我倆的緣份，於半世紀前已經開始: 婆婆嘅孫新抱

係輕音樂響起果時，有一個著英華校服嘅同學行左出黎，佢去到台前向校長行禮之後，就自己行去講台果到

「大家好，我叫余家琪Nataile，我係4年前嘅畢業生，考入中文大學MBBS。我今日係到，代表我同我媽咪、天上嘅爸爸同埋繼父多謝校長，因為冇校長嘅幫忙，就唔會有今日嘅我」

家琪姐姐上台啦!!!不過佢同校長有親戚關係咩?我再諗真D，係喎，佢係浩揚哥哥嘅女朋友喎

「係我F.1黎註冊果日，我同幾個小學同學有言辭上嘅爭執，因為……我細個好窮，媽媽母兼父職之餘，仲要打兩份工去維持我地屋企生計，我係放假日子，會幫媽咪去執D爛鐵、廢紙去賣，我以前係住北角D劏房，我用我自己能力考入呢到。不過我第一日黎註冊就俾人睇唔起，話我冇資格讀書，但係…Miss Cheung同Miss Lam係第一日已經好相信我呢個素未謀面嘅學生，佢地一齊幫我趕走蝦我嘅同學，而校長亦一力承擔所有責任。校長，之後妳收到家長投訴，我係好清楚知道，但係妳為左保護我，不惜自己親身上教育局同官員硬撞硬。而且…妳知道我屋企環境唔好，妳安排我媽咪黎學校做駐校校工，仲免費俾我地兩母女住學校宿舍，令媽咪識到叔叔，可以俾佢下半生有個依靠，我地一家三口，今日可以咁開心幸福，好多謝校長妳。我會好好照顧我所有屋企人，將來會做一個好醫生，去報答校長妳嘅恩情」

婆婆聽到之後，真係開心到流眼淚，不過佢都係要玩大踢爆





「Nataile」

「係!校長!」

「妳多謝我咁少得啦?」

「校…校長….今日…唔係太好喎」

「唔緊要啦，遲d妳就同我有親戚關係架嘛」





「係…多謝校長…妳係我F.4果時….同意當時追我果個King屎仔拍拖，我地兩個都一齊讀到MBBS，果時媽媽極力反對，但係妳同Miss Cheung同Miss Lam都同我媽媽講批准我係少女時期拍拖，多謝校長」

「妳仲叫我校長?妳唔係應該同Miss Lam個仔一樣，叫我婆婆咩?」

其時Nataile姐姐塊面紅過紅蘋果

然後，婆婆向大家解釋

「各位英華同學，妳地呢位師姐，余家琪Nataile，係我地學校4年前嘅dse 5**狀元，俾d掌聲佢，佢而家係中大讀緊MBBS，亦都開始左實習」





當大家俾完掌聲之後，婆婆就踢爆佢

「佢媽媽，就係成日幫大家收點名簿，叫大家冬天著多年衫嘅學校工友，美姐。而佢叔叔，係學校經常幫大家維修電器嘅偉叔。」

大家知道家琪姐姐媽媽同後父都係學校好受歡迎嘅工友之後，掌聲更大

「最重要，Nataile個男朋友，係Miss Lam個二仔，英皇書院嘅程浩揚，當年Ethan用Miss Lam過橋，避開Miss Cheung嘅武裝部隊黎學校等人放學，Nataile妳而家改口未呀?」

「我…改左口啦婆婆…我叫Miss Lam做媽咪啦…」

家琪姐姐好怕羞咁坐低係長椅上

然後，又有一個輕鬆嘅音樂出黎