【愛情/穿越】深夜的我 遇上了早上的你: 第一章 比痴線更痴線的故事
我係林樂雯,今年21歲, 喺理工讀緊社工。 反送中嗰陣都有出嚟做FA，但係自從中大嗰次受傷之後就冇再出去.
話說唔知發生咗啲咩事，琴晚我瞓覺嗰陣無端端醒咗，只不過我醒嘅地方係一間消防局裏面...
-----------------
「緊急救護服務,西灣河去A616號車,地址 耀東邨耀樂樓10樓07室。 老人家滑倒。 收到請按回答制」
「呀雯，去車喇」
「蔡雅雯! 去 車 喇!」
「吓我唔係蔡雅雯....我係林樂雯...」
呢一刻,我先見到件衫上面嘅名牌, 寫住：
TSOI NGA MAN
蔡雅雯
我 X 你 個 X
「行啦」
「係嘅...係嘅...sir….」
痴線 乜料呀 發生左咩事呀 我係咪癲X左呀
-----------------
過咗一陣間之後
樓下看更同我哋上咗去1007室。正話嗌我嗰個陳sir (aka 消防處救護主任陳浩翔) 話呢個係聰叔，係佢地嘅常客。
“聰叔？我係翔仔呀，係咪唔舒服?”
“嚟緊“ 跟住有個呀伯開咗門。我諗應該就係陳sir 口中嘅聰叔.
“翔仔,我老婆去廁所跣親，起唔到身，我又扶唔起佢⋯”
“明白。比我哋去處理。呀雯，你去睇一睇聰嬸。攞埋個抽真空夾板。”
“Yes sir”
抽真空夾板: 初時好軟,用手動泵抽真空之後好似塊板咁硬.用嚟固定受傷嘅肢體
“聰嬸,你見點呀？” 我入左廁所,然後對住坐低咗喺廁所裏面嘅聰嬸講.
聰嬸答： “冇呀…去廁所跣親…跟住起唔返身…”
“哇！點解咁跣嘅？” ____! 差啲跣親添...
陳sir 問： “聰叔,你究竟搵人換咗防滑磚未..."
聰叔答： "未呀...你知房署嗰邊幾難搞㗎喇..."
"唉,好啦好啦. ”
我： “聰嬸,我依家幫你做檢查先,痛的話就出聲.”
聰嬸： “麻煩晒啦呀雯”
“唔使客氣~”
…
我: "陳sir, 大腿骨折。”
“OK. 泰仔, 幫呀雯手. 上抽真空夾板. 聰叔...” 然後陳sir就行開咗.
泰仔： “係嘅。聰嬸，依家俾氧氣你聞，呀雯佢搞掂之後就會送你去醫院。”
(作者僅有嘅急救知識已用盡,跳下時間先,一唔係寫到2047都未寫得完)
*救護車響號*
我： “聰叔,其實...你哋係咪換防滑磚嗰陣見到啲咩問題？ 我睇下點樣幫到你?"
聰叔突然情緒激昂： “咪房署囉佢哋成日都話換磚唔得乜乜(語速4倍)..."
我： “其實聰叔你可以諗下搵裝修公司搞,我識得我嗰邊有間唔算太貴,至少佢哋對呢啲規矩比較熟.至少換防滑聰...呀唔係,唔好意思...防滑磚唔使搞到頭痕..." 呀__了
救護車無端端多咗幾把笑聲.
翔： “防滑聰係咩事呀...笑到肚痛...”
泰： “我真係未聽過有人咁樣叫人...”
聰嬸：“呀雯你幾時變得咁搞笑...”
聰叔冇出過聲.但係佢嘴角上揚.
...
我: “喂你地專心揸車啦好冇.”
真係尷尬死寶寶了。救命...
“聰叔,我寫低個師傅嘅聯絡資料俾你..."
聰叔:"好丫,唔該晒雯雯."
-----------------
陳sir同泰仔啱啱送左聰叔同聰嬸入急症室。呢個時候我已經唔經唔覺瞓著咗...
醒返就神奇地再次出現喺大學宿舍度...
好，乜事都冇發生過。
幻覺嚟嘅啫，嚇我唔到嘅！
-----------------
第二日
下晝12點
鰂魚涌
每逢禮拜六日我都會返去屋企，食下野行下山都好，好過禮拜六日都留喺poly唔知做乜。
“林姨～ 照舊丫唔該”
“收到～“
過咗一陣，一碗熱辣辣嘅沙嗲牛肉麵就出現咗喺我眼前。
正。
“唔該晒林姨～”
“唔使，趁熱食呀～”
𠽌𠽌𠽌。正。
*有個杯跌咗落地下*
“有人哽親呀！”
我：“林姨幫手報警—扶佢出嚟先，慢慢嚟唔使急。”
*大力拍落背脊度*
“佢個呼吸情況冇改善…我依家同佢做推腹，啱啱食完咩哽親？”
“麵包…餐包..”
“明白。唔使咁驚，我會幫你。”
“3，2，1，上…”
所謂嘅推腹法(Heimlich Maneuver)，指用手透過向橫膈膜施壓，令到肺部排出空氣推走喉嚨裏面嘅異物。
*救護車響聲*
“消防處救護。係咪有人哽親?”
我：“Sir, 呢度。 patient 食麵包哽親,啱啱成功令到佢吐返舊嘢出嚟。”
“好，唔該晒你。泰仔，攞個口咽氣喉比我。雯，推個擔架床入嚟。”
-----------------
東區醫院急症室
呀Sir 推咗個病人入急症室。
好,搞掂。可以返去了。
林姨:“樂雯好彩有你咋,一唔係我都唔知點算。”
我：“唔使咁客氣喎,我都係幫人啫~"
“唔使講咁多,請你食蛋撻。咁我走先啦。”
“多謝～ bye bye~"
突然我feel到有人拍我膊頭。 咦,係啱啱嗰個呀sir.
"等陣先你叫咩名話？”
“林樂雯”
“...”
“呀sir做乜咁驚訝...等陣先你係...？”
“救護主任陳浩翔...”
我：“吓”
翔：“吓”
我：“吓!!!??? 原來琴晚場夢係真㗎!"
翔：“防滑磚嗰個係你講㗎?"
我：“防滑聰嘛。”
泰：“飛sir你喺度講緊啲咩?"
翔：“原來蔡雅雯唔係撞壞腦...”
泰: "吓...咁即係...."
唔係呀嘛....我諗我真係要睇精神科醫生喇...