我倆的緣份，於半世紀前已經開始: 護身符

「阿女，話俾公公知，幾時帶人黎啦」
 
「公公呀….其實….你見過我男朋友架啦…」
 
「見過?點會呀」
 
「真係呢……佢…呀…」
 
我口窒窒唔識講，然後醫生公公望一望哥哥再望下我，然後再望媽咪
 


媽咪點一點頭
 
「係呀林醫生，慧思同浩翹拍緊拖」
 
「浩翹係唔係真架?」
 
「係呀公公….媽咪同阿姨尋晚審問左我好耐先批准我同慧思拍拖」
 
「咁呀…」
 


醫生公公確定冇病人之後
 
「阿怡!!入黎!!」
 
「公公你叫姑媽入黎做咩呀?!」
 
「佢係你地程家話事人，一定要俾姑媽知道!」
 
「嗯?阿爸你叫我?」
 


醫生公公指一指住哥哥「浩翹自己同姑媽講」
 
「咩事呀?」
 
媽咪一面花生樣，係到等食
 
「呀….姑媽….即係咁….其實呢….就….點講呢….爺爺….同爸爸….就…」
 
「家姐，遲D妳可能要對我改口啦，唔可以叫我做阿妹啦。浩翹都要改口啦」
 
「咁叫咩呀?」
 
「慧思，妳會叫姑媽做咩呀?」
 
「唔?」


 
「姑….姑奶奶….」
 
「下?姑奶奶?」
 
「我個女同阿哥個仔拍緊拖啦」
 
「下?!咩話?浩翹追到慧思?佢地拍緊拖!?」
 
「係呀…姑媽….」
 
哥哥終於拖起我隻手
 
姑媽諗左陣之後
 


「護….護身符，我去準備先」
 
「唔洗啦家姐!!佢地仲細個…唔洗咁快」
 
然後姑媽望一望媽咪
 
「好細咩?唔?」
 
「呀…妳都係準備定啦」
 
「浩翹」
 
「係…公公」
 
「好好地對慧思呀，佢係Miss孔唯一一個孫女咋」


 
「知道公公」
 
「慧思，下個月再打針」
 
「仲要打!?」
 
「當然啦，仲有呀，當年雪晴拍拖，我俾左d條件佢。詩敏妳都應該記得啦」
 
「仲好清楚」
 
「咁妳都set返d條件俾慧思啦」
 
「我一定會」
 


我同哥哥拖住手離開診所，媽咪就準備返屋企
 
「今晚你地兩個自己同兩個傻佬同埋阿哥家姐講啦」
 
「知…知啦….」
 
今晚契媽有命令，三家人全部黎食飯(其實我地幾家人每月都聚埋食飯，大家每個月輪流去陪下婆婆食飯)