夜晚九點,穎怡摸住微微鼓起嘅小腹一臉滿足地行返房。阿媽煮嘅番茄炒蛋真係世界第一,穎怡不禁喺內心稱讚楊師奶嘅廚藝。

唔知會唔會遇到阿桃呢?今日一定要拎到佢嘅電話號碼。穎怡㩒著螢幕前諗道,尋晚月伶已經就穎怡辦事不力而狠狠地批評一番。

「咦?我睇到啲咩?」穎怡不可置信地捽捽眼,懷疑自己一時大意睇錯嘢。

尋晚反咬返自己轉頭嘅阿桃竟然主動申請加入自己所在嘅公會?鼠標喺接受申請嘅掣上一動不動,穎怡此時此刻竟然遲疑不決起嚟。

如果接受咗嘅話咁月伶會點反應?



作為為月伶通風報信嘅間諜,穎怡想提供加更多資訊俾對方,但同時又要提心吊膽地行事,唔可以暴露佢哋之間嘅大計。

正當穎怡仍然猶豫不決嘅時候,新一個組隊邀請突然覆蓋住啱啱嘅公會申請。

「頂⋯日光日白真係唔可以講人。」一講曹操,曹操就到。阿桃嘅組隊邀請一下子出現喺眼前,穎怡打咗個冷震,手指向接受邀請嘅選項㩒咗落去。

都係問清楚佢想點先再收會好啲…穎怡飲咗啖水定定驚,決定同阿桃正面交鋒。

「喂~咁遲先online嘅?」穎怡裝作若無其事地問道,鼠標將公會申請嘅視窗移到右上角。



阿桃:今日忙啊~

浩俊向後望咗眼醉醺醺嘅曦銘,選擇打字溝通,以免惹事生非。

浩俊本來打算送酩酊爛醉嘅曦銘返屋企,但突然間諗起幾個鐘前申請公會嘅事,於是就開電腦睇吓有冇進展。

結果一打開隻game就見到驚驚online,喺好奇心驅使下浩俊就決定同對方交流下— 畢竟,佢要同未來嘅公會成員多多「交流」。

「哦~其實我唔諗住打機。」穎怡喺電腦櫈上伸懶腰,連變聲器都無法掩飾其慵懶嘅聲線:「一陣要同人傾group project。」



唉,一提起就心煩。穎怡望到螢幕右下角嘅日期,明明deadline就喺後日,點解成班人都咁鍾意拖到最後一刻先嚟講呢?

係喎,阿桃係師姐嚟,可能佢幫到手喎?穎怡喺浩俊仲打緊字嘅時候突發其想,仲可以順便抄佢牌,一石二鳥。

阿桃:咩course嚟?我可能可以俾啲意見你

「咁可唔可以俾你電話號碼我?Whatsapp傾好似方便啲。」穎怡不禁感嘆自己嘅運氣太好,打個機都遇到咁善良嘅師姐。

今次到浩俊猶豫起嚟,佢從來冇俾過聯絡方式俾任何一個網友,惡作劇嘅代價太大,影響到現實生活只會令自己更心煩。

穎怡感覺到對方好似有所顧慮,決定繼續遊說對方。

「你啱啱咪申請公會嘅?」穎怡隨便作咗個藉口:「要入嚟嘅話就要入Whatsapp group㗎喇~你遲早都要俾我。」

浩俊仍然未放低戒備心,緩慢咁喺輸入欄度打出自己嘅電話號碼,但未敢send出去住。



「你做緊啲咩啊?」曦銘忽然貼向浩俊隔籬,一口酒氣噴到浩俊嘅臉上。

浩俊一臉嫌棄地打算避開黐人嘅朋友時,曦銘一下子㩒落Enter個掣上:「我幫你send啦!」

「唔該晒~」穎怡嘅語氣立即愉悅起嚟:「我一陣就會搵你㗎喇!」話畢,滑鼠就㩒落接受公會邀請嗰欄。

我頂!浩俊嚇得即刻退出穎怡所在嘅隊伍,連忙扶走禍害人間嘅曦銘。

send咗出去嘅嘢已經收唔返,今鋪真係俾豬隊友累死。浩俊苦惱地想道。

是次交戰結果:浩俊 1 穎怡 1
 
已有 0 人追稿