那些年，我最愛的兩個女孩子: 8

「阿玲…」
 
「Tony….」
 
「唔好喊啦……再喊就唔靚女啦，妳以前d強勁氣勢去哂邊?」
 
「我真係好唔捨得你……」
 
「妳而家日日係學校，咪可以見返我地嘅回憶…妳係為左咁樣先返去教書架嘛」
 




「嗯…」
 
「妳仲記唔記得……我第一日返學傻傻下走入更衣室見到妳換衫?」
 
「我記得…我仲打左你幾巴…」
 
「其實果時…我已經鍾意左妳…妳果陣一對麻花辮，四眼妹造型好娘，但係我好鍾意…」
 
「Tony…」
 




「咁多年黎，我仍然愛住妳，娶唔到妳，係我帶唔走嘅遺憾…」
 
過左冇耐…病房就傳出媽媽同契媽嘅喊聲
 
之後，林醫生就宣佈左爸爸離開嘅消息
 
我第一次去喪禮，就係爸爸嘅喪禮，有好多人送花牌黎俾爸爸。因為爸爸係一個好肯幫人嘅人，所以佢人緣極好
 
忽然我聽到媽媽同契媽對話，媽媽安排左d野，契媽點都唔肯接受
 




「阿玲!!妳唔好理人點睇我地啦好嘛!!」
 
「嘉麗呀…唔可以咁架!!!妳先係Tony老婆!!妳係正印，當年我…我同佢…」
 
「阿玲，點都好，妳同我塊牌都會放出去，唔分大細，神父都同意咁樣，一張結婚證書唔係代表一切嘅愛，當年妳自願退出，妳嘅犧牲都係愛，妳比我更愛Tony」
 
我終於知道媽媽同契媽講咩啦，契媽其中一塊花牌上，同媽媽一樣，寫住愛妻兩個字
 
媽媽係爸爸個喪禮上公開接納契媽
 
花牌有家姐學校；聖嘉勒女書院家教會、一眾教職員、校長、家姐全班。有我學校西區官立小學全體教職員、校長等等….，仲有爸爸第一間中學；樂善堂書院、仲有爸爸媽媽契媽嘅學校；英華女學校，然後…我見到一塊醫生送黎嘅花牌，上邊有林醫生個名之外，仲有佢嘅家人，佢兩個女；雪凝、雪晴。
 
果個…原來佢係雪凝嘅爸爸
 
好多人黎送爸爸最後一程，我同家姐、媽媽、契媽同埋詩敏一齊坐係主家到向來賓致謝，真係有好多人黎送爸爸最後一程，包括佢地以前嘅校長




 
然後…佢都有黎到
 
「林醫生?」
 
「兩位程太，我係代表我自己黎嘅，我好佩服程生，咁辛苦作戰，為左見自己所愛嘅人，竟然放棄舒舒服服咁走，點都要等哂所有人先」
 
「林醫生…好多謝你照顧我先生咁耐…」
 
「程太，呢個係醫生責任」
 
爸爸火化時間到了，我按左個制，永遠送走左爸爸。
 
不過估唔到，4年後，我會再一次按制，今次…係送媽媽走