係課室入邊,我同Silvia係到揀題目俾翹哥哥一陣挑戰,我地不停諗緊俾邊一題佢挑戰好,呢個時間,老師入到黎
 
「Charlotte妳想俾一條題目人地挑戰?」
 
「係呀Miss Ho,一陣放學我地就去中央果到俾佢試做架啦」
 
「不過對方係咩人先?我幫妳地搵題目唔緊要,但我都要睇下係咩對手先嘛」
 
「佢呀…係我契哥,佢係皇仁到讀」
 


「嘩,Queen屎仔呀?咁要慢慢搵啦」
 
「Miss Ho….佢讀理科架」
 
「咁樣呀….唔…我俾條乙部佢寫下野啦」
 
「唔該哂Miss Ho」
 
「咁我一陣俾條問題妳啦」
 


我地離開教員室,拎出電話睇定糖水餐單
 
「喂,肥鴿,妳估妳贏梗架咩」
 
「洗唔洗咁快幫住阿哥呀妳,妳好呀,重色輕友,一承認之後就成個心飛左去人地到啦」
 
「邊係喎」
 
「總之呢,一陣就準備食糖水啦,hahahaha…………………………….ha」
 


當我拎住份making係到對果時,Silvia真係haha啦
 
翹哥哥佢呢一條問題,答中80%以上
 
「Clodulf你係咩構造架?點解你連History都會識?」
 
「我一直都好鍾意睇歷史書,所以history係難我唔到」翹哥哥邊飲茶邊講
 
「咁你又唔揀文科嘅?」
 
「唔….因為我都鍾意理科囉」
 
「咁你有咩科係唔識架」
 
「商科囉,我對咩財經、金融果d冇興趣,係完全冇興趣」


 
「我真係想睇下你個腦係咩構造」
 
「嘩…鴿姐…如果妳見到我爸爸嘅話會唔會解剖佢添呀?」
 
「點解咁講呀?」
 
「我爸爸由讀打仔學校,轉去普通學校,用3年時間換當年會考8A返黎再入英華女校」
 
「哦,我聽過呀,沙律講過我地知啦,你爸爸係英華同你媽媽重遇,佢地係小學同學。沙律媽媽同你媽媽爭你爸爸嘛」
 
「佢地大人嘅事,我唔理得咁多啦」
 
係翹哥哥休息完後,佢再一次返去位到教OV,不過佢又會擰過黎我呢邊教我
 


當我休息果時,我發現左有套戲上畫,以翹哥哥性格佢一定會睇,所以我同佢搭車果時就問佢去唔去睇
 
「唔?妳啱睇咩?講潛艇架喎」
 
「唔……係咪唔賞面先?」
 
「我怕妳唔鍾意睇」
 
「陪你睇一次咁多」
 
翹哥哥睇一睇個影評後「好啦,星期六睇完戲陪妳行街?」
 
「一言為定!!!」
 
我真係好期待星期六去睇戲行街,所以我每一晚溫完書之後都係到考慮著咩衫


 
不過肥鴿俾我嘅意見又冇錯喎
 
「妳洗乜專登去襯衫呢?妳都識話妳兩個識左16年,妳有咩衫佢應該一清二楚啦」
 
「唔係應該打扮下咩?」
 
「打咩扮呀?用妳自己最真實一面顯露係佢面前先係最好」
 
當我換好衫之後,佢就黎摗鐘接我出去。出發前媽咪仲千叮萬叫我唔好蝦哥哥。去到戲院,我地只係買左汽水一杯,兩份飲,因為我地兩個唔太鍾意食爆谷
 
今次翹哥哥買嘅唔係一般座位…而係情侶位,中間冇扶手,方便男仔中途攬實個女仔
 
「傻架你….買情侶位做咩喎」
 


「有咩所謂呢,我地以前夠一齊沖涼同孖鋪啦」
 
我地坐係個位到,靜靜地等開場,不過之前呢,翹哥哥就俾左件風褸我
 
「嗯?你又知我凍嘅,你唔洗著咩?」
 
「次次睇戲妳都唔帶褸架啦,傻妹」
 
電影開始,我地兩個人飲埋同一杯汽水,慢慢係到欣賞。我亦都好自然咁將個頭挨去佢膊頭上,雙手撓實佢,呢個動作我地兩個已經試過好多次,每一次睇戲果時,永遠都係佢坐我隔離