Killer: 人一藍，腦便…？

人一藍，腦便…？

「二零一九年十月一日，國慶日同時都係香港人流血嘅一日。四個幾月嘅示威，PoPo終於到臨界點。『嘭』一聲，槍開咗，一個中五學生哥心口血流如注。就係哩一槍，沉默嘅大多數開始有所行動。」傳媒說著這一回合的開場白，同時在座的五人都各自思考著這一回合的策略。

「PoPo，你哋畀咁多人圍咗咁多個月，又畀人打又畀人串，而你又只可以用最低武力去還拖保護自己，咩威信威嚴都無哂，變咗過街老鼠咁，真係好難忍，仲要畀人屈偷嘢、非禮、強姦，身心壓力大到一個點，好彩有一哥同政府無限撐。為咗報答佢哋，真係要做返啲嘢，雖然喺度無得開槍，但你依然可以宣洩你內心嘅忿怒。一哥同PoPo，你哋喺時候代替月亮懲罰佢哋喇！」傳媒說完，PoPo和一哥的眼罩便打開了。

他倆對望了一眼，確認過眼神，遇上對的人，高軒便指向Harry，而阿Tim亦隨即指著他，向傳媒表示決定選擇Harry，待傳媒收到指示後，他們兩人的眼罩便再次關上。

「好喇，今晚三萬人嘅部門已經揀好咗執法對象，而醫護亦都因為罷工而被政治清……唔係，係因為無故曠工而被紀律處分先啱，所以都無能力救人，今晚都……」傳媒說到一半，突然停下來，而打斷他的正是阿瑩。





中立撚阿瑩舉手示意，要發動她的技能。

「咳咳，」傳媒清一清喉嚨，繼續說下去︰「而今晚都因為槍擊事件，有一班平時中立嘅人，終於都走出嚟，決定轉軚，中立撚，睇下你想揀邊個陣營。」

阿瑩的眼罩歷經多個回合之後，終於再一次在討論以外時間打開。她看了其餘的四人，心裡早已有數，她決定要以黃營的身份獨自一人活著走出去，所以她二話不說便指向朱Ling。

「哈哈，係一個唔錯嘅選擇。」阿瑩的眼罩被關上，傳媒接著道︰「喺充滿民憤嘅一晚，PoPo忙住解畫，中立撚揀咗自己覺得啱嘅陣營，成個香港輿論一面倒，只不過，平民百姓又點會夠政權鬥？更何況面對緊嘅係一個有阿爺撐腰，全世界都買佢怕嘅政權！蟻民們，睇嚟你哋都係九死一生。」

「好喇，大家可以開眼討論。」語畢，眾人的眼罩又一次打開，藍燈高亮，傳媒亦繼續開腔︰「今晚醫護Harry好不幸咁要永遠離我哋而去，你為大家作出嘅貢獻無人會忘記，而家請你做埋最後一次嘅付出，提出你要指控嘅對象。」





Harry苦笑了一下，垂下頭並輕微搖著，搖晃數下後再次抬頭，開懷的笑著說︰「估唔到最後都要死，唉，枉我一直都咁努力，不過都好，唔駛再面對咁大壓力，可以離開哩隻Game，Anyway，黃營要繼續努力，打倒班仆街，活著咁離開。我只可以為你哋送上最後嘅助攻，加油呀！」道別過後，他指著阿Tim，傳媒確認後，Harry便在針刑之下失血過多而亡。

二對二的局面，黃營如何把握這次Harry創造的黃金機會將會是勝負的關鍵。可是除了阿瑩跟傳媒外，其他人根本不知道如今是二對二還是三對一，唯一可以做的，只有在接著下來的十五分鐘討論時間內弄清楚。