《家姐話，幫我追女仔》: 三十三
Well，冇咩特別，只係不斷練練練，越嚟越擔心，就越嚟越瞓得唔好。
我單獨見唔到婷婷，小息、午膳、放學，佢都同Chris一齊練稿，同埋同其他學生會成員開會。
啫係佢哋無時無刻咁一齊囉……
我知婷婷呢排好忙，又要理學校測驗、功課、補習，又要搞活動。我哋有WhatsApp㗎，不過都係傾兩句就算，諗住第二日都有得見，點知大家都咁唔得閒。
有時，婷婷上上吓堂，竟然伏低休息。我見到Chris哄埋去，喺佢耳邊細細聲講咗啲嘢，之後就出去熄細啲頂頭嘅風扇——呢啲事，應該係我做㗎嘛！
「Chris，專心啲上堂，唔好撩人傾偈。」
可能因為感覺到我憤怒注視嘅目光，李sir就咁講；婷婷都唔好意思咁坐返起身。
「好攰啊你，係咪？」我趁落堂，問婷婷。
「少少啦，瞓得唔夠咋。」婷婷答。
「過埋呢排就唔會攰，一齊加油啦，我哋兩個。」Chrs都轉頭搭話，但淨係同婷婷講。
請問又關你咩事呢？又唔係同你講嘢，仲要無視我？
「個個都要加油㗎喎，全班都有test。」我答。
「係呀係呀，尤其係你添，廢事到時走晒音、畀人由台上笑到落台下啦。」Chris又補充：「當然我對你有信心呀，練得咁勤力，唔怕啦，加油喎。」
「好呀。」我笑住答，雖然內心媽叉緊佢。
婷婷聽到我哋嘅對話，睥咗一吓Chris，再同我講：
「你要加油啊。」
「嗯！」
我諗，我明點解Chris會成日喺度寸我——因為佢同婷婷就算成日一齊，但追求嘅進度仲係好慢。我聽到Chris約婷婷出街，然後食檸檬；買甜品畀佢lunch time食，佢話太飽，最後係我得戚咁食咗；有老師冇返，代堂嗰時，婷婷仲同我隔籬嘅肥仔傑調咗位，話要同我一齊衝晒啲數學佢——Chris你考第一又點？婷婷唔show你啊。
我諗，婷婷唔係鍾意Chris——除非佢怕醜先避Chris啦，唔係有呢種反cup呀嘛？
突然，我覺得自己係主角，小說啲男主角，而我就係被選中嘅細路。
婷婷WhatsApp我，錄音嚟：「加油啊阿俊，聽日你一定可以表現得好好㗎，早啲瞓啦！」
佢話，我哋時間錯開晒，驚冇得親口同我打氣。
「你都係，台上見啦。」
婷婷又靚又叻，一直都喺台上，只有我都企到上去，佢先能夠睇得清楚我。
聽日，就係比賽。我返到課室，見到婷婷同Chris個書包已經掟咗喺位，佢哋應該已經入咗禮堂。
我摸到一筒龍角散、一包枇杷膏、一枝夏枯草；貼住一張memo：
「等間見啦！唔使緊張，點都係最好嘅演唱。」
係婷婷細字又可愛嘅字。
我就喺冇乜人嘅課室，攞起個結他，做最後嘅練習，彈又好、開聲又好、記歌詞又好。
想送你最好嘅表演。
想送你最好嘅自己。
入禮堂，我係獨唱組最後一個出場嘅，媽咪呀，真係好撚煎熬。你知啦，一開始又有咩開幕儀式，又講吓流程又介紹吓嘉賓。
我見到婷婷同埋Chris喺台上，一時正經咁主持，一時搞笑鬼馬咁講笑話，輕鬆咁介紹參賽者。
婷婷嘅身影好細，比平時遠，但我一諗到，等間佢會介紹我出嚟，就覺得好緊張。
我坐喺台下，根本冇心機聽頭三個人唱。
櫻花樹下——而家懂跟人示愛未？
最佳位置——唔好咁啦，人哋都唔畀你做正選囉……
自動棄權——唉，我都知我未夠他得天獨厚，咁我咪努力緊囉。
好快我就喺後台。
婷婷主持完下個參賽者，就會返返後台，見到我。
「唔好緊張。」婷婷講。
「好。」我成個人木晒。
「面青青，驚呀？Quit囉。」Chris講。
「唔驚。」我醒一醒。
跟住嗰兩個參賽者，我連佢哋唱乜都唔知，成個腦都係《每天愛你多一些》。
「婷婷呀，你知唔知咩先係完美嘅生活？」Chris同婷婷出返去主持，問。
噢，下個到我啦。
「唔使再操paper？住大屋？搵到好多好多錢？」婷婷答。
「咁膚淺㗎你。」邊個畀你咁話婷婷？
「咁要點先唔膚淺？」
「名是什麼？財是什麼？是好滋味，但如在生，朝朝每夜，能望見你——完美的生活，應該係每日都見到你呀。」Chris唱咗出嚟，台下即刻起哄。
「Wow，男神冧女果然有一手吖！」婷婷答。
「咁唔知歌神又冧唔冧到你呢？雖然就冇我咁靚仔！但係，接住落嚟5A楊知俊同學，將會為我哋帶嚟《每天愛你多一些》，聽吓可唔可以畀大家感覺甜到入心啦。」我懷疑Chris私自加咗一句。
「仲要係自彈自唱㗎！大家要留心聽啦。」婷婷急急地補充。
婷婷入嚟，同我四目相對，緊握拳頭咁同我講：「加油。」
「好。」我深呼吸。
出到台，依然係同上次一樣，好多人叫我個名，唔知邊堆打邊堆。
唔同嘅係，有一把嚟自後台嘅聲：「阿俊加油！」
係婷婷。
傻女，後台有啲位未熄收音，個個都聽到啦。
我因為咁，所以覺得好笑，而輕鬆咗一吓。坐低，settle好晒，我對住個咪講：
「呢首歌，我想送畀一個女仔。」
「Wow——！！！」
我開始彈唱。
第一段都係一樣，而我初賽時嘅所思所想，而家真係有婷婷聽到啦。
不願離開 只願留低
情是永不枯萎
嗯，呢句就係我想話你聽嘅，我對你嘅感情，係永不枯萎，希望無論係因為其他人、定還是升大學，我哋都唔好分開，可唔可以。
你聽唔聽到？知唔知我講咩——同緊你講？
間奏，我整理吓思緒，突然想確認婷婷有冇聽到。我擰轉身，見到婷婷喺幕後望住我，係好認真、專注嘅目光。
我見佢眨眼眨得好快。
佢聽緊。我對住個咪，講：「呢個女仔，而家聽緊。我想同你講，無論如何，你喺我眼中，都係最最最好嘅……」
我有諗過，要唔要講「我鍾意你」？
但我唔敢，勇氣已經用咗喺上台、抵抗住係咁震嘅身。
我再吸一口氣，繼續唱，咁啱我改咗少少Chris哼嗰段……雖然改得唔好，但有真心搭救！
柔情目光 長存暗香
是我思念 世上獨一
婷婷，你身上有好淡嘅爽身粉味，每次你喺我隔籬，我都覺得好香，隻味唔誇張，好夾你；每次我合埋眼，就好似聞到你咁，然後，就諗起你對眼。
呢個世界上，有咩人對眼可以好似你咁靚呢？你嘅目光好似一碗粥，綿密、柔和。
你唔喺我身邊嘅時候，都感覺你未曾離開。
班房黑白 亦望向你
眼裏的lemon tea
我哋喺班房相識，一齊上堂，中文學會嗰時又一齊留到最後，望住課室嘅燈既明又滅，但我嘅心未曾晦暗。
因為你喺我隔籬。
原來每日買一包檸檬茶畀你，已經成為咗我嘅習慣；鍾意你，亦如是。
呢一種酸酸甜甜嘅感覺，我唔知點形容，我只知道，自己都因為咁鍾意咗檸檬茶。
安心的得知友情深
但我沒法隱蔽心跳
我哋好friend呀可？嗯，我都當你係好朋友㗎。
但係，我好鍾意你。原來，我唔係一個大量嘅「朋友」，見到你同Chris行得幾埋，我會呷醋。
呢種多元嘅感覺令我覺得，我唔知每日嘅自己喺度做緊咩。
對唔住啊。
不願沉溺 只願情依
我鍾意你……一直冇同你講，違反咗友誼守則添。
但係，我唔想漫無目的咁鍾意你——因為，明明，我應該算係追緊你。
我唔想只係同你做朋友啊……
應該，我諗，我都可以同你並肩行，而唔係望住你、只以朋友身份——
係唔係？
情是永不枯萎
但我唔會逼你㗎。
如果你鍾意，咁就最好；唔鍾意——咁，我鍾意，就得啦。
係㗎。
感謝你，婷婷，你讓我做一回勇敢的情深者，我的生活因你而出現變數與突破，對此極享受。
我為動人的你融化，但愛是不熄的温柔，還有，不息的燦爛。
我唱完了，鞠躬。
台下又重複嗰啲嘢，拍掌、呼叫、起哄。
我轉頭，望向後台，只想尋找婷婷。
我見到婷婷，但佢揞住個嘴，然後擰轉咗身；Chris拍佢膊頭。
做咩？