《家姐話，幫我追女仔》: 十七

「咁好傾嘅你哋？」婷婷問。
 
我同Winnie異口同聲：「冇呀！」
 
咁怪嘅佢哋。
 
返到屋企，夜晚我果然收到Winnie嘅WhatsApp：
 
「廢話唔多講。答我，鍾意婷婷係點解，係咪貪佢靚女？如果係，你唔好搞佢。」佢又再send：「如果你唔係真心鍾意佢，只係亂咁鍾意吓，你會傷害到佢㗎。」
 




我答：「我認真㗎。佢咩樣我都鍾意。」
 
真嘅，我有諗過婷婷唔係咁靚，我又會唔會鍾意呢？但講真，睇得順眼咪得囉，屋企已經有個人人都覺得靚嘅家姐，我其實有啲審美疲勞——你可能覺得我吹水，但係我真係鍾意婷婷嘅性格㗎。
 
婷婷樣靚，只係佢優點裏面，最不值一提嗰一樣。
 
婷婷對我嚟講，係一個瞓喺雨後森林嘅小天使，乾淨、純粹、耳目一新，冇人可以比佢令我感覺更fresh。
 
我鍾意佢，因為，佢係佢。
 




「OK，如果係咁，你就努力追佢啦。」Winnie覆。
 
「？」
 
我打咗個問號，因為我成個腦都係問號。
 
Winnie見到我同婷婷一齊，總係冇咩好面色，我一直都覺得佢唔想我同婷婷咁friend；點解會突然咁鬆口？
 
「你係咪睇唔明中文字？」我幾乎聽到Winnie嘅語氣……
 




「唔係，只係唔明點解你肯畀我追佢？」噢，得到佢嘅首肯，絕對係我嘅榮幸。
 
Winnie send咗三個笑喊emoji：「又唔好咁講，冇得係我肯唔肯嘅。
 
我只係唔想啲男仔傷害到婷婷啫，佢咁乖咁傻，屋企保護得佢咁好，佢好易信人。之前，有男仔追佢，背後又喺度話婷婷蠢、唔識轉數，我聽到真係嬲，點可以咁對佢㗎？
 
如果你都firm自己係真心，唔會傷害佢，咁咪得。」
 
哇，咩料呀。我好似睇咗好多字，但又有啲唔明白點解佢變得咁快。
 
我好奇地問：「點解信我？你一問我一答，得我講咋喎。」
 
你咁樣會畀人呃㗎！
 
「郭靖成日講起你，話你好仔，我諗佢無必要講大話，或者喺我面前sell你囉。」Winnie答。我心諗，都真，要sell都sell郭靖自己先啦。




 
佢又補充：「目前你都冇能力hurt到婷婷，所以我放心。」
 
冷箭！
 
啱嘅，我唔會背後講婷婷壞話；最緊要嘅係，婷婷冇畀我傷害佢嘅能力，譬如，鍾意我。
 
「當你係讚我。」我厚面皮咁答。
 
「有嘢幫手揾我。婷婷死喺你手上，好過為其他壞人喊。」Winnie咁講，都難答喎。
 
「我唔會令婷婷受委屈。」我堅定。
 
「OK，係呢，你知唔知郭靖鍾意咩嘅女仔打扮？」Winnie問。
 




「可愛型。」其實我唔知，鳩噏咋。
 
「好。加油，唔多講。」
 
我突然覺得Winnie其實佢外表咁——西？又真係真心對婷婷好喎。
 
我㩒出去對話畫面，跟手再WhatsApp婷婷：
 
「你同Winnie係咪好熟㗎？」
 
「係啊，我哋小四就識㗎啦，嗰時一齊坐。佢係我最好嘅朋友。」
 
如果係咁，我又理解。
 
Winnie成個阿媽咁，驚人傷害佢嘅天真無邪寶寶婷婷。都係嘅，婷婷家教嚴、專注學業，身邊啲人又乖，係要睇實啲佢。




 
我突然諗起，如果有個輝哥出現，係咪就會狠狠咁抓得住婷婷嘅心？一如，輝哥俘虜到家姐一樣。
 
我突然不安，對婷婷又好，對家姐又好。
 
但，無論如何，Winnie咁樣講完，即係代表又多個人支持我同幫我啦！好耶！今次仲要係婷婷best friend喎，正。
 
我覆婷婷：「唔怪得你哋咁friend啦！」
 
「係㗎，點解咁問嘅？」婷婷問。
 
點解阿俊突然咁問嘅？今日放學，仲見到佢同Winnie傾得好埋喎……
 
「想知多啲啫，見你哋成日一齊嘛。」我答。
 




我醒起，今日lunch，Winnie同阿俊都有兩句喎，仲喺度望嚟望去……
 
「OK。」
 
我突然有種好奇怪嘅感覺。