穎怡喊咗一段時間先逐漸冷靜落嚟,浩俊側眼去望挨喺膊頭嘅人,個心終於安落少少。

下晝三四點陽光唔會過於刺眼,但恰好透過層層樹葉喺穎怡臉上投下斑斕光影,白皙皮膚上淚痕仍舊明顯。

邊個會想像到一個嘻嘻哈哈嘅女仔會有咁脆弱嘅一面?

浩俊再望到對方鼻頭紅成蕃茄,有種衝動想代替穎怡去承受一切。

「你暫時唔好再諗呢件事啦。」



穎怡突然被一個更溫暖嘅擁抱包圍住,清爽氣息瞬間安撫心靈,大腦變成一片空白。

「月伶應承咗會幫你搞掂,咁你就放心交俾我哋啦。」浩俊一臉真摯咁凝視穎怡,琥珀色眼眸一瞬闖進視野,亦闖進心房。

穎怡感覺自己幾乎控制唔住表情,慌張咁不斷點頭,眼神四處游離就係想迴避浩俊嘅目光。

你想點呀!!!

兩個人距離近得就嚟連一呼一吸都感受到,穎怡驚自己好似個夢咁重蹈覆轍,眼都唔敢眨一下。



「知…知道。」穎怡下意識放輕語氣,下巴就咁靠喺浩俊嘅膊頭上。

浩俊見穎怡已經冷靜咗落嚟,鬆咗口氣,雙手反而抱得更緊。

「其實你以後有咩事都可以同我講。」浩俊塊面埋喺穎怡身上,令對方望唔到自己嘅表情:「我一直都喺度。」

一陣風吹過,拂過頭上樹枝,穎怡垂眼望落樹根位置,發現新萌芽嘅枝條已經冒出頭。

個心都好似有啲嘢生根發芽咁。



「知道。」穎怡忍唔住去貪戀呢段時間,呢段珍貴嘅時光。一切都平靜得美好,就好似所有煩惱都拋諸腦後咁。

浩俊重新將視線投喺穎怡身上,望到對方笑意漸濃嘅嗰刻,個心都好似瘋狂亂跳起嚟。

「其實就係……」浩俊猶豫片刻,大腦忽然思考唔到,所有嘢都脫口而出:「你之後都可以依賴我。」

穎怡曾經認為浪漫係一個抽象無比嘅概念,人哋口中所謂送玫瑰禮物等更似係膚淺片面嘅例子。

但當望住眼前人因為自己而緊張得吞吞吐吐,眉頭眼額間寫滿無處安放嘅感情嗰陣,佢而家終於知道咩叫浪漫。

「好。」平時穎怡係比較健談,而家反而係浩俊不斷咁安慰對方。

「你唔開心嗰陣可以搵我,嬲嗰陣都可以同我講,又或者無聊嗰陣都可以。」浩俊愈講愈急,連耳仔都變得愈嚟愈紅。

「你到底想表達啲咩?」穎怡笑咗出聲,忍唔住捏咗下浩俊嘅面珠墩。



原來一碌木都可以咁可愛。

「我想表達嘅係…」浩俊頓咗頓,然後嘆咗口氣:「我鍾意你。」
已有 0 人追稿