條女有鳩而我冇賓周: 21

「十二月二十號，距離出去又近咗一日。」穎怡望住手機螢幕，心入面惴惴不安。

自從尋日同月伶、海螢決定咗要廿三號出去後，穎怡就渾渾噩噩咁過咗半日，唔知道出到去應該點面對阿桃。

下晝一點半，拉麵舖內人聲鼎沸，唯獨係穎怡獨自一人坐喺角落頭度心不在焉咁碌緊手機。而喺屏幕嘅另外一邊，浩俊就望住同驚驚嘅Whatsapp對話，絞盡腦汁咁想同對方拉近距離。

阿桃：食咗飯未？

「呢個開場白真係好廢。」浩俊send出去嘅下一秒就開始後悔起嚟。



穎怡：食緊
阿桃：食咩飯？
穎怡：麵
阿桃：食咩麵？
穎怡：拉麵
阿桃：咁啱嘅我都係喎

「又咁啱得咁橋食同一樣嘢？」穎怡詫異道，佢影咗自己嗰碗拉麵send俾對方睇。

「算啦，可能佢啱啱係唔記得覆。」浩俊收到驚驚張相嗰陣心情變得愉悅起嚟，佢硬係覺得對方嗰碗拉麵比起自己嗰碗更加吸引人。



穎怡：有冇加辣？
阿桃：冇

浩俊本來習慣食飯嗰陣唔會睇手機，今日佢卻一反常態，對眼不斷咁望去手機嘅方向。當佢收到驚驚嘅Message嗰陣，心頭一喜，但係又唔想顯得自己對對方太上心。

穎怡：食唔食筍？
阿桃：唔食
穎怡：點解嘅？
阿桃：食唔到辣，唔鍾意食筍


穎怡：咁啱嘅我同你一樣喎

「哇！佢係咪抄我？」穎怡邊大快朵頤，邊回覆桃味糖。佢一直都俾人嫌棄自己揀飲擇食，好少會遇到同樣走筍嘅同伴。

「下一句會唔會就係問你喜歡孔子嗎？」浩俊將電話放返入褲袋，嘴角染上笑意。

穎怡一諗到過幾日就要面對桃味糖，心情就變得複雜起嚟。佢嘆咗口氣，繼續默默咁進食。

穎怡：自己一個食緊？

穎怡望住隔籬枱一齊食飯嘅幾個女仔，開始羨慕起佢哋。

阿桃：係呀，自己一個食唔好咩？
阿桃：又唔洗應酬人，自己想食咩都得



浩俊望到驚驚嘅message嘅時候，理所當然咁答道。佢喺現實生活中比較寡言，亦懶得同人社交，淨係得曦銘會同佢保持聯絡，所以佢從來唔介意要自己一個食飯。

穎怡：但係有時都幾寂寞

穎怡收到阿桃嘅回覆嗰陣，亦都覺得對方講得有道理，然而佢實際上冇想像中咁鍾意做獨行俠。

阿桃：唔緊要架，我而家都陪緊你啦

浩俊感受到驚驚嘅情緒，罕有地開始安慰對方。

喺螢幕嘅另外一邊，穎怡彷彿望到一個同自己年紀相若嘅女仔，坐喺自己對面，同自己相談甚歡。

穎怡：醒目，我陪傾偈唔收錢架～

浩俊見到驚驚同佢開返玩笑嗰陣，個心終於安樂返。



兩個人由嘢食到打機到八卦，一來一回咁喺Whatsapp度傾偈，轉眼間就到下晝六點。穎怡行到屋企樓下公園嗰陣，咁啱望到日落嗰一刻。

穎怡：你望吓個天

拎住兩袋餸嘅浩俊見到message之後，即刻抬頭望上去— 黃昏時份嘅太陽格外溫暖，橘紅色嘅晚霞斑斑駁駁咁灑落地下。浩俊企咗喺街邊，忍唔住對住夕陽影咗張相send俾驚驚。

阿桃：有冇我地一齊睇日落嘅感覺呢？

「下？呢度咪我附近？」穎怡見到阿桃嗰張相後，眉頭頓時皺埋一齊。

阿桃影相嘅地方正正就隔穎怡兩條街左右，穎怡此時此刻有種即刻同對方相認嘅衝動。但係佢一望到手機上面自己嘅倒影，就垂頭喪氣咁打消咗個念頭。

穎怡：有啊！



「點解明明你離我咁近，但又感覺好似隔咗成個宇宙咁呢？」穎怡喺Whatsapp度附和完阿桃嗰句說話之後，感覺自己同阿桃之間好似隔咗層紗咁。。

穎怡同浩俊就咁各自帶住遺憾咁行返屋企。

一直以嚟，穎怡喺遊戲上已經習慣咗講大話嘅日常。然而隨住阿桃同佢行得愈嚟愈近，佢嘅心情亦都開始變得複雜起嚟。

「如果可以永遠停留喺呢一刻就好啦。」浩俊喺心入面諗道。一直喺網上面扮女仔整蠱人嘅浩俊，竟然會希望時間可以過得慢啲，無限推遲要同驚驚坦白自己身份嘅嗰一日。