「唔係,建議你唔好自視過高。」穎怡加重語氣咁講道,即刻移開視線,唔想再俾浩俊捉到痛腳。

明明生得咁好睇,但係把口臭過屎渠……真係寧願佢唔開口講嘢。穎怡喺內心反咗個白眼。

「咁你之前又偷影我?」浩俊饒有趣味咁望住穎怡,期待緊對方又會諗到咩新藉口。

雖然之前浩俊都試過俾其他人偷拍,但影完仲會開口同自己講嘢嘅人……得企喺對面嘅奇行種先會咁做。

而自己又出乎意料地對隻奇行種有興趣…



「誤會嚟。」穎怡下意識咁拉高口罩:「我只不過諗住你嗰件衫好睇,所以先諗住影低。」

冇錯,我絕對淨係影緊佢當時著緊嘅嗰件衫!絕對唔係因為靚仔而偷影!穎怡使出自欺欺人大法,開始不斷幫自己洗腦。

「係呀?」浩俊打算追問落去:「咁點解你又唔直接問我嘅?」

今次就睇你點解釋。浩俊喺內心不屑咁笑道,你今鋪仲唔死?

「你記唔記得我當時諗住同你講嘢?」穎怡理直氣壯咁解釋道:「其實嗰陣我係諗住問你架,係之後趕住落車所以就問唔成。」



今次到浩俊無言以對。自己都係第一次見人將偷拍呢件事講得咁清新脫俗。

之前咁寸啊嗱?想當年我返學遲到,作嘅藉口多到可以出書啦!穎怡望到浩俊吃虧嘅模樣,內心忍唔住仰天長笑幾聲。

「你Game入面嗰張icon邊度嚟?」穎怡見氣氛開始緩和,主動問道:「睇個款又唔似係網上面偷返嚟。」

如果係偷圖嘅話,我一早靠Google大神幫我查個水落石出…穎怡內心唔忿氣咁諗道。

「上年同讀U嗰啲朋友一齊玩,賭輸咗。」浩俊無奈咁講道:「佢哋幫我影。」



「哦…」穎怡漫不經心地回應道。

浩俊冷冷咁喺穎怡身上掃咗眼:「你對我咁有興趣做咩?」

浩俊作為口硬心軟嘅佼佼者,自然唔願意將內心興奮嘅情緒表露無遺,唯有裝作若無其事。

「下?」穎怡一時間反應唔切,冇諗過浩俊冷漠嘅外表下竟然係一隻小學雞。

「行啦,到啦。」浩俊喺車廂外不耐煩咁催促道,穎怡回過神先發現已經差唔多到目的地。

睇嚟真係好難相處,今次出完去之後都係少接觸為妙…穎怡用住望奇珍異獸嘅眼光去打量浩俊。

但係佢Year幾呢?讀咩呢?點解咁靚仔都冇人講過嘅?定係自己太孤陋寡聞?穎怡嘅內心逐漸產生更多嘅疑問。

浩俊喺穎怡望向其他地方嘅時候目光炯炯咁凝視住對方,從來都冇諗過會重新以呢種方式遇見穎怡。
已有 0 人追稿