遲得恰好的告白: 第二集

「就係通識嘅陳老師……」高兒說。
.
「吓！唔係嘛！咁彩虹？！仲要咁成熟？！」友人回應道。
.
「佢用左好多上堂嘅時間來解釋做人嘅道理，令我獲益良多……」
.
「__！原來係吹奏嗰位俾人玩手機嘅老海鮮……」友人立即喝倒采。
.
「最後，我仲要多謝同我相處左咁多年嘅每位同學，我當然唔可以代表曬你地每一位，但都希望我嘅分享能夠响你地心入面留下一絲共鳴，成為你地响畢業之前嘅最後一個美好回憶，我係高穎儀，大家可以叫我高兒，請繼續多多指教，多謝。」
.




就這樣，她就結束了自己的分享；就這樣，她就帶著微笑接上那個寫著「年度最傑出畢業生」的獎狀；就這樣，畢業典禮也就結束了；就這樣，我就成為一個舊生，可以鬆一口氣了。
.
典禮過後，同學們慢步前往操場，各自與家人和朋友作最後的中學校園合照。
.
「喂，畢業快樂呀老友！」呀文拍了拍我的肩膊。
.
「喂呀文！畢業快樂呀！」我緊抱了他一下，畢竟我已經與他經歷了兩次畢業典禮，能夠與這位難得一遇的朋友共同走過12年，我是打從心底地珍惜這段友誼的。
.
當我們拍過照片以後，呀文主動與我繼續打開話匣子，說：「你搵左賢仔同男神影左相未？痴線架！佢地兩個而家真係畀女圍呀！成班師妹圍住佢地話要影相，我而家去影都要排隊等佢地喎，你話係咪認真誇張吖？」
.




「啱呀，一早遇左啦，所以我頭先一落到來就即刻搵佢影左相先，費事麻煩。」我從容地回應道。
.
「哦。咁隔離嗰個女神高兒你都搞掂咗啦係咪？你咁鬼叻！」他立即嘲諷我。
.
「唔好搞佢啦，佢今日咁鬼忙，Grad Din都仲有得見啫。」我隨隨便便回應他。
.
「唔係呀嘛大佬！你仲要縮埋自己幾耐呀？你睇下你女神，佢今日著嘅雖然都好似係一件普通嘅校服，但係我就唔知點解硬係覺得佢靚咗好多咁，簡直就係升咗上一個新嘅層次，Delicious~」呀文帶著食評家的口吻說道，令我忍俊不禁。
.
「或者，呢啲可能就係你平時成日講嘅仙氣囉。」我一邊回應呀文，一邊注視著數步之遙的高兒，看著她與友人聊天聊得開心的時候，一種幸福的感覺也會油然而生。
.




「你睇下你，開心到咁。鍾意人地咪講囉！我都唔明你，中三嘅時候就一早應該要……」呀文和我一同注視著她。
.
「傻啦，佢嗰時已經有仔喇。」我決定打斷他的說話。
.
「嗰時還嗰時啦！我記得佢條仔。高兒中三年尾先識嗰個仆街吖嘛，佢地而家都散左半年啦！點解你仲唔同佢……」呀文繼續說下去
.
「得啦，我有分數，呢啲嘢遲啲先算啦，好唔好？」我再次打斷他的說話，想終止與他有關高兒的討論。
.
「Okay, Fine. 是但你，係咁先！」呀文轉身離開，尋找別的朋友繼續拍照。
.
回想三年前的時候，當時的我和高兒同班，我們恰好志趣相投，大家都喜歡玩音樂。所以，我和她在音樂室也留下了不少美好回憶。
.
但是，最深刻的回憶，往往都是傷感的。
.
我還記得那一晚，當我在街上慢跑，跑進公園休息的時候，我隱約聽到她的聲音從公園的遊樂場傳出來。我悄悄地走進公園，而觸目所見的，就是高兒和另一個陌生男人的背影。我知道她是高兒，因為她的馬尾是與別不同的，我不懂怎樣形容……[佢嗰時中三，我都係唔形容了，自行意會啦，小心FBI]




.
「點呀，今日玩得開唔開心？」那位陌生男人的聲音令我生厭。那輕佻的口吻，使我更確信他是個玩弄感情的賤男，但高兒大概不會意會到。
.
「都Okay啦！始於我都好耐冇去過OP搭纜車喇。」高兒回應道。
.
「你鍾意嘅話我，我每個星期都陪你去又點話啫！係呢，鍾唔鍾意我呢份禮物？」
.
「鍾意呀，呢個雙子座水晶都幾靚吖！」
.
「係架，不過呢個星座就慘啲囉！次次生日都係考試，你話係唔係先？」
.
「啱呀，我真係唔係太鍾意考試……」
.
「咁，你鍾唔鍾意我？」那位陌生男人刻意打斷了高兒的說話，繼續說：「我都同你講左咁多次啦，次次都話考慮考慮，我都只係想揾一個紀念日同你慶祝下姐，點呀高兒姐？賞唔賞面畀次機會我？」
.




「車！邊個話一定要同你喺埋一齊？」我隠約看到高兒的背影慢慢靠近她旁的男人上。
.
「高穎儀，今日呢就七月二，好日子來架！加埋就長長久久架喇！」那個陌生男人把他的手輕輕搭上高兒的肩膊上，令我有一種說不出的難受。
.
最後，高兒輕輕的點頭。此時此，我彷彿意會到下一秒即將要發生什麼事情。於是，我緊握雙拳，拚命逃離現場。內心不知怎的，有團熱氣直衝腦門，在我眼眶中打轉，慢慢矇矓了我的視線。
.
「喂！諗咩諗得咁入神呀？」高兒大力拍了一下我的肩膊，把我從回憶中拉回到現實。