《家姐話，幫我追女仔》: 十九

輝一邊錫我，一邊㩒走個來電。但重重複複，佢部電話仍然喺度震動。我睇得出佢有啲躁，其實，我都係。尤其是，電話嘅另一頭，應該係一個女仔。
 
我話：「聽咗先啦。可能係急事。」
 
輝不耐煩咁聽咗，因為空間太靜，同佢距離極近嘅我，清楚聽到一把女聲喺度喊，並且講：「你終於聽？我——」
 
「你做咩打嚟？」輝好惡咁講。
 
我從來，都冇見過輝咁大聲講嘢。佢永遠都好似好玩世不恭，對好多事都唔上心咁，把聲一直都好輕；而家佢皺晒眉，同平時好唔同。
 




「我……好掛住你，你喺邊？」即使輝已經離遠咗啲我，但我都清楚聽到呢句。
 
好掛住你？呢個Amy係邊個？前度？唔係吖，我記得佢前度嘅名，唔係咁樣㗎喎。我心下一沉，眼前呢一個以為尊屬我嘅男人，而家有第二個女仔同佢講掛住。
 
如果係認真，呢份情意，恐怕非常濃厚，先會喊住講。
 
「唔關你事。」輝冷淡咁應。
 
「點解？你唔要我啦？」Amy哀怨咁問。
 




我嘅身體發麻，面部突然有啲震一震嘅感覺——到底我哋喺度做緊咩？我聽緊啲咩？我鍾意嘅人、話鍾意我嘅人，有其他人？
 
輝見到我成塊面僵晒，即刻向我搖頭，似係喺度解釋緊一啲嘢；把口一邊同Amy講：
 
「我哋已經完全冇關係。」之後，就即刻cut線，再哄埋返我度。
 
唔知點解，我覺得好驚……從來，我都冇遇過呢啲事，而家就好似人哋電視劇咁樣，三角關係？仲要有第二個女仔唔開心到喊？
 
我退後一步，突然覺得呢啲事好陌生，我所知道嘅愛情，唔應該係咁㗎，唔應該有呢啲事……
 




輝將電話擺床，同我講、更加似係解釋：「舊朋友嚟。」
 
「朋友？朋友會喊住講好掛住你？仲問係咪唔要佢？」我唔信。
 
可能真係舊嘅，相較於我。
 
「我哋之前曖昧過，但冇下文。」輝否認，只係咁樣講：「係佢而家死纏爛打咋，我同佢真係冇嘢。」
 
「只係曖昧？」我懷疑。
 
點解Amy要講「唔要我啦」，如果係冇要過嘅話？
 
「係呀，唔知佢點解咁。」輝堅持，語帶不屑，好似好睇唔起Amy。
 
「我……唔信。」我話。




 
我呃唔到自己，覺得輝講嘅說話冇咩可信性，原因係Amy喊得好慘？或者係，輝啱啱嘅面目，太陌生，好似冇識過佢咁。
 
「真㗎，你唔好信外人啦，我先係同你close嗰個㗎嘛？」輝作勢攬返我。
 
「我想睇你哋啲對話紀錄。」我成為咗嗰種港女，除咗證據，呢一刻冇嘢令我安心。
 
「我私隱嚟。」輝搖頭。
 
「畀我安心吓，好冇？」我分唔到點解輝唔畀我睇，所以堅持。
 
輝冇再講嘢，我見佢沉默，即刻喺床搶走佢部電話，但我解唔到鎖。
 
「畀返我！你又開唔到。」輝隨即搶走。
 




「身冇屎點解咁緊張？」我惻然。佢搶嗰時，刮到我隻手，太慌張。
 
「你要尊重私隱！」輝大大聲咁同我講。
 
「我唔尊重。我只想知道你同Amy係咩關係。」我直覺同我講，佢哋唔簡單。
 
無啦啦，人哋點解要奪命追魂call，講掛住你同埋哀求你？
 
「冇，你唔信我？」輝冷笑。
 
「係。」我點頭。
 
「妖。」輝好嬲、但又有啲無奈咁望住我，然後打開房門、屋企門，佢自己行咗出去，留低一句：「你點解唔信我呢。」
 
我輕輕咁講：「點信你啊？」即使，得我聽到。




 
呢度係輝屋企，我諗住佢會返嚟，所以喺嗰度等佢。慢慢，我越諗越多，會唔會佢真係有苦衷？係咪真係我誤會咗佢，而佢本身係一個好着重私隱嘅人？只係我，強加自己嘅諗法喺佢身上？
 
我內疚，不安，WhatsApp佢，但佢上線、落線，灰剔，冇再覆。
 
唯有等到輝返嚟，我再同佢道歉。
 
等等吓，我喺迷迷糊糊糊之間，都唔知有冇瞓着；但一擘大眼，已經係清晨。
 
輝冇返過嚟。
 
我搭頭班車，返屋企；再WhatsApp輝：
 
「我走啦，收到同我講聲先，好冇？」
 




我會等佢覆。