飯堂裡的同學都很關心剛剛回來的同學,吃飯的人都在議論紛紛。我感受到飯堂裡一陣陣的怒火,大家對於校方在這件事上的不滿。

「唉,叫外賣都唔比,Lunch可以食咩啊?」Emily說。

「佢都癡線,叫外賣唔可以前一日叫嘅,唔可以翻學前叫嘅,點證明係小息叫啊。雖然小息叫外賣係事實。」Kitty說。

這個時候Robin突然拿著飯盒走過來。

「Joyce,你仔仔黎搵你。」Kitty嘲笑著。





「朋友咋,咩仔仔啊。」我立刻澄清。

「有野搵你傾,過黎啊。」Robin細細聲講。

我拿著飯盒跟著他走到那個汽水機旁邊,那是在一望無際的飯堂裡比較隱蔽的地方。

「記名啲同學今日放學要見訓導老師,佢地會起活動室見。」Robin偷偷的說。

我說:「吓,咁我地係咪應該比班老師睇到,我地成班同學係支持佢地?」





「啱,如果佢夠膽佢罰佢地任何一個攞外賣嘅人,按照佢邏輯,佢就要罰曬我地全部食外賣嘅人。」Robin字字鏗鏘的說。

「但係咁短時間,我地點樣叫啲同學放學留低?」我問。

「唔……」

「我地搵左自己班會先,佢地應該識其他班會主席?」

「咁其他級呢?」





「我諗我地Form 4加埋都有幾十人,頂住先。」

「好,我地各自行事。」

跟Robin分別後,我回到飯堂,我班的班會主席Jessica還在吃飯。我很少跟班會主席講話,因為我們不熟,我不是在她的朋友圈子裡。
「Jessica,係咁嘅,今日幫我地攞外賣嘅同學咪比人記左名嘅,佢地今日放學會見訓導老師。佢地其實好冤枉,我地會唔會可以呼籲大家放學留低聲援佢地?」

「我都知道件事啊,都覺得我地都應該為佢地做翻啲野,始終佢地都係為我地服務而無辜受害。」Jessica說。

午飯時間差不多完結,大家都回到班房等待上課。

Jessica走到課室的前方,大聲的喊:「4D嘅同學,今日我地有同學因為攞外賣比人記名,話佢地小息用電話違反校規,但係校方冇證據證明,陣間放學佢地會去見訓導老師。我希望大家可以一齊去支持佢地。」

同學之間陷入討論,討論著放學會否去支持他們。





「會唔會連我地都比人記埋名嫁?我都係食個外賣姐。」

這些人總是先想到自己,因為過分的擔心而不願意為他人付出。

「我負責食姐,攞又唔係我,不如叫負責打電話叫嗰啲去啦。」

總有些人覺得自己可以置身事外,可以作為第三者坐享其成。

這些人總是不願共同承擔責任,這種人是自私的。

如果有同學因為幫我們取外賣而記過,我們這些只負責吃的人過意得去嗎?

幸好,這裡更多是清醒的同學。

「緊係要去啦,學校咁樣做擺明係想打壓外賣。」





「外賣個個都有份食,我地好應該付出翻少少野支持你班同學。」

我轉頭跟Kitty說:「陣間落堂我地去聲援啲同學。」

「當然要啦,雖然我都怕會比人記埋一份,但係今次呢啖氣真係哽唔落。」Kitty說。

我會心微笑,我的朋友都是有良心的人。
放學的時候,同學開始收拾書本散去。

「大家可以一齊去四樓活動室支持幾位同學。」Jessica在黑板前說道,然後她在班房門口逐一勸同學留下。

Kitty把Lily和Emily都拉了過來,她們也沒有多說什麼。準備一齊去的同學齊集黑板前,我數一數,應該有十幾個。

「我去一去隔離班先,陣間四樓見。」我跟Kitty說。





「又搵仔仔?」

「冇妳咁好氣。」我一臉無奈。