條女有鳩而我冇賓周: 12

「當電影放到一半，放映機由於過熱嘅關係，令到菲林燒溶咗。我哋俗稱：『斷片』— 冇咗畫面。人有時飲大咗都會斷片，你會唔記得咗自己做過啲咩嘢，發生過啲咩事。咁當然如果嗰單嘢你係特別唔想記得嘅話呢，仲會強逼自己嘅大腦斷片添。」—《低俗喜劇》（2012）

啱啱上堂瞌著咗嘅曦銘腦海中突然浮起低俗喜劇嘅台詞，佢捽一捽對眼，睡眼惺忪咁見其他同學陸續執嘢離開，自己都拎起背囊企翻起身。

「尋晚發生過啲咩事呢？」曦銘喃喃自語道：「我淨係記得自己食咗一餐飯，個番茄炒蛋幾好食…」佢摸一摸下巴，慨嘆自己嘅酒量退步咗唔少。

「咁除咗番茄炒蛋之外仲食咗啲咩呢…」曦銘認真咁回想尋晚嘅事，但係個頭突然開始痛起嚟，彷彿唔想佢繼續諗落去咁。

「喂！你喺度嘅？」曦銘好奇咁問道。佢行出演講廳後，見到浩俊企咗喺度等佢落堂。



浩俊冇出聲，直接由背囊度拎出一盒腸胃藥，然後遞俾曦銘。曦銘不明所以咁拎住盒腸胃藥，唔明白浩俊嘅用意。

「點解我要食嘅？」曦銘一臉疑惑咁問道，尋晚發生過嘅事對佢而言已經變得模糊不清。

「尋晚我阿媽煮咗牛歡喜。」浩俊理所當然咁講道：「你食完唔舒服。」雖然牛歡喜的確係李太會煮得出嘅餸，但曦銘聽完之後覺得有種講唔出口嘅怪異感。

「食飯？」浩俊問道，佢唔想曦銘繼續探究落去。

「哦…好呀…」曦銘心不在焉咁答道。



浩俊一下子搭住曦銘嘅膊頭往canteen嘅方向行過去，兩個人行行吓，曦銘突然聽到一把熟悉嘅聲。

「我屌佢個嘴啦，又周圍講我收兵！」個女仔怒氣冲冲咁對住電話講道，佢「屌」咗一聲就cut咗線。

曦銘見女仔嘅身形似曾相識，佢撥開浩俊嘅手，行去女仔嘅身後。

「月伶？」曦銘問道，對女仔啱啱嘅怒氣視若無睹。

「邊撚個…！啊！曦銘？！」月伶驚訝道。



月伶一開始仲處於暴怒嘅狀態，佢原本仲罵罵咧咧咁抱怨緊係邊個咁唔識時務。點知當佢轉身見到曦銘嗰陣，上一秒仲兇神惡煞嘅表情瞬間變得溫順起嚟微。

「你個學系唔係喺度㗎喎，等緊人呀？」曦銘一確認係月伶之後就忍唔住嘴角上揚，一下子將啱啱嘅疑惑拋諸腦後。

「哦，係呀～」月伶見自己嘅一臉變臉術成功咗，輕聲講道：「等緊朋友。」

月伶抬頭望咗一眼自己思念已久嘅師兄，然後又耷低頭，唔敢望得太明顯。

「哦，咁洗唔洗陪你等啊？」曦銘把聲變得溫柔起嚟，唔知點解佢想陪多月伶一陣。

「哦，好啊。」月伶嘅眼神游離不定，佢感覺到自己個心就快跳出嚟。

平日健談嘅曦銘喺呢一刻突然搵唔到話題，佢不知所措咁企喺月伶隔籬，兩個人默默無語咁喺牆邊等月伶嘅朋友。

「話時話…」曦銘慢悠悠咁講道。



「係？」月伶對曦銘要講嘅內容特別上心，佢頓時轉頭直視曦銘。

機緣巧合之下，嗰一刻曦銘真摯咁望住月伶，月伶亦碰巧抬頭望到曦銘。兩個人嘅視線相碰後即刻分開扮四圍望。

企喺兩個人後面嘅浩俊見氣氛變得尷尬起嚟，故意乾咳幾聲。

「係！介紹返，我朋友— 浩俊。咁呢位係我師妹月伶。」曦銘俾嗰幾聲乾咳扯返去現實。

「久仰大名」浩俊笑著咁對住月伶講道。

月伶敷衍咁「嗯」咗一聲，忽略咗浩俊嗰句說話。佢望咗浩俊一眼就重新將注意力放返喺曦銘身上。呢一刻，月伶希望穎怡可以再遲啲先到。

「其實，阿桃係邊個？」月伶忍唔住抬起頭凝視曦銘，迫切地喺對方嘅臉上讀出答案。



「呃……」曦銘望咗眼背後嘅浩俊，欲言又止：「一個朋友囉。」

唉，仲係咩都唔知。一盤冷水淋到月伶頭上，心中嘅疑團不但冇消散，更加混合住淡淡嘅愁緒。

「我見到朋友啦。」月伶輕聲細語道，佢唔自然咁將頭髮撥去耳背，同曦銘揮手告別。

「今晚打機？」曦銘問道，佢睇住月伶逐漸跑遠，忽然有啲唔捨得。

「佢終於肯主動啦！月伶聽到曦銘問佢嘅嗰一刻塊面紅哂，佢舉起手做咗個「OK」嘅手勢，然後繼續跑開。

「屌！點解你咁遲先嚟呀？」月伶見到穎怡嗰陣抱怨道：「我啱啱緊張到唔識講嘢啦！」

「下？係你話要喺曦銘上堂嗰度附近等㗎喎…」穎怡無奈咁講道：「我尋晚趕deadline趕到好夜先瞓，原諒下啦！」

好彩有阿桃幫手改咋，唔係嘅話我直程要通頂添。穎怡唔敢講出口，唯有喺心入面感激起救命恩人願意出手相助。



「走啦！我肚餓啦！」曦銘眼見月伶攬住咗另一個女仔，就放心咁轉身行返去canteen嗰度。

「嗯。」浩俊漫不經心咁答道，然後打咗個喊路。尋晚掛住幫驚驚趕deadline，搞到凌晨五點先瞓到。希望佢交得切啦。

浩俊喺走之前望多咗眼，感覺月伶隔籬嗰個女仔嘅身影有啲熟口熟面。