條女有鳩而我冇賓周: 50

病咗嗰陣時間總會過得特別快，一吞藥嗰刻就好似同張床之間綁咗個死結咁，昏沉間唔知渡過幾多個鐘。穎怡起身嗰陣發現自己足足瞓咗一日半，眨眼間就到咗十二月三十一號。

雖然穎怡唔係注重儀式感嘅人，但每年除夕都會騰出時間留俾月伶同海螢，同朋友倒數總比對住親戚強顏歡笑更輕鬆。

但今年有啲唔同。

月伶尋日喺Whatsapp group主動承認自己重色輕友，毅然打斷連續五年一齊倒數嘅習俗，選擇同曦銘二人世界。

而食完藥瞓到豬頭咁嘅穎怡自然今朝先睇到個message，完美錯過聲討月伶嘅大好機會。



於是今年就得返穎怡同海螢兩個人你眼望我眼。

事實上穎怡早就有心理準備，即使唔齊人，至少都有個人陪自己出去避風頭。穎怡下一秒就私底下向海螢確認今晚要一齊倒數嘅事。

海螢：對唔住呀大佬我見你尋晚冇覆，以為你都唔出。
海螢：Parttime報咗更要今晚返工呀

「下…」病好之後把聲終於唔再沙啞，穎怡坐咗喺床上面嘆咗口氣，感覺間房零舍空蕩蕩。

臨急臨忙搵邊個好呢？手指毫無方向咁喺螢幕上面滑動，缺乏勇氣去㩒入任何一個對話紀錄。穎怡忽然發現原來自己社交圈子細得可憐，叫小明胖虎出去亦只會得到「不如打住機倒數」嘅回應。



海螢：不如我哋開住Facetime倒數呀？

海螢嗰邊似乎感受到穎怡嘅無奈同苦惱，嘗試去作出補救。可惜亡羊補牢，穎怡一諗到自己要喺公園同部電話倒數就尷尬到即刻拒絕對方。

電話畫面重新碌到頂端，穎怡一眼就注意到第二則對話就係浩俊早幾一兩個鐘send過嚟嘅問候。

最近同浩俊傾偈變得愈來愈頻繁，對方嘅關心亦都未去到令自己厭煩嘅地步。所有嘢好似去到浩俊身上都變得合乎情理— 穎怡開始意識到浩俊嘅與眾不同。

可能係因為生得好睇掛？穎怡回想起當時同浩俊擔同一把遮嘅經歷，雙頰微微泛熱。



要唔要問佢有冇約人呢？穎怡從來都未試過同異性一齊倒數，不禁擔心起會唔會係曖昧嘅舉動。但係同朋友出街係再也普通不過嘅事…

大前日嘅事不斷喺腦海中閃過，令穎怡心煩意亂，手下嘅棉被捲成一團。

到底係咪自己未完全病好呢？點解連send個message都可以諗咁耐？

浩俊：做咩事？

穎怡嗰邊似乎猶豫太耐，令另一邊嘅浩俊發現對方「輸入中」嘅狀態已經維持咗好幾分鐘。

短短三隻字彷彿終結一切胡思亂想，睇穿穎怡嘅所有心思，穎怡好似做賊俾人捉到咁，不禁心虛起嚟。

唉，死就死啦！



穎怡：今晚有冇興趣一齊倒數？

浩俊收到message嗰陣恨不得即刻喺張櫈度跳起嚟，短短一個星期唔單止可以見到穎怡三次，仲可以一齊倒數— 全身上下嘅細胞都喺度尖叫住「有興趣呀！」，但理智喝止奔騰嘅心跳聲。

浩俊：可以
浩俊：到時喺樓下等你？

顯得太雀躍嘅話只會令對方覺得自己係奇奇怪怪嘅人。浩俊最後一刻選擇裝作冷靜咁回應對方，佢不禁審視自己上一秒興奮過頭嘅反應— 明明自己平日寧願留喺屋企都唔想出去，點解而家反而會因為見得人多而心情好呢？