我以為自己要孤獨一世，直到你出現: 第五十三章-暫住

「呀賢！起身番工啦」我擘大眼見到Chris拍緊我塊面

醒左之後我第一時間望一望電話，

係Cindy wts番黎呀！

「我到咗美國啦，你訓咗未呀？😉😉」

「嗯，我去廁所梳洗下先～」講完我就即刻攞部電話入廁所，入到廁所即刻反鎖道門，wts番Cindy



「尋晚返到香港都已經三四點啦🥺🥺」

「世伯點呀？😭😭」

我攞起牙刷，快速係咁刷～係咁刷，刷完之後就攞水杯漱口，順便洗埋面

「噹」係我部手機呀！

「而家去緊醫院😭😭」Cindy好快覆返我



「呀賢！要遲到啦」Chris係外面大力拍門叫竹

「知啦～知啦」我大聲回應番Chris

「咁你有咩消息再話我知啦，我要番工啦🙈🙈」我係臨出門口，send多個wts 比Cindy

我立即番房換好衫，著好鞋就出門口，行去巴士站搭車番工，途中不斷望住手機等緊Cindy覆我

「你係咪有心事呀？」Chris抬高頭望住我



「吓，冇呀！」可能係我太緊張Cindy啦，比Chris見到我個表情

我地一直行去巴士站，我feel到有野拖住我，我望一望，係Chris隻手呀！我唔記得插褲袋呀....

我望一望Chris，咁啱佢又望住我，佢即刻揼低頭，緊緊拖住我，唉！到底幾時同佢講清楚好呢，不過佢隻手都幾溫暖

「我走啦，今晚你番唔番黎呀？」佢一直拖住我去到門口

「番呀」反正都冇咩地方去，一於返屋企攬住兩隻小熊維尼啦！

我同Chris講拜拜之後佢就走咗，我一入到架步，咦？！個背影咁熟面口，係呀俊呀！

「喂，好耐冇見啦」拍一拍呀俊膊頭

「嗯，係你呀～」呀俊擰轉面過黎，嘩！咩事呀？佢個黑眼圈大到......



「你冇野呀？」我立即關心佢，唔通佢真係離咗緍，同咗個女仔一齊？但係冇理由咁樣架喎

「唉！係咁架」呀俊抖左一啖氣之後，一邊行一邊講

原來佢消失咗果幾日，就係比佢老婆知道左之後趕出門口，仲要財政大封鎖！佢原本諗住搵果個女仔幫手，但係果個女仔一聽到呀俊就冇錢就理都唔理佢

「咁你打算點呀？」我坐底咗係地下

「唉，我都唔知呀.....」呀俊都跟住我坐低係地下

「唉，錢都差唔多用晒係交租到」呀俊越講越細聲，我都唔知點樣幫到佢

「呀賢，你介唔介意收留我呀？」吓，面對呀俊突如其來既請求令我有啲不知所措



「un.....我」如果之前既我都可以收留佢既，但係Chris係屋企呀......

「吓？唔方便就由佢啦」呀俊仲好似越嚟越灰，屌！死就死啦

「好啦好啦」我迫於無奈答應咗呀俊，Chris應該會體諒我掛，況且佢呢排都幾順攤

「多謝你阿賢！」呀俊聽到我答應，即刻精神翻唔少。但而家到我唔知點算啦...