我倆的緣份，於半世紀前已經開始: 向迪士尼出發

聽完婆婆嘅故事，搞到我又瞓唔著
 
我其實係咪應該好似婆婆同媽咪一樣，應該接受下其他男仔呢?如果有男仔真係追我嘅話
 
我坐起身，走去鋼琴前開始練琴。不過我今次練嘅係單手彈琴
 
真係好似媽咪所講，用單手彈一首歌係好難，如果要同媽咪夾嘅話，我一定要同媽咪練習多D先得
 
唔好睇媽咪細個粗粗魯魯，其實佢15-18歲果幾年係好多男仔追，daddy要經常去接媽咪放學先可以擊退敵人
 


睇一睇媽咪16歲嘅學生相，用校花黎形容媽咪真係冇錯(如果佢唔講粗口鬧人嘅話)
 
媽咪有時扎一對孖辮，有時扎馬尾真係好靚
 
睇返媽咪同daddy細個d相，佢地著起校服拍拖果時，真係好青春
 
通常媽咪daddy身邊就一定會有兩個契爺同契媽係到，無可否認，風契爺同雪凝契媽真係好襯
 
不過有一張相我好鍾意
 


相中daddy著起制服，媽咪就著住英華校服撓實daddy影相，相中仲有著住制服嘅公公同埋婆婆，呢一張就係佢地一家四口嘅全家幅。婆婆同媽咪兩母女都係嫁俾入境處幫辦，希望我唔係啦，因為我心中嘅佢，係想做醫生
 
媽咪係我身邊不停教我點樣彈，因為唔止媽咪會唱歌，我仲會代媽咪唱返一兩首
 
「小城大事」;呢首歌我將會代媽咪係佢母校唱出黎，呢首亦係媽咪當年係學校表演嘅歌
 
“叮噹”
 
11點正，哥哥黎到我屋企接我去玩
 


今日我著左t shirt長褲加波鞋，仲有搽左bb cream，哥哥一見到我就呆左
 
「思思妳做咩化妝?」
 
「下….搽左bb cream之嘛，唔好睇咩?」我真係好擔心自己個樣唔好睇
 
「唔係呀….妳靚左好多」
 
「咁即係我平時唔靚啦」我鼓起泡腮望住佢
 
「我嘅思思係最靚，得未呀?」
 
「算你啦」
 
今日，哥哥拖實我隻手一齊去玩


 
其實我一去到迪士尼，就一定會好開心，我同哥哥兩個人已經一齊入Park入過好多次
 
就連日本果個迪士尼，我同佢地一家人都去過幾次
 
我最鍾意玩嘅，一定係呢個遊戲;灰姑娘旋轉木馬
 
每一次我都要玩幾次先安樂，仲有小熊維尼之旅
 
「哥哥!!玩邊個先?」
 
翹哥哥摸一摸我個頭「妳當然係想玩旋轉木馬，玩哂成個幻想世界，再玩未來世界，之後小小世界涼下冷氣，再去玩具樂園同灰熊山谷」
 
「呀…..點解你會知道哂架」
 


「傻妹…」
 
翹哥哥拖實我雙手
 
「可能姑姐姑丈都冇我咁瞭解妳啦」
 
「咁…你又…唔….」
 
「唔?」
 
「都係冇野啦，陪我去玩啦!!!」
 
我捉實佢隻手係迪士尼到跑