穿越時空的少女之三角師生戀

Ch.1 初遇重遇

「......六點鐘，ok！起身啦起身啦！」早晨，我叫慕晴，今日開始我就係一名中三學生。我就讀一間傳統女校，而且仲要係山區兒童，啲男老師顏值一言難盡，所以真係好dry......哈，講笑啫。

今日第一日開學，返到去開學禮，然後處理班務，跟住就放學，easy job啦。

「夏！紫！凌！早晨！」一入到班房就見到我哋嘅靚女學霸坐在喺教師桌。
「慕晴，今日咁早啊。」
「凌凌~好肚餓啊~陪我落去tuck shop買嘢食啦~」
「得啦，唔好喺度嘔心啦。」



介紹下先，夏紫凌－考試次次全級頭五，名副其實嘅學霸，你話係咪變態。又話近朱者赤，近咗佢13年，又唔見我有咩轉變。。。

「唔該，要一份格仔餅同一包朱古力奶吖。」嗯？？？當我講緊嘅時候，另一條隊亦都有人異口同聲咁講，無論字眼、語氣定語速都一模一樣。。。

嗰個人把聲，係一把帶有磁性嘅男聲，冇印象學校其中一位男老師把聲係咁。

我同佢對望咗一兩秒，冇乜留意太多，只係見到佢望我嘅眼神好似有啲amazing，疑惑同奇怪嘅感覺 。

「嗱，你哋嘅格仔餅同朱古力奶。」


「唔該。」又嚟......

「你哋識㗎？」係喎差啲唔記得咗紫凌仲喺我隔離。
「唔識啊，見都未見過。哈，佢一定係未見過靚女。」
「車，可能啦，見佢一直眼甘甘望住你。」
「一定係俾我嘅魅力所吸引，話說我啱啱仲以為我哋學校今年要轉男女校。」
「發夢啦你。」

~ 各位親愛嘅同學，8:30開始進行開學禮，麻煩8:15準時到達禮堂，按班別就坐。 ~



因為唔記得帶眼鏡，睇遠嘢矇查查。所以成程開學禮，我只係肉體上參與，意識一直喺到發白日夢。只係間唔中聽到有人討論，例如今年啲新老師點......blablabla

唯一比較清楚嘅係，我哋班今年嘅班主任係新仔，好似姓顧，加上佢係罕見嘅男士，所以隔離左右傾咗好多八卦。

維持兩個鐘嘅開學禮終於完啦，真係悶到嘔咁滯，嗱嗱臨快啲上班房。

入到班房一如既往街市咁吵，由於先跟學號坐，我坐第一排第一個，近門。 過咗好一陣，全班終於靜曬。

門被推開，一位著住白恤衫，黑西裝褲，風度翩翩嘅男士行咗入嚟。佢嘅第一眼落喺我身上，而我又同佢對望咗好幾秒。

咦？呢個咪係今朝嗰個「痴漢」？

佢望住我嘅眼神有啲愕然，依然感覺百感交集，好似有好多嘢想同我講。

佢行去黑板面前，攞起支粉筆，喺黑板上面留下「顧書言」三字，字體端正清秀 。



「大家好，我叫顧書言，你哋叫我顧sir就得啦，今年除咗係你哋嘅班主任，仲會教你哋中文，以後請多多指教。」然後好有禮貌嚟咗個45°鞠躬。

仔細留意，人如其名真係有一股書卷味，顏值中上，身高接近一米八。我敢擔保佢一定會係全校最靚仔，唔使好耐一定深受大家愛戴， 可能仲會被封為男神。

「咁我哋嚟點名先。」

前面點名啲同學都好正常，但係點到我嘅時候。
「慕......晴，你真係叫慕晴？」

＊＊＊

大家好，我係顧書言。今日係2019年9月2號，第一日正式喺呢間女校教書，希望女校會好過男校。

呢間tuck shop好似有格仔餅同朱古力奶，嗯很好。估唔到十年前佢嘅一個習慣，成功影響咗我，成為我呢十年嘅習慣。一份格仔餅，一包朱古力奶，不知不覺就咁吃咗十年。然而，依然冇佢任何消息，一啲都冇......



「唔該，要一份格仔餅同一包朱古力奶吖。」？？？呢把聲......唔會有錯！我嘅視線隨住呢把聲嘅方向落喺一個女仔身上，係佢！！IMPOSSIBLE...冇變過，再細微嘅地方都冇變過，仍然係當初第一次見到佢嘅模樣。只係眼神冇當時見到我嘅熱情，而家喺佢眼中我猶如一個再普通不過的陌生人。

歷史總是驚人地相似，呢一幕令我諗起當時第一次見佢嘅情形。十年前佢眼神充滿熱情行到我身邊，我只係覺得呢個女仔好奇怪。如今正正相反，我先係嗰個怪人。

「嗱，你哋嘅格仔餅同朱古力奶。」
「唔該。」再一次嘅異口同聲，懷念。

佢視線冇多留戀喺我身上，成個過程只係對望咗一兩秒。佢頭也不回轉身離去，感覺好似要再一次消息。直到佢完全消失係我視線範圍之內，我嘅視線先慢慢移開。

成程開學禮，我一直喺度搵緊佢嘅身影，腦一片空白，諗極都諗唔明。唔通佢有長生不老丹？定係不死之身，或者佢係外星人！！一定係一定係，咁就講得通！！邊有可能，傻嘅都知無可能。。。開學禮完，都係上班房先啦，遲啲見到佢先算。

。。。喺隔離班就聽到佢哋嘈到拆天，希望唔好多問題學生就得。推開門，視線本能反應落到坐第一位同學身上......佢竟然係我班。

OK呢一刻時間已經靜止咗，同佢對望咗好幾秒先反應過嚟。收拾心情收拾心情！！



「大家好，我叫顧書言，你哋叫我顧sir就得啦，今年除咗係你哋嘅班主任，仲會教你哋中文，以後請多多指教。」

「咁我哋嚟點名先。」

終於點到佢。

「慕......晴，你真係叫慕晴？」

慕晴......？？
你究竟係咩人？
10年前......
人有相似...人有相似...
又咁啱同名同姓啫...哈...哈哈