那些年，我最愛的兩個女孩子: 32

Tiffany嘅破壞力果然驚人，返到屋企，詩敏仍然嬲爆爆咁樣，家姐見到都非常好奇
 
「詩敏，做咩事咁嬲呀?」
 
「頭先呀!!!有個女仔黎搵阿哥囉!!又背心短裙咁樣!!姣到呢」
 
「下?阿風你有人追呀?」家姐用一個好興奮嘅眼光望過黎
 
「我同佢都係一齊去溫書者，只係溫完食完野送佢返屋企咋，係咁多」
 




「我唔理呀!!!阿哥你唔可以同佢去街呀!!!」
 
「去..去街?我唔打算同佢去街喎」
 
詩敏聽到我咁講之後就非常開心，成個人撲過黎我到
 
「真係嘅?」
 
「係呀，我點會同佢單獨去街呢?」
 




「算你啦」
 
當詩敏自己跳去沖涼果時，家姐就埋黎搵我，我都知家姐想講咩架啦，一直以黎家姐都係企係媽咪果邊，即係希望我娶詩敏做老婆
 
「家姐，我知妳想講咩架啦，但係詩敏仲咁細個，而且契媽都講過……」
 
「我都明嘅，你始終係鍾意麵包妹，但係你真係唔會考慮下詩敏?反正你成日都同佢孖鋪」
 
「等佢大個D定D先啦，可能佢一升中學就有男仔追佢呢」
 




係平日冇波打嘅日子，我係會溫好耐書，而且由自修室返到屋企之後，我都係會自己繼續溫書，係未開始F.4嘅時間，我已經做緊Bio、chem同Geog嘅past paper，因為呢幾科比較容易入手
 
老老實實，我俾自己壓力真係好大，而且我仲經常頭痛，所以我書包入邊肯定有一包止痛藥或者感冒藥係到傍身，如果真係太攰，我會走去海邊果到吹海風，細個果時，爸爸除左會同我睇飛機之外，仲會帶我去釣魚，所以有一晚黃昏，我執返套釣魚工具出去，係海邊釣魚