我以為自己要孤獨一世，直到你出現: 第十六章-海傍

我同Cindy去咗附近既海傍散步，見到一對又一對情侶係到打卡影相，我同Cindy慢慢行，佢既情緒已經平復返。但係究竟我同Cindy而家係咩關係呢？仲有點解果晚佢會咁做呢？

「呀賢，頭先好多謝你呀」Cindy橋住我隻手，我個心突然跳得好快

「我講過會幫你架嘛」我笑住咁講，其實自已都覺得有啲難以至信，我竟然可以幫到佢

「係呢，其實你究竟係做7-11定地盤架？」Cindy突然開口問我

「why not both！」我將我既事講一五一十話比Cindy知，當然啦，除咗Chris住係我屋企同我做咗Chris既PTBF呢兩件事冇講之外



「嘩！你都幾慘喎，我都仲有個爸爸可以靠」 Cindy一講起佢爸爸就笑到4萬咁口

「咁你爸爸呢？」今次咁問實無死啦，不過果晚唔見佢爸爸既？

「佢去咗美國做生意呀，不過佢一年都番黎兩三次」同我差唔多，長期都係自己一個，屌！唔怪之得佢可以住咁大屋啦，原來有父幹！

「咕～咕」突然有個肚打鼓既聲音，我望住Cindy 

「我......」Cindy摸住個肚好尷尬咁笑，係喎，我地都未食野架喎



「你等等我啦，轉頭番」我跑咗去最近既7-11

一入到去立刻去凍櫃睇吓有冇咩食先，沙律定飯團好呢？我再望一下個價錢，飯團好似好cheap喎，Cindy唔似會食呢啲野，咁一於係你啦買盒沙律，靚女都鐘意食呢啲貴又唔飽肚既野，我比完錢之後就一支箭返去

「咦？！你隻手係後面收埋咩呀？」Cindy好奇待咁問

「凳！凳！凳！你睇下」我將放係背後面既沙律攞出黎

「嘩！有野食啦」Cindy都好開心



我遞盒沙律比Cindy，Cindy都挨住我，我地一邊望住個海景食野，一邊傾計，Cindy好快就食完啦，佢都應該幾肚餓

「呀賢望呢邊呀！」Cindy舉手機出黎自拍

手機螢幕中既Cindy笑得好甜，塊面不斷挨近我，近到就黎面貼面，我個心跳得快，快到就黎跳出黎啦！我都唔明，明明我地都上過床，但而家面貼面都已經令到我緊張到爆

「咔～咔～咔」Cindy禁住快門制，連環快拍幾廿張

「你睇吓你個傻仔樣」Cindy睇番啲相，指住相中既我係到笑

之後我地繼續坐係到Cindy輕輕挨係我膊頭，我地一齊望住海景，聽住海聲，海浪一下一下拍打岸邊，我地都合埋雙眼，好好享受呢一刻既平靜

我望一望手機，原來咁夜啦。我提議不如走，因為聽日我仲要返工，我地慢慢行番去攞車，Cindy全程橋住我隻手，行過既男人都雙眼發光咁望住Cindy，原來拖住個靚女出街係咁爽

「上車啦，我車埋你啦～」Cindy拍一拍車頭蓋示意我都一齊上車



「唔洗啦，我自己番去得架啦」我係行人路到講

「咁你過黎啦，我有野同你講」究竟有咩野講要咁秘密呀，我去車窗旁邊

「呀賢，多謝你呀～」Cindy捉住我衫領扯我上半身入車係我耳邊講，錫咗我個咀一啖之後就開車走咗，淨低我呆住咁慢慢退番上行人路，望住Cindy架車走。我突然醒起！唔記得問佢攞電話呀.........

我番屋企門口慢慢打開門，細細力拎對鞋放上鞋架，用腳尖黎移動去房，細細力打開門，係條罅仔入面望入去，Chris背向門口應該訓咗

「高賢！」我打開衣櫃搵緊衫，突然聽到

「Chris？！」我擰轉頭望，Chris起咗身用好恐怖既眼神望住我

「咩事呀～」我嚇到擰番正個頭向衣櫃，繼續搵衫



「你去咗邊呀？」Chris用好惡既語氣問

「都話朋友有啲事囉～」我講果陣有啲心虛，Cindy都算係朋友掛？

「你個朋友係男定女呀？」咦！有袋既？攞出黎睇下先，係枕頭喎

「Chris，點解有袋野係度既，你買比我架？」我諗住轉下話題，當我擰轉頭，見到Chris瞓緊一個一模一樣嘅枕頭

「買一送一呀，你果個送架」Chris一路講一路好快眨眼，一睇就知係唔識講大話既人啦

我攞個枕頭出黎，見到袋入面有張白色紙，我攞起黎睇，係收據黎架喎

「單件售價 $399，真係咩？」我笑住咁攞住張單對向Chris

「我話係就係啦」Chris講完之後，瞓返落床擰轉面



「多謝你呀Chris，你聽晚得唔得閒呀？請你食飯多謝你」我見Chris冇啦啦送咗個枕頭俾我，邊好意思呀

我沖完涼訓係沙發望住天花板，諗起Cindy屋企果個星空天花板同呢兩日發生既事，開始不停亂咁諗嘢，越諗越精神，究竟佢係純粹果晚寂寞所以搵人陪定點呢？明明佢可以用send相作為藉口攞我電話架？究竟係點呀！我個心好亂呀！