「由你得到能力開始…你由能力中到底得到d乜?」

女班長既呢個問題令我諗左好長一段時間。

我由呢種超能力本質開始出發,我開始諗如果當日電腦顯示既廣告的確同呢個能力有關係,而又如我所想咁係有一個人將能力嫁予到我身上,一種可以藉其它人既眼去觀察世界既能力,佢當中既意義係咪就係好單純要由人地既角度去設身處想人地既景況?

咁當設身處想人地既景況之後,又有邊個去設想我既景況?

當我既景況就係受到世間好多種壓力,好多種仔細一諗係不公既情況之下,我甚至無憤世嫉俗去做一大奸大惡既事,我只係用另一種既方式,用一種人地會指罵我係仆街既方式去搵到可以比我容身既立腳點,而當中又不乏為身邊既人帶黎少少笑聲,唔通我係咪做錯左?





但係如果我所選擇既處世方法係錯既,咁又有邊種方法可以說服到我既通大倫大理大義大德,又能為渺小既我平反一點點既不公?

或者,呢個世界跟本並唔存在呢一種至高無上既思想。但係我可以同自己講,可以有一種情況係理解另一種思想既原因,明白對方堅持既原由,但係並無必要為之而改變自己,我可以謹守自己既思想而同另一種極端迴異既諗法平行並存,至少,我有呢個福氣未需要面對兩者無法並存既世界。

我忽然發現,或者我所鍾意既女班長,並唔係青春動人有白滑大腰34b胸圍我見如尤物既女仔,而係從未存在過,只係以一個虛幻概念存在,比網友戲稱為ff撚既東西。