我以為自己要孤獨一世，直到你出現: 第四十五章-到達

Cindy慢慢將車揸入停車場，泊好車之後，我就將兩個行李篋攞出黎。嘩！Cindy個行李篋洗唔洗咁重呀

「洗唔洗幫手呀？」Cindy見到我拖住兩個篋咁辛苦

「唔洗～我得㗎！」身為一個男人，只係兩個篋姐邊難到我呀

「好啦～我地行啦」Cindy行我旁邊，而我雙手就拖住兩個篋咁行去搭lift 

我同Cindy上到去客運大樓，第一時間就去航班資訊版睇下我地班機係邊個櫃位check in，Cindy好快就見到仲直接帶住我去，不愧為空姐，當將行李成功寄倉後，隻手終於可以拖住Cindy啦



「仲有咁多時間，不如我地食食少少野？」我拖住Cindy問

「不如食Pepper Lunch呀」Cindy講完之後就拖住我走向Pepper Lunch 

「好呀～」我最中意食Pepper lunch ，估唔到Cindy都諗住食

我點咗珍寶黑椒牛肉飯，唔叫珍寶邊對得住自己呀，平時番工咁辛苦，Cindy就叫咗黑椒三文魚飯

「小姐呢邊有冇人坐架？」攞住兩個飯行到Cindy前面



「有呀～我男朋友坐架」Cindy都接我戲答

「食飯啦～女朋友」我擺低兩個飯之後坐低咗

「知啦男朋友～呀」Cind用匙羹潷起一啖飯，吹凍佢，再遞到我面前 

真係好好味呀！唔知係咪太耐冇食，呢一啖係特別好味，我禮尚往來餵返Cindy食，佢食完之後露出好滿足既笑容

食完飯之後，我地見仲未夠鐘入去，所以就係附近周圍行吓，同幾年前我黎機場送機真係相差好遠，舖頭都已經變咗好多，唯一不變既依然都有一間迪士尼專門店，我同Cindy行左入去



「我地可以入去先啦」Cindy 睇一睇佢手上既Apple Watch

「好呀」我放低手上既毛公仔

我地去到離境大堂，其實我有少少緊張，唔知道個程序係點，又怕係Cindy面前會柒咗。好彩出境成個過程都冇事發生啫！

「唉.....」我地黎到準備登機時，先知道要delay兩個鐘先起飛呀！

「都預左會有咁既情況啦～嗱」Cindy係手袋到攞部手提電腦

「嘩！」我都估唔到佢有帶手提電腦出黎

有電腦就咁緊係睇Netflix啦！我地睇到未夠第三集就可以準備上機啦！係行入登機既走廊時，透過窗口望到成架飛機，真係好興奮同期待！話晒都係第一次搭飛機！

「先生，麻煩出示你既機票」一去到機艙門口，一個都幾靚既空姐問我，唔怪之得啲人聽到女仔做空姐一定會加分啦，因為係顏值分呀！



「吓～呀，呢到」我手忙腳亂係書包度攞返張機票出黎，又檢查......你驚我偷偷地上機咩

「係～麻煩晒你」個空姐檢查緊我張機票嘅時候，我唔覺意望到原來佢叫Bella，Bella檢查完之後就比返我啦

入到機艙入面，我會一直搵我地個位係邊到，但係根本集中唔到呀！啲空姐又高又靚呀！行去坐位既沿途啲空姐都對住我笑同打招呼，好享受呢一刻

「呢到呀～」當我不斷向後行既時候睇吓仲有冇空姐時，Cindy突然扯住我

「嗯」我坐咗係近走廊既位，而Cindy就坐咗係窗口位，雖然啲空姐都幾靚，但係同Cindy根本冇得比！

冇耐之後就有廣播，叫我地扣好安全帶同收番起凳後面既枱。原有起飛果陣時個感覺都幾得意，好似玩緊室內機動遊戲咁樣，當飛機穩定既時候我望住個窗，見到香港變得越黎越細

「先生，coffee or tea？」有一個空姐行過黎問我，我望真啲，原來係Bella對住我笑



「我要tea～唔該」我都露出笑容對住Bella 

「Cindy～你....要....咩...呀...」我擰轉面諗住問Cindy，點知佢黑晒面.....

「我唔要！」Cindy講完之後挨着窗邊

「嗯」Bella尷尷尬尬講完之後就走咗啦

「Cindy～做咩呀，唔舒服呀？」我諗住拉一拉Cindy挨住我

「冇野呀！」Cindy推開左我，話冇野即係有野啦，佢上機之前都冇乜野架，唔通係因為Bella....

「對唔住呀，我唔應該對住其他女仔笑到咁」我夾硬拉住Cindy挨住我

「你做咩唔問人哋攞埋電話呀！」Cindy打咗我一下，果然真係小小事都呷醋，睇來我以後都要小心啲先得啦～



「唔係呀～我淨係鍾意你咋嘛，其他個啲我邊睇得上眼呀」Cindy聽完之後都好似冇乜反應，點算呀？有啦

「老婆仔～唔好嬲啦～」我吞咗啖口水，慢慢靠近佢耳邊講，雖然好羞恥play，但係希望佢受

「你叫我咩話？聽唔到喎」Cindy聽完之後冷笑左一下，將隻手擺係耳仔邊講，睇黎佢受喎！

「老婆仔～」我再次係佢耳邊大聲少少講

「算你啦～冇下次呀！」Cindy講完之後挨住我

唔知咪第一次搭飛機，機上面既好多人都訓著咗，而我反而精神奕奕，望向窗邊全黑咩都睇唔到，Cindy又訓咗，冇人同我傾下計。過咗唔知幾耐，咦？！窗邊有啲藍色光喎，我望真啲係一排排嘅藍色光呀，應該係信號燈黎，我地到啦！