《十七歲嗰年，我做咗Miss隻兵》: 第四章（4）

         「制服誘惑？」Miss Lam重複了一遍阿祖的話，才參透他的意思，生氣地說：「咩制服誘惑，好心你睇少啲依啲野啦，睇壞腦呀。你唔係上堂架咩，做咩係到出現？」

         「蓮姐叫班長幫佢去校務處拎粉筆，陳珊珊點會肯聽佢點呀，我唯有委屈啲落去幫佢拎囉。反而係你，做咩堂又唔上，係到玩校服？」

         聽到陳珊珊這名字，剛才冰寒刺骨的感覺再次捲土重來，Miss Lam禁不住打了個冷顫。

         「唔好再提啦，我趕住返屋企換衫。」

         「唔洗換啦，你着校服幾好睇呀。」



         「邊到好睇？緊到我就抖唔到氣。」

         「就係因為緊先好睇呀嘛。」聽到阿祖這句話，一種不舒服的感覺在Miss Lam心底油然而生。

         「Miss Lam，你OK未呀？咦，祖耀，點解你會係到嘅？」這時Leung Sir從阿祖的身後出現。

         拎粉筆囉，無眼睇架你？阿祖心想，直接在他面前反了個白眼，沒想過要回應他。

         「我OK啦。」Miss Lam微笑道。



         「OK就行啦，我都請咗半日假，我車你返去換衫會快啲。」Leung Sir說道。

         「吓，唔洗啦。」Miss Lam驚訝地回應道，沒想過他竟為自己請了寶貴的半天假。

         大家都是新老師，這樣貿貿然請假，對下年度續約必定有所影響，想到這裏，Miss Lam實在不想影響他的前途，又說道：「我自己返去得架啦。」

         「我咁啱都有急事要處理先請咗半日假咋，你唔洗覺得有壓力喎。」

         人地咪話咗唔洗你車囉，阿祖心想，繼續拿着粉筆站在原地聽二人的對話。



         「咁⋯⋯咁好啦，麻煩晒你。」

         「你搞掂就快啲落黎啦，我揸架車出黎先。」

         說罷，Leung Sir轉過身便沿着樓梯離去，身影瞬間消失在二人眼前。

         當Miss Lam準備跟隨他的腳步離開時，阿祖卻拋出了一句話，問道：「你同梁逸一好熟架？」

         「做咩響老師全朵咁無禮貌？」Miss Lam說道，腳步再次停了下來。

         「你同佢好熟架？」阿祖又把話重複了一遍。

         「OK啦，得閒會送下野食比我咁⋯⋯」剛說出口，Miss Lam才想起這些事與阿祖根本毫無關係，又說道：「咪住先，我地熟唔熟又同你有咩關係？你唔係攞粉筆上去架咩？」

         無啦啦做咩要送野食比你？肯定有古怪！阿祖心想。



         「你自己返去唔得，係要坐人地架車嘅？」阿祖沒有理會Miss Lam的說話，繼續追問道。

         「佢順路車埋我有咩問題？」Miss Lam一臉疑惑地問道。

         「我依家假假地都係你男朋友，我話有問題就有問題。」

         Miss Lam連忙伸手掩住阿祖的嘴巴，慌張地四處張望了一遍，又把頭探到樓梯的迴旋處，上上下下地細察了一番，說：「咩男朋友？同你講咗唔可以係學校提架嘛！」

         阿祖撥開Miss Lam的手，哄近她的臉，咧着嘴說：「放心喎，依個時間個個都上緊堂，無人會經過，都無人會聽到我地嘅對話。」

         「我廢事同你講落去，我去坐順風車。」Miss Lam正準備走的時候，阿祖竟抓住了她的手。

         「可唔可以唔好坐佢架車？」



         看着被阿祖握緊的手腕，Miss Lam深怕被人看到，連忙甩開，問道：「點解？」

         身為男人，阿祖怎會不知道男人在想甚麼，若不是有目的，才不可能這樣無事獻殷勤。

         想到這點，阿祖就不想讓Miss Lam坐上Leung Sir的車。

         「無點解，我話唔得就唔得，除非⋯⋯除非你想比人知道你私補⋯⋯」聽到阿祖又拿出自己的要害來要脅自己，Miss Lam又一次走上前掩住了他的嘴巴。

         「都叫你唔好係學校講囉！」Miss Lam緊張得皺起眉頭。

         「#$%^&*」無法聽清阿祖說的話，Miss Lam只好放下手，問道：「你講咩話？」

         「我都唔想架，係你逼我架咋。」阿祖說道。

         「唔坐咪唔坐囉，車。」Miss Lam黑着臉說。



         「記得為人師表，講野要算數呀，Miss。」

         「楊耀祖，你唔好比我捉到你痛腳，唔係嘅話，你實死緊！」Miss Lam微笑地說，卻比不笑還恐怖。

         「好呀，我等你呀，」阿祖貼近Miss Lam耳畔，輕聲地說道：「我嘅女．朋．友。」

         這句話比剛才那盤冷水還要恐怖，Miss Lam整個人都打了個顫，連忙沿着樓梯往下暴走。

         啊！點解問題天天都咁多！？Miss Lam心想，內心盡是哀怨。
 

         「你落黎啦，上車呀。」坐在駕駛座的Leung Sir對剛從校門走出來的Miss Lam說。

         「唔洗啦，Leung Sir，我⋯⋯自己返屋企得啦。」Miss Lam彎下腰，把身子探向車窗對Leung Sir說。



         「上車啦，唔洗唔好意思喎。」

         好啦咁，Miss Lam很想這樣說，可是阿祖的說話又再次在腦海徘徊：除非⋯⋯除非你想比人知道你私補⋯⋯

         「唔係咁好嘅，我行前少少就有巴士站架啦，我行先啦。」Miss Lam還是拒絕了Leung Sir的好意，站直了身子往前走。

         然而，Leung Sir卻沒有放棄，在馬路上隨着Miss Lam的步伐慢駛，說：「真係唔會喎，拿，你唔上車我架車就跟住你行架啦。」

         Miss Lam假裝沒有聽到，可當她走了近三分鐘，Leung Sir的車子竟繼續跟着她走，甚至開始惹來了路人的目光。

         只要我同Leung Sir都唔出聲，阿祖應該唔知嘅，Miss Lam心想。

         向來低調的Miss Lam終於折服了，無奈地對車窗說：「好啦好啦，我上車啦。」
 

         早上九時多，剛過了最繁忙的時間，路上的車不多，不消一會兒便到了Miss Lam的住處。

         「你上去換衫啦，換完Call我。」Leung Sir把車泊在路邊說。

         「你唔係有事要處理咩？」

         「呃⋯⋯係呀，但我揸過黎嘅時候已經有人處理好咗啦，唔需要我啦。」

         「咁⋯⋯咁快？」Miss Lam難以置信地問道。

         「係囉，早知就唔請半日假啦。你快啲上去啦，我係到等你。」Leung Sir說。

         「喔，咁好啦。」

 
         從車門走出來，過了條馬路，走了幾層樓梯，當Miss Lam準備打開家門時，卻怎麼都找不到她的鑰匙。

         我明明擺咗係袋架，去咗邊呢，Miss Lam心想，拼命翻找手袋。

         就在這時候，背後出現了一道身影。