知唔知毒撚最忌咩？毒撚最忌係...中意人: 第二章
「喂詠茵，你A1真係想擺呢個唔知乜鬼課咩，呢一課真係乞食㗎喎。」
一個小息，葉詠欣同李小玲喺度討論緊揀科嘅嘢。
「呢科唔係咩乞食科啊！呢科叫地球科學，係專門研究一啲地球上面嘅生態系統啊，氣候變遷啊等等嘅現象—」
「得啦，我唔想有聽你喺度講咩地表啊，咩化石啊，我知你想做生物學家啦。」
唉... 果下我真係有衝動想走過去推開李小玲，同詠欣慢慢喺度討論，我想同佢講，我唔似李小玲，我會好有好有耐性咁聽佢講，由盤古初開到將來地球上發生嘅每一件事我都會肯聽..
同埋，我想問佢... 真係好想問佢... 但我冇勇氣。
「喂阿榮，又喺度發吽豆，你隻手拎住張咩啊。」
柏林唔知幾時突然間出現咗喺我身後，真係嚇咗我一跳，我即刻將手上面拎住嗰張紙收埋。
「你行路冇聲㗎，下次可唔可以唔好無啦啦喺我身後面出現啦。」
「你做咗虧心事咩咁怕，快啲拎俾我睇你手上面拎住嗰張野！」
柏林起勢咁算搶咗我手上面嗰張紙，唔知係咪因為我哋太大動作，搞到穎茵嗰邊都望咗過嚟，我即刻大為緊張。
「冇嘢啊，唔關你事呀垃圾嚟嘅咋。」
講完之後，我扮作若無其事咁行出去將張紙掉落垃圾桶。
紙上面印住
「2015年，太空館白惡紀化骨展覽」
估唔到，我都係冇勇氣問佢想唔想同我去。無力感夾雜着一種失落出現喺我心入面。
中二開始，我同葉詠欣就已經一直同班。頭嗰兩年，我對佢完全冇感覺，因為其實佢都係選一個比較接嘅女仔，佢同我一樣唔叻社交，嗰兩年同佢講嘅量可能五句都冇。一直去到中四，我同佢都係紅十字隊嘅隊員，先開始慢慢咁認識到佢，搵到佢嘅魅力……
佢身材唔係特別出眾，樣貌亦都唔係十分之標緻，橫睇掂睇，都只係一個十分中規中矩嘅女仔，係嗰種喺條街度，你見到佢都唔會認得佢個樣嘅人。但係，我就係中意佢。
「拎拎……」
放學嘅鐘聲又響，時間一日一日咁過得好快。
同我放學嘅依然係柏林。一路上，我並冇好多說話講。
「喂，你唔係嬲我今日小息找你啊。」
柏林似乎頂唔順呢一種Dead air 既氣氛。
「唔係……只不過係……柏林，你有冇鍾意人。」
「哇……做咩突然講呢啲，唉... 咁緊係有。」
柏林意味深長咁彈咗口氣，好似開啟咗認真mode咁，不過我咁多年來都好似好少同柏林講關於感情嘅事。淨係知佢中三嗰年試過鍾意過一個女仔，但係後尾佢話嗰個女仔已經有男朋友。
「我鍾意嗰個女仔，佢身材好，樣又靚，最衰仲要有好多宅男都鍾意佢... 我比張相嚟睇吓..」
我都估唔到原來柏林而家已經有新嘅他劇，好期待佢俾我睇個女仔究竟係咩樣。點知…… 佢竟然打開咗佢嘅怪物彈珠， show左一張瑪娜（一款手機遊戲入面的角色）嘅相俾我睇。
「屌！」
等我仲好認真，諗住可以趁今日同佢好好咁傾訴一下，不過睇嚟，佢都唔係一個適合嘅傾訴對象....
返到去屋企，打開手機打開電腦，我嘅心情仍然係好鬱悶。我一邊喺度諗緊過兩日要去學校旅行嗰件事，一邊喺度諗緊今日又估唔起勇氣同詠欣講嘢。
我望住手機知發覺自己有幾可憐，估唔到當我想搵一個人傾訴嘅時候都會覺得係咁困難。呢個時候我腦海入面突然之間浮現左一個好模糊嘅人物...
我開咗連登出個post, 題目係：有冇人教下毒撚溝女點樣可以踏出第一步
冇錯，我係諗住引嗰個人回應我，但我知都幾渺茫。
過咗冇幾耐就有好多留言彈咗上嚟，但好多都係好惡毒，有啲話毒撚學咩人溝女，有啲話條女好慘，有個最仆街嘅叫我去韓國整容。
我熄左陪電腦冇再睇... 訓左個覺。
但係我都係訓唔著。
曾經，我同泳欣成為過朋友，但後來，因為我唔知足，我做咗一件事，令到我同佢之間嘅友誼就咁告吹左...
但係，我果種中意佢既感覺，從來都冇消失過。只不過我知道，由我鍾意佢嗰一刻開始，係呢一場感情上面嘅遊戲我已經徹徹底底咁輸咗。
以前睇過有本關於心理學嘅書，入面講到，感情其實係一場比邊個鍾意邊個多啲嘅遊戲，一旦你鍾意對方嘅程度遠超於對方對你既好感，咁你就已經徹徹底底咁輸咗。
簡單啲講，當你對對方既neediness 愈大，對方對你就愈冇興趣。相反，當你對對方既 neediness 愈小，甚至乎你唔care對方，對方反而有機會俾你吸引到...
起翻身，原來已經八點幾個天都黑晒，阿媽今日放好夜仲未返到屋企。我行入廚房錄咗個杯麵反正今晚都冇咩胃口。
我拎咗個杯麵入房，順便check一check連登個post嗰度有冇回應。有一個名令到我興奮左一下，只見喺眾多恥笑我嘅留言入面，唯獨有一個係與眾不同。
小矮妹：
巴打，又係你呀。都話我講中咗㗎啦，你早幾日post嗰件事應該都係關呢個女仔事㗎啦。
我見到佢呢一個留言既興奮又緊張，我好想好想同佢講晒我發生嘅所有事，但係我又怕我會終結左個話題然後同佢再冇機會講嘢傾偈。
良久，我不則不除咁覆番，
「絲打！估唔到你一直有留意我喎仲記得我！」
佢好快就覆返我，
「點解你唔俾啲勇氣搵個女仔呀，」
「因為個女仔唔會鍾意我囉。我好怕比佢拒絕。」
「你信我啦，如果你夠誠懇，個女仔就唔會拒絕你㗎啦XD」
同佢愈傾愈開心。 佢俾咗好多自信心我，我都唔知點解。有一刻，我真係好想PM佢，但係連登冇得PM人嘅屌！
「絲打，我真係好想識你，唔知點解同你雖然未見過但好似好啱傾咁。」
我諗一陣先夠膽send呢一個message出去。
但係我估唔到嘅係，佢竟然好快咁覆我。
「好啊，你唔介意嘅就加我TG啦！」
我更加估唔到嘅係，佢竟然咁爽手就應承咗我。但係我作為一條讀撚，其實我真係唔知咩係TG。上Google search完先知現原來係Telegram，我本身冇用開都特登down落嚟。
我download咗落黎之後就即刻add咗佢，Add咗佢之後，我諗咗好耐開場白第一句應該講啲咩。因為始終唔似喺個post嗰度講，原來私底下同一個人講嘢係會緊張啲，但係亦都興奮啲。
「hi 」
好老土，我第一句開場白都係hi。
「hi ～ 」
「係呢，我叫阿榮，你點稱呼呀XD」
「你叫返我小矮妹咪得囉XD」
我喺度諗緊，邊有人會鍾意用網名去稱呼自己㗎。不過我已經好開心可以同佢私底下溝通。
「連登嗰邊太多人太集啦，咁樣同你講好似開心啲舒服啲。」
「都係嘅，係呢你講今日嗰個女仔呢其實點解你唔俾多啲勇氣啊。」
「你真係想知點解？」
「你唔介意咪話俾我呢個陌生人聽囉。」
「因為佢有男朋友。」
我講完呢句之後，我見到佢係咁輸入中，但係好耐都冇send嘢俾我，可能佢都諗唔到應該點樣覆我。
「唔緊要啦，其實我都已經放低咗好耐，但係鍾意一個人，又點會咁容易放得低呢…… XD 係呢不如你同我講番你既野咯！」
我嘗試緩和返呢一個氣氛為免太尷尬。
「我讀中五㗎。不過其實我現實係一個怕羞妹尼。」
「有幾怕醜先...」
「你真係想知？」
「想阿。」
果一晚，唔知點解同佢越嚟越好傾，一路傾到凌晨2:00 ，我先識眼瞓。但係最好笑嘅係，果一晚之後，我連佢個名都唔知係咩，你話好笑唔好笑,但係我都知道，果一晚之後，同佢講嘢會成為我嘅生活嘅一部份。