編寫者（愛情，科幻，小量血腥）: 編寫者 上

「呀！！！！！！！！！！」

「咩事叫到拆天咁呀，等等仲要番學㗎」我阿妹搓著雙眼走入我房間對我講

「夢？會唔會太真實呀」我對自己講

「咁大個人發惡夢發到彈起身又大叫會唔會太難睇呀，你唔係擔心等等見工失敗呀，你都25歲人啦仲驚」佢講完行番自己房間訓

我睇住個天花板同外牆都係正常嘅白色，我再望向手機上所顯示嘅時間3點鐘，睇黎我真係發惡夢發到驚醒。我見我都醒左，我就打開手機上下網。






「安徒生，咁夜你都唔訓？」一則訊息傳來，發訊息嘅主人係我由細到大嘅好朋友小夏，係得佢一個人會叫我安徒生。

「我見無聊咪玩下手機」我總不能話我發惡夢驚醒，廢事比個女仔笑我。

「既然你都醒左咁不如講故事比我聽啦」佢由以前到宜家都好鍾意我寫嘅小說，成日叫我講比佢聽

「今日無貨呀，講唔到呀」我仲係驚魂未定，驚事講野口窒窒，所以是但講個理由覆佢

「好啦我都訓啦，你早d訓，聽日要見工呀，比心機，你一定成功嘅。」佢打完呢句之後就離線左






好難得有出版商搵我見工，仲要人工唔低。一直以黎我都以小說家為目標，至少宜家算走入呢一行啦。但係話唔擔心就假嘅，我上網搵過下間公司，差唔多無咩資料。自細兩兄妹兩個一齊住，為左要養阿妹同自己兩個人，咁我唯有試下啦。


我不繼諗不繼諗，好快我就忘記啱啱嘅惡夢，慢慢進入夢鄉。

———————————

鈴鈴鈴鈴————





電話鬧鐘嘅聲音將我從睡夢中抽離，我攞起手機睇下時間。

「11點.....」我搓一下眼確定無睇錯時間