我倆的緣份，於半世紀前已經開始: 一早就曝光了的我

「因為妳揈頭髮果個動作，同埋摔眼果個動作話我知，妳係Miss Cheung個女，妳同Miss Cheung同埋校長生得一模一樣。而且…我同妳地一樣住西區，妳地住海邊，我住山邊，雖然話少機會見面，但我總會撞到妳同Miss Cheung一齊行街，甚至同Miss Lam一家人行街。但係我仍然唔敢肯定」
 
「妳見過我地兩家人?」
 
「當然」
 
「妳有冇同人提起過?」
 
「如果我講左，我仲有命企係到同妳傾計?校長出哂名錫自己個女，同埋好錫Miss Lam，程家父子，女校男生，呢個故事流傳左好耐。好多人都知道Miss Lam係嫁左俾佢同班同學」
 


「因為….畢業典禮?」
 
「冇錯，咁浪漫嘅事，大家一定好有興趣知。所以大家搵下搵下，就得出關係圖。校長係Clodulf爸爸兩姊弟嘅契媽，Miss Cheung係佢契妹，而Miss Lam就係佢嘅小學同學。妳地雙方父母自出娘胎已經相識。直到Clodulf爺爺麻麻過身，校長就成為佢地監護人，Clodulf爸爸為左實現自己媽媽遺願，甘心做女校男生，之後佢係英華重遇小學情人Miss Lam」
 
「冇錯，妳分析得好好」
 
「當我係圖書館見到妳係Clodulf身邊出現果時，佢對妳嘅眼神係完全唔同，妳同佢都笑得好開心，果種開心係由心內笑出黎。佢餵妳食藥，陪妳溫書，果陣我成日諗，點解我會輸俾妳?係咪因為妳係Miss Cheung個女，我地校長嘅孫女?恐怖雞三世?」
 
乜原來我已經咁出名架啦?
 


「但係…我有一日問起Clodulf，佢心上人係點果時….我都俾唔到反應佢」
 
「係?」
 
「佢話從佢有記憶果時，已經有一個女仔係佢身邊出現。係一個暖暖嘅廂之中，佢地第一次見面。當時我問佢，係唔係佢自己發夢，佢答我唔係。然後，佢問左我一個問題」
 
「係?」
 
「點解佢有英皇世襲唔去，要去皇仁?我當時諗一諗，皇仁附近有St. paul之外….仲有一間學校，天藍色旗袍長衫校服，香港真光中學，所以我一見到妳，就知道係妳。佢鍾意嘅，係佢青梅竹馬嘅契妹，我地英文老師獨生女、我地校長唯一嘅孫女，就係妳，Charlotte Li，李慧思。」
 


Winnie以90度角望住我
 
「當我今日一見妳上台彈琴，一聽到妳姓李，我就知道我冇估錯。我竟然會同英文老師個女、校長個孫女爭男朋友」
 
「其實…我可以接受妳挑戰」
 
「挑….挑戰?」