普通通嘅中三學生，點普通法？身高中等，體重中等，成績中等，運動中等。可以話係一個完全唔出眾，每個人中學生涯都會有嘅人，好似7仔咁，總有一個係左近。
但係我除咗學生呢個身份之外，我仲係一個作家。我係2020年6月尾開始，我每日都會用「菠蘿先生」呢個筆名係紙言呢個網上平台發佈我寫嘅句子/文章。
點解主要係寫句子？因為句子容易寫，其次係我覺得句子可以令人思考更多，每個人睇同一句都可以有唔同嘅感受，就好似廣東歌嘅歌詞咁，每段時間睇都可以有唔同嘅感受。
雖然唔多人睇，但係當初我擺句子上去都係為咗分享，搵一個同我想發一樣，明白我嘅人。簡單啲嚟講，即係一個知音。


而身為一個作者，就緊係有一個社交平台架啦，咁樣除咗可以同讀者多啲交流之外，仲可以多一個渠道令多啲人識我。
但係好死唔死，有一日，一個熟悉又陌生嘅id dm咗我嘅IG。
佢就係我嘅女神-黃可柔，佢同我唔一樣，佢係學校係個好受歡迎嘅人。點解？因為佢靚女，性格又好，朋友多就當然架啦，年中因為追求佢失敗而從此不相信愛情嘅人絕對唔係一個小數目，無論係師兄，師弟，甚至老師，都有鍾意佢嘅人。
女神皮膚好似雪咁白，同時都留得一頭柔順嘅長髮，嬌小玲瓏嘅身形，腹部同腳都無贅肉，面部除咗無任何一粒暗瘡仲有少少baby fat嚟突顯佢嘅可愛，眉毛深色又濃密，雙眼圓同有神，鼻細細，個嘴紅得嚟大小適中。
女神雖然入唔到精英班，但係明眼人都知佢係一個努力讀書，運動又叻嘅人。性格鍾意幫人，就算幫唔到都諗辦法幫佢。
就係一個咁完美，可以證明到上帝係唔公平嘅人，佢同我同班咗3年，但係3年都因為我怕醜同自卑所以熟絡唔到。所以女神ig個id先對嚟講又熟悉有陌生
但係佢就係係ig度dm咗我！雖然係係我作家個ac度...
「我覺得你啲句子寫得好好阿，點解你會有咁多靈感嘅？同埋你要加油阿，菠蘿先生！」
我一邊係我間房到讀一邊呆呆地，過多幾秒我先反應到，禁入去嗰度確認個個係女神。
（媽！我得咗！我女神主動dm我阿！佢仲覺得你個仔我啲嘢寫得好阿！佢仲叫我加油阿！）我係心入面大大聲咁講咗呢句出嚟，我一邊扼實拳頭，一邊感動到想喊，其他人唔知可能以為我發神經添。


（唔得架黃浩軒，你要冷靜，女神搵你揸麻，佢一日都唔知同人傾幾多百條wts啦，要冷靜覆返佢先可以同佢繼續傾，冷靜冷靜冷靜。）我拍住自己塊面心入面同自己咁講
「無阿，聽多啲廣東歌囉，聽多啲就可以好似我咁作到架啦👍」
呢句嘢，我用咗成15分鐘打，因為我頭先歡呼已經用咗7，8分鐘，加埋我不停將個message刪刪改改，諗用唔用emoji，用邊個emoji，咁就搞咗成十幾分鐘..
過咗5分鐘都未見佢復我，我就開始心急..
（行開咗姐，黃浩軒你已讀人哋十幾分鐘先復，唔通人哋係個螢幕等你等15分鐘咩...）
叮~我一聽到呢個訊息通知聲，我就即刻望返去手機到。
「又會用廣東歌嚟做靈感咁得意嘅🤭你好鍾意廣東歌架？」（唔通女神都對廣東歌有興趣？等我繼續同佢講呢個話題先。）
「都幾架，因為我覺得廣東歌有佢獨特嘅魅力，特別係啲詞。係呢，你又鍾唔鍾意廣東歌架？」
「有文化嘅男仔係唔同啲嘅🤭係阿，我間唔中聽下咁囉」（女神讚我阿🙈嘩！我真係一個受天父眷顧嘅男人😭死而無憾啦😭）
「有無話聽開邊位歌手/邊位填詞人嘅作品？」


「咩都聽啲囉😗菠蘿先生有冇好推介？🙈」
（睇嚟要攞啲經過我千挑萬選嘅歌推介俾佢至得,等我諗下先🤔）
「春秋，殘酷遊戲，金剛圈......」
「菠蘿先生你聽啲歌都幾sad個喎🤔睇嚟你都係個有故事嘅人😏啲句子你經歷嚟架？」（經咩歷阿，我咪仲係a0仔一個😔啲句子咪都係我ff同無病呻吟...）
「emm...你當係啦...」
我哋就係咁講咗差唔多1個鐘，內容主要都係圍繞廣東歌。個晚我哋傾到成差唔多11點。
「你真係一個好有趣嘅人😂我差唔多要訓啦，菠蘿先生，聽日有機會再傾啦，晚安😊」（嘩！！！女神同我講晚安阿！！！我前世係咪救咗地球所以先發生呢啲事🙈）
個一晚，我完全訓唔到，就係不停睇返啲對話記錄。雖然同女神同班咗三年，但係我哋嘅關係仲停留緊加佢做連絡人，wts個啲從來都無傾過，更加唔好講傾咗咁耐嘅傾偈。平時返學都淨係敢係一邊靜靜咁望住佢，關注佢。今日咁樣簡直令我哋嘅關係進步神速。希望之後可以同佢關係更加好啦..