我以為自己要孤獨一世，直到你出現: 第五十一章-離開

「嘭～啪」咩聲呀？點解咁嘈既，我慢慢擘開雙眼，係迷糊之下見到有人影好急咁行來行去，我捽一捽眼睇清啲，原來係Cindy係到執緊行李篋呀？！

「Cindy～我地唔係後日先走咩？」我落床走到Cindy身邊好奇咁問佢

「我爸爸係美國果邊有事，我要趕住番去睇佢！」Cindy望都冇望我，淨係掛住執篋，睇黎佢好心急！

「你過兩日要自己番香港先」吓！突如其來既消息令到我反應唔切

「咁你幾時番呀？」我痞低攬住Cindy好唔捨得佢，雖然我唔想佢突然離開我，但係世伯有事佢冇得唔趕住走......



「我一搞掂就會番黎架啦，好冇？」Cindy錫咗我一啖，摸咗我個頭一吓，之後就繼續忙住執行李

「嗯！」我點頭回應，我好失落咁企住旁邊望住一直忙住執行李既Cindy

執好行李之後，我跟埋Cindy一齊去機場，上到車之後Cindy一隻手揸車，另一手同我十指緊扣。我感覺到佢好緊張仲有腳踩實油門不斷比油，見到佢咁樣，我係旁邊一句聲都唔敢出，只係靜靜地望住佢既側面，我好想同佢講：我好唔捨得佢走呀！但係我可以點做呀，如果真係同佢講，只會令到佢更加難受......

我地好快就黎到機場，我同Cindy將行李寄倉之後，就一齊行到去離境大堂門口，我知道Cindy都好唔捨得我，臨入去之前Cindy望一望手錶，然後係個袋度唔知摷緊啲咩

「嗱，攞住佢，見到中意既野就買，唔洗同我慳傢」Cindy係佢個手袋到攞咗張信用卡出黎遞比我



「唔要！我淨係要你唔好走呀！」我推開咗Cindy隻手，用力攬到佢實一實，我最後忍唔住

「你乖啦～老公仔」Cindy輕輕拍我背脊

我一聽到Cindy叫我做老公仔，個心就放軟咗，好似有股魔力，難怪我一叫老婆仔，佢就咩都應承我啦，有啦！

「老～」Cindy即刻暗住我個口，向我搖頭

「你乖啦，好冇？」Cindy不斷摸我個頭安慰我



「唉，好啦～」我嘆一啖氣，冇理由咁自私既

我同Cindy深深對望之後錫咗一啖，佢慢慢走入去，我望住佢既背影，途中佢擰轉面用好唔捨得既表情望住我，我夾硬露出笑容，等佢唔洗擔心我。

我搵左張櫈坐低咗，反正JR都未有車，而且今晚先有飛機，而家仲有一日時間去邊到好呢？突然諗到我有一個地方未去過架，就係毒撚最愛既地方秋～葉～原～

「噹！」我部手機發出鈴聲，係Cindy呀！

「我上到機啦✈️✈️」Cindy send咗係機上影果張相比我

「放心啦，我會照顧好自己同埋會乖乖地等你番黎架啦😘😘」

「咁就乖啦🥰🥰」

「你睇下我icon」



我按入Cindy個icon，原來Cindy用咗我地係迪士尼影果張相做icon呀！我都開心到爭啲彈起身，我都轉用呢張相做icon，等我掛住Cindy嘅時候就可以攞出嚟睇吓

「飛機要起飛啦，我去到美國再搵你啦😘😘」

「好呀😍😍」

Cindy好快就off咗，我就走去買飛，呢次我醒目啦，事前係Google Translate打好晒我要做啲咩，然之後再翻譯比個員工睇，員工點咗幾下頭，應該知我要咩既，好快員工就俾咗張車飛我，得咗啦！

雖然冇咗Cindy係身邊，我都要好好enjoy剩低既時間！

我興奮地咁行入去搭JR，我將張車票擺落衫袋，咦？！係Cindy張信用卡呀！點解仲係到既，一定係佢靜靜雞放咗落我個袋到，正一傻瓜黎～

有JR啦！準備向秋葉原出發，唔知秋葉原係點既呢！