Killer: 鬥黃

鬥黃

討論時間一開始，搶閘說話的既不是Shirley，也不是Annie，而是Vanlee，伴著藍色燈光的說話，令在坐所有人都格外留心及敬畏。

「Shirley，我都戥你難過，不過你會隊邊個出嚟？我就覺得朱Ling好有可疑，佢啱啱係咁隊Jasmine就知，你以為佢係黃絲所以隊佢？反而我覺得佢係PoPo，想隊PPRP出嚟脫身，如果你仲記得第一Round佢最後投票唔駛死，就係因為藍營啲人保佢，因為佢係PoPo！」Vanlee落力的說服Shirley，但Shirley卻不為所動，而燈光又變回黃色。

「我心目中一早已經有人選，正如我之前講過，我要指控嘅係阿Tim，警隊一哥！」Shirley激動得站起來指著他。

阿Tim冷靜的回應，似乎已經想好了應對之法︰「Shirley，我真係唔明點解你一直都要針對我，我都已經講得好清楚，你唔好浪費一次機會喇。」





藍絲阿偉也加一把口︰「咪係囉，啱啱咪講咗Andy先係一哥囉，你舉報佢好過啦。」

岳義士LU立即回應︰「你收嗲，我信Shirley，阿Tim先係一哥。」

「LU……你唔應該應佢，因為佢……佢中左武肺，而家你都變成帶菌者……」阿Moon陰聲細氣的告訴LU。

「吓？認真咩？What the fuck！」LU嚇得花容失色，驚慌的問︰「咁我點算？」

「無人幫到你，不過你可以阻止佢再形成新嘅傳播鏈。」PoPo高軒答。





「What a pity！LU，你下一Round唔好出聲，Stop咗個武肺病毒，犧牲自己啦，我會懷念你。」Vanlee貓哭老鼠的說，在假哭兩秒後，她又再次變臉，繼續說服Shirley︰「朱Ling先係Target，信我。」Vanlee說完後燈光未有變黃。

「Shirley，請你講出你舉報嘅兇手。」傳媒說。

Shirley依然故我，沒有理會Vanlee，只是默默的指著阿Tim。

「好。」傳媒簡單回應後，燈光轉回黃色，話語權亦交到Annie手上，她一時之間想不到什麼辯護理由，只懂說自己能阻止武肺。

「一定要救佢，佢可以阻止武肺救返我呀！手足，投票救佢呀！」LU奮力勸說。





「係呀，我好黃㗎，我會幫你哋阻止武肺，同普通黃絲唔同，我有技能㗎，你哋唔想武肺傳播就要留返我喺度。」Annie將自己能做的都說出來。

她不說猶自可，一說便掀起軒然大波，PoPo阿傑說︰「講貢獻鬥黃，Shirley大好多，可惜佢無得救返，如果可以交換，我寧願救佢棄你。」

黃絲嘉美也附和道︰「真心，鬥黃鬥有用，Shirley好好多，佢起碼都提出咗好多意見，但你好似無咩……」

中立撚阿瑩亦說︰「Annie，你畀我感覺似係只為自己，無諗過其他人，想獨善其身咁。」

眼見Annie的情勢告急，以大愛出名的Andy連忙替她挽救劣勢︰「雖然Annie貢獻呢一刻係比較小，但最起碼佢都有份投票幫大家呀，我哋救得一個得一個，咁先可以喺出去之後揾個幕後黑手報仇！」

「收皮啦，呢度無人會再諗呢樣嘢㗎喇，啱啱只係假像，而家大家都認清事實，活著就是勝利！」Harry以極令人討厭的嘴臉說，雖然是事實，但總令人不喜歡。

「Time's up.」藍光再現，傳媒開口說話︰「鄺神Shirley，臨死前我都要同你講句，你一直喺觀眾生存排行榜上面排第一，不過好可惜，槍打出頭鳥，多謝你一直以來嘅活躍表現，永別。」

「神愛世人，主，我而家投入你……」Shirley話還未說完，眼罩的針便貫穿了她的腦袋，立即死亡。





「事不宜遲，請投票，阿Tim係咪兇手呢？」傳媒發起投票，紅燈亮起。

不消一分鐘，結果便出來了︰「七對九，阿Tim安全。」傳媒宣布完結果，然後繼續下一輪投票︰「而家到第二輪，被告Annie，大家請投票。」

「十四對二，罪成，從來鬥黃都唔係好事，維基Annie，上路啦，死刑！」傳媒高聲宣讀判刑。

「啊！唔好呀！」尖叫的不是第二個人，而是LU，她一心認為Annie死後便無人能解救她。

Annie死狀固然恐怖，但LU好不了多少，她知道自己只餘下兩回合的命，正拼命想辦法讓遊戲在兩回合內完結。