《十七歲嗰年，我做咗Miss隻兵》: 第一章（4）
第二天Miss Lam剛回到學校，位置還未坐暖，已聽到在教員室門外叫自己的名字。
「好受學生歡迎喎，咁早就搵你。」坐在Miss Lam旁邊的Leung Sir笑着說。
「我想食早餐多啲。」Miss Lam無旁地搖搖頭說。
走到教室員門外，來找她的，是班上的一位女生。
上學不到一天，Miss Lam還未認得班上的所有同學，一時之間忘了對方的名字，Miss Lam只好硬着頭皮說：「咁早黎搵我嘅，係咪有咩事呀？」
「Miss，我唔記得做IES，可唔可以比多一日限期我？」
「但我琴日已經比咗一日寛限期你地啦喎。」
「但我琴日屋企有啲事，可唔可以下星期先交比你？」
Miss Lam考慮了一會，面有難色地說：「但係⋯⋯」
「今日都有一定有好多人無交架，我突登一早返黎話你知已經好乖架啦，唔該你啦Miss，我真係有啲好重要嘅事要做。」
「你有咩事？我可以考慮酌情處理。」
「我⋯⋯」女生想了想，說：「我媽最近整親隻腳，我要幫手煮飯洗衫，好忙呀Miss，你再咁逼我我就快死架啦。」
聽到死這個字，身為新手的Miss Lam馬上投降，說：「小小事姐，唔洗死嘅，一係我比多少少時間你，星期五交比我，OK？」
「星期五？下星期一唔得咩？」
「老師都要時間改架，星期五啦好無？你真係有困難先再搵我。」
「唉，好啦。」女生不悅地說，臉上沒有一絲感激便轉身走了。
係咪我逼得佢地太緊，應該比多幾日時間佢地呢？Miss Lam正這樣想的時候，科主任剛巧經過走廊，對她說：「Miss Lam呀，你嗰班啲IES交成點呀？」
科主任是位雖年過四十，但仍身材姣好、皮膚細嫩的中年女人。
「er……仲有半班未交，我叫咗佢地今日要交到比我。」Miss Lam略帶緊張地說。
「半班咁多呀？佢地都係蝦你，咁啦，我問過其他老師，佢地班都有幾個無交，你今日放學得唔得閒？我地一齊捉佢地落黎，要留係到做埋先走得。」
要捉佢地落黎咁誇張？Miss Lam心想。
其實Miss Lam今天下班後約了人，但科主任開口說到，她也不敢拒絕，說：「好呀，去邊到留堂？」
「我一陣Book房，Book完話你知呀，辛苦你啦。」科主任微笑道。
「唔會。」Miss Lam也微笑回應道。
唉，唔知要留到幾點呢？Miss Lam心想，擔心晚上的約會會被迫取消。
回到教員室，發現桌上竟多了一盒士多啤梨百力支。
當Miss Lam正以奇怪的眼光看盯着桌上的百力支時，旁邊的Leung Sir開口道：「盒百力支我比你架，今晚留堂留夜咗，肚餓嘅時候可以食呀嘛。」
「你又知我要留堂嘅？」Miss Lam驚奇地問道。
「啱啱行出走廊時咁啱聽到姐，同埋我見上次特價買多咗，一個人食晒太肥啦，咪分啲比你，感覺無咁肥呀嘛。」
「你邊到肥呀，咁多肌肉。」
「依啲零食對我啲肌肉無益呀嘛，你咁後生，唔洗驚啦。」
「你唔係同我差唔多年紀咋咩？」
「你真係識講野，我教咗幾年書架啦，今年轉咗黎依間咋嘛。」
「竟然，你個樣睇落好後生。」Miss Lam驚嘆道。
「想後生啲嘅，跟我做多啲運動囉。」
「鈴！」這時上課的鐘聲響起，打斷了二人的對話。
「好喎，等我得閒再請教你，我上堂啦，多謝你盒百力支。」Miss Lam連忙拿起把早一天已執拾好的教材離開教員室。
「如果我地繼續無節制咁使用，係未來幾十年，我地嘅化石燃料好可能會耗盡，係咁嘅情況下，我地有咩辦法解決辦法呢？」Miss Lam站在電腦前問道。
也許因為是早上第一節課，有半班人的靈魂都不在，剩下的不是在發夢就是在聊天，除了坐在較前排的幾位，根本沒有人在聽書。
「發展可再生能源囉。」眼前沒有人答Miss Lam問題，坐在電腦桌前的一位男生回答道。
「子傑講得無錯啦，點解要發展可再生能源，佢比起化石燃料有咩好處？」
「可以⋯⋯」子傑再次嘗試回答，Miss Lam卻打斷了他的話，說：「我地請偉文答下問題。」
然而，肥仔文還在睡覺，完全沒聽到Miss Lam的話。
「偉文，起身啦。」Miss Lam走到他身旁，輕輕敲了敲他的桌子說。
「咩事？」祖耀睡眼惺忪地問道。
「可再生能源比起化石燃料有咩好處？」Miss又把問題重複了一遍。
然而，肥仔文本來的腦袋就不靈光，加上睡意未消，只好照字面意思說：「err……可以再生掛。」
「算啦Miss，肥仔文唔會答到你問題架啦，你都係比返學霸答啦。」坐在前排的阿祖說道，難得地今天竟沒有睡覺。
他口中所說的學霸是子傑，是班上僅餘幾個還會依時交功課，上課不會睡覺的乖學生。
「咁你答我，有咩好處？」Miss Lam走到阿祖身邊問道。
「我答到你我就唔坐依到，坐你個位啦吓嘛？」阿祖理所當然地說。
「你本書就有答案啦喎，你試下搵下呀。」
「咁你問本書囉，書呀書，可再生能源有咩好處？」阿祖看着通識書問道，過了幾秒，續說：「你睇下，佢都答唔到你，我又點答到你？」
「鈴！」就在這時候，下課的鐘聲響起。
「算，你地今日返去預習咗第14-18頁佢，聽日我再問你地可再生能源有咩優點同缺點。呀，仲有，今日仲有七個人未交IES，今日放學唔好走住，留係到做埋先走得。」
聽到這句話，還未做完的那幾個馬上議論紛紛起來，唯獨阿祖冷靜地一句話也沒有說。
「Miss你講笑咋吓嘛？仲有咁多未做，點做得晒？」還未交IES的Yuki問道。
「唔緊要，留係到我教你做。」Miss Lam微笑道。
「你教我都唔會識做喎。」說到底，Yuki不過不想留堂。
「識嘅，唔好睇少自己。好啦，起立，各位同學再見。」
「再見Miss Lam。」說完這句，整班人像甦醒的喪屍，全都龍精虎猛起來，奔到小食部買早餐。
你班死仔，啱啱答問題又唔見咁精神，Miss Lam心想。
上了一天的課，好不容易來到下課時間，當Miss Lam剛上完中三的課回到教員室，椅子還未坐暖，科主任便來到Miss Lam座位前。
--------------------
其實個故係連登已經更到第四章，係我成日懶得滯無係到更，不過我會係依幾日陸續更返，心急嘅都可以去連登睇住先，多謝大家睇我嘅故仔:)