「記得早啲番呀」Cindy係車窗伸個頭出黎錫我塊面一啖

「知啦,拜拜」我同Cindy講拜拜之後,就係走咗入地盤

頭先Cindy咁明目張膽咁揸架GTR係地盤附近同埋錫我,開始擔心會唔怕比識既人見到,或者係Chris返工見到架?!

「早晨,呀賢~」我擰轉身低頭望,原來係Chris呀,真係朝早唔好講人呀!佢好似心情唔錯

「早晨,Chris」



「係呢,今日晏就一唔一齊食飯呀?」嘩!佢估唔到佢會主動約我呀!咁又係既,我同係果晚.....

「唔啦,有呀俊係到~」都係拒絕好少少,保持而家呢個距離啱啱好,如果同佢有再進一步感情,都唔知點算

「佢陪唔到你呀,呀俊今日比我調走咗去其他場」睇黎Chris比曬機會自己同我食飯喎

「咁好啦」我唯有尷尷尬尬咁笑住應承,連唯一既籍口都冇埋...

「咁樣...我地轉頭見啦」Chris講完之後就開開心心咁行走咗



灰撚咗!點解每次需要呀俊既時候佢都消失傢,雖然佢今次比Chris調走...今日冇咗呀俊係到同我傾偈,時間都過得特別慢咗

轉眼間,夠鐘去面對Chris啦。我好慢咁行番架步,呢排都好怕佢會講返起「果晚」

「你黎啦」Chris好似一早就係架步門口等緊我....

「好快好快!你等等我」我沖入架步嗱嗱聲放低啲嘢,淨係攞銀包同電話就衝番出去,費事俾人見到我同Chris出去啦

「咁我地食咩好呀~」Chris好期待咁望住我問



「咁不如食陳記」陳記咁多人等位,食完都嗱嗱臨走,而家呢段時間不宜同Chris獨處咁耐呀

「好呀」Chris講完之後諗住拖我手,好彩我一早兩手插袋,佢見到之後就縮返手

我同Chris黎就到陳記,坐低唔夠兩秒就有個閪口閪面既呀姐已經過黎放底餐牌,但唔走係度等我地落單,我同Chris費事比人屌,於是餐牌都冇睇就叫咗茶餐廳都一定有既,乾炒牛河同星洲炒米

「係呢」我地同時開口講野,我諗住開口講工事,費時有時會比佢講其他野啦,點知佢又咁啱開口喎

「你先啦~」唉,點都要有小小gentleman既,比佢講先啦~

「我幫你說服左老細加人工呀!」咩話呀!竟然得咗,老細果晚一啲表情都冇,我仲諗住一定衰硬

「係咪架?得咗啦!」到呢一刻我都有少少唔相信,睇黎Chris係老細心目中都有少少分量

「個晚,老細佢.......」我開始講番同老細食野個晚啲野



我地一邊講一邊食野越講越投入,到最後發現原來「我同佢個晚既事」唔講起,同佢既相處其實都冇咩問題,仲覺得相處得幾舒服,當我地食完之後就一齊番到工盤

無驚冇險又到放工啦,呢排為左可以一收工就見到Cindy,我連兼職都冇返。無計啦,陪住我既女神重要啲呀。

收咗工之後,我就好快換好衫走出地盤,因為唔洗等埋呀俊呀!仲有我好心急想話比Cindy知我加咗人工

「我番黎啦!Cindy~」我一入到門口就大叫

「咦?番黎啦,你今日好似咁開心」Cindy係房走出黎講

「係呀!我加咗人工呀!!!」我興奮到大叫咗出黎

「係咪架!咁不如今晚食餐好既」Cindy行過黎攬住我



「好呀」之後我同Cindy一齊番房換衫

我換咗件白色T,下身住咗9分黑色褲,加多件牛仔褸,都幾有型!而Cindy著咗銀色吊帶裙,淺淺既事業線若隱若現,我望到差啲流鼻血呀!仲襯咗個手袋仔同高踭鞋,變左佢高過我

「咁我地行囉~」我伸出手踭,準備比Cindy橋住

「等等~」Cindy係鞋櫃攞出平低鞋換上

「完美~咁就得啦~」Cindy平視望一望我,唔通佢係就番我?

Cindy依舊揸住部GTR出入,我上到車冇幾耐就開始播歌,等架車有少少情調,我同Cindy一齊跟住啲歌一齊唱,成個氣氛都變得好愉快

話咁快就到咗尖沙咀,Cindy慢慢將車駛入去酒店,唔通佢又想大戰?但係想大戰係屋企咪得囉,我好似諗多咗啦.....

Cindy泊好車之後,有個staff走埋黎幫架車登記,之後我同Cindy一齊搭lift上去,嘩!個大堂裝修金碧輝煌,吊住水晶大吊燈,令裝修去到另外一個層次



「兩位呀,唔該~」Cindy帶到我去一間燈光暗暗地,但都幾有情調既餐廳,入到每一張枱上面都會有一支蠟燭,勉強勉強強見到對方個樣,而且每個客人講野仲好細聲添

我諗住伸手拉凳坐低嘅時候,有位侍應幫我拉仲用手示意我張凳既前面,我去到張凳嘅前面,佢慢慢向我既方向推,而我慢慢順住坐低

我坐低之後周圍望,附近都係一啲穿着西裝既專業人士,或者著到好正式既女士,望返自己只係著住牛仔褸既公屋仔,我好似... 同呢到格格不入

「先生小姐,睇吓食咩呀?」侍應慢慢放低餐牌之後就離開咗

「不如我話事食咩啦」Cindy見我望住個餐牌唔知想點,就開口問

「嗯,好呀」

Cindy點咗幾個菜,都係用英文名同侍應落單。過咗一陣,侍應擺低餐包同埋羅宋湯,我同Cindy一路食一路細細聲講,就好似情侶出街食飯咁



食完甜品之後我示意侍應埋單,張單一過到黎,我打開!「$4899」我心入面話嘩一聲,唔怪之得咁好味啦,原來係咁貴架

當我數緊銀包夠唔夠錢既時候,侍應雖然一直微笑咁等我,但睇得出佢等到好唔耐煩,仆街!真係唔夠錢.....

「唔使搵張卡啦,你張信用卡係我度呀」Cindy對住我打眼色,侍應都走去Cindy果邊,埋完單我地就行出酒店

「頭先餐飯錢我番到去比番你呀」邊好意思叫佢請呀,話明係我加人工喎,雖然餐飯已經係係我人工三分之一,但係Cindy面對點可以咁樣衰

「傻既咩~我請你當慶祝你升職啦」Cindy果然係好女仔!!!比埋個落台階我

「咁好啦」我唯有應承佢啦,遲啲再出糧嘅時候買返樣野俾佢補數

「時間咁早。你諗住帶我去邊呀~」Cindy隻眼發晒光,好似細佬女期待老豆會帶佢去邊度玩咁

「呀!有啦」就去果到啦,佢應該冇去過既