那些年，我最愛的兩個女孩子: 22

「程同學，今年你係最佳進步獎得獎同學，你由舊年剛轉過黎，到而家考到全級第一，我地總冇睇錯你」
 
不過黃警司之前話你地唔想收我架喎
 
「係，校長，有咩問題呢?我用盡力去讀書，做我本份」
 
「你知你以前…」
 
「得啦，我以前跟大佬，遲d學校個分享會你想我上台分享下以前嘅事嘛，我返去搵相出黎啦」
 




「聰明，今次我地邀請左監管你果組反黑組黎，所以希望你都可以上台分享下啦」
 
分享咩?分享佢地同我一齊睇女睇馬?
 
到左分享會果日，F.1-3所有男女同學係哂到，而我都準備好上台分享
 
企定定係到又唔適合我嘅性格，所以我借左枝無線咪黎用
 
「有請我地今年度F.3最佳進步獎得主程逸風同學為大家分享佢以前嘅經歷，希望大家可以留心，因為程逸風同學兩年前，係北角曾經誤入歧途，有請」
 




「喂，有咩想問?我以前係洪興公司嘅，跟北角有機菜，有咩想知?趁我而家有心情講」
 
「同學，你有冇打過架呀?」
 
「你媽媽生多左個肺俾你呀?問埋哂呢D廢話嘅?有冇打架就當然有啦!我真係律敦治同東區常客黎架，通常都係去驗傷者，冇咩事，好!下一條」
 
「有冇俾人拉過?」
 
「呢條問題更廢，北角警署果陣係我俱樂部黎架嘛，有好多阿sir同我都好熟架啦」
 




「有冇入過臭格呀?」
 
「當然有啦，每晚仲有個蛋白炒飯、有水俾你飲添」
 
「咁你以前犯過咩法呀?」
 
「我呀…最犀利果次應該係……衰刑事毀壞、公眾地方行為不檢、傷人、拒捕、襲警，果次係差D上庭，仲好大機會入沙咀，果次係我第一次識驚」
 
「驚咩呀?」
 
問呢條問題嘅同學，係一個F.1仔，應該係打算出去跟大佬果D