條女有鳩而我冇賓周: 0

二零一五年，夏。

網吧入面充斥住專屬年輕人嘅鼓噪，大部份人右手揸住滑鼠，左手喺鍵盤上面飛舞，通通變身成碧血丹心嘅戰士，幻想自己喺戰場上大開殺戒。

「屌你嘈撚到。」喺網吧嘅某一角，一個十六七歲嘅少年托住頭打量周遭嘅環境，佢滿臉不耐煩咁「嘖」咗聲：「又唔係叫完就會勁啲。」

對性格孤僻嘅少年而言，如果有得揀嘅話，佢絕對會留喺屋企靜靜哋打機算。

如果唔係屋企部電腦壞咗……少年愈諗愈煩躁，佢憤然除低耳機，放棄面前嘅遊戲。



佢右手扇動住衣領，嘗試俾頭上嘅冷氣吹熄內心嘅煩悶。網吧嘅喧鬧同自己基本上係水火不容，人哋口中所謂嘅滿腔熱血只不過係正值青春期時躁動不安嘅荷爾蒙作祟。

「都係打多鋪就算。」少年自知唔適合熱鬧嘅場所，佢自討沒趣咁抿抿嘴，決定坐多陣就打道回府。

然而，喺少年打算戴返耳機投身於網絡世界嘅嗰一刻，一把同網吧格格不入嘅聲線引起佢嘅注意力。

「咩…咩話？你唔鍾意我？」一個坐喺少年後邊嘅女仔嗚咽道，對方清脆嘅聲線同網吧內沙啞嘅叫囂聲大相逕庭，少年好奇咁擰轉頭看個究竟，但佢冇辦法睇清楚對方嘅表情。

超。咪又係網戀失敗。少年已經推論出件事嘅大概，佢一開始仲以為有啲咩特別添。



少年擰返轉頭，全神貫注咁望住幽幽發光嘅電腦螢幕，再一次打算戴返耳機。

「我…我理得你係咩人妖啫！總之我就係鍾意你，我唔理！」女仔啜泣道，佢激動嘅聲音彷彿下秒就劃破少年嘅耳膜。

咦，睇嚟係我太過急，唔可以太快落定論住。少年戚一戚眉，佢又望去身後嘅女仔。

即使少年看似冷淡得對任何事都不聞不問，但實際上女仔嘅眼淚就係佢嘅弱點。

「無論你係男定女都好，我就係鍾意你呢個人啊。」女仔一口氣㩒熄螢幕上所有視窗，側身喺背囊入面摷出一嚿用過嘅紙巾。



「屌！」女仔嘅眼淚好似扭開水龍頭咁，淚水不停咁跌落背囊上。佢不知所措咁用力抹走臉上嘅淚水，紅通通嘅面珠墩好似俾人劃花咗咁。

女仔喊到氣羅氣喘，令旁觀嘅少年目瞪口呆，唔知道點反應好。

「你望乜鳩？」女仔感受到少年嘅視線，佢啜泣住講道：「你係咪又要笑埋我一份？」

少年一時間膛目結舌，佢手忙腳亂咁喺褲袋度摷到一包紙巾，然後拋去女仔嗰張電腦枱度。

「我唔需要你嘅同情。」女仔嘴上拒絕少年嘅好意，一邊拆開佢包紙巾，飛快咁抹走啲淚水。

目擊住女仔自相矛盾嘅少年笑咗出聲，佢感覺對方就好似死要面嘅一隻狗仔，明知自己柒咗都要亂吠。

「網絡人妖啫。有幾稀奇呀？」少年唔忍心再見到女子泣不成聲，佢當時衝口而出：「我都係網絡人妖啦。」

其實唔係。少年只不過係隨便作咗個藉口，笨拙地嘗試安慰哭成淚人嘅女仔。



「關我撚事。」女子聽完之後呆咗呆，然後將包紙巾一下子揼去少年塊面。

「小學雞。」女仔企起身抹多次殘留嘅淚水，一去不回頭咁離開網吧。

「暴力狂，郁啲就搵嘢揼人。」少年嘴上嫌棄住女仔嘅行為，但嘴邊不自覺咁染上笑意。

咁睇嚟去網吧打機嘅體驗都唔係咁差啫。少年若有所思咁摸一摸下巴，終於戴返耳機，重新投入於遊戲世界之中。

希望下次嚟嗰陣可以見到個女仔開開心心嘅樣。少年臨開場前想道。