《家姐話，幫我追女仔》: 五十
「喂，考完啦喎……」
唔好講嗰啲嘢住先，因為嗰啲會係我哋未來一直會遇到、努力、爭取、信任嘅價值；但此時此刻，我絕對有不吐不快——
我哋考完DSE啦！打完目前嘅大BOSS啦！
係咪，應該有屬於我、屬於我哋嘅獎勵？
「係啊，考完啦喎。」
婷婷冇擰轉頭望我，我望向佢，只見佢嘅眼睫毛都跟住佢笑。後面嘅燈紅路燈映住婷婷嘅及肩長髮，好似夕陽一樣落喺我心湖，卻未曾下沉。
我莫名心跳加速。
「咁——」
咁，我哋係咪一齊啦？我蘊釀緊，對唔住，實在太耐冇諗呢啲啦。
婷婷望向我，講：「咁，我哋就一齊啦。」
我呆住。
婷婷語氣放得更輕，側一側頭：「好唔好啊？」
「好、好！」
應該係我講㗎嘛，點解婷婷突然間主動咁多㗎？
「點解你睇落好似好唔想咁嘅？」婷婷哄埋我，用大眼睛望住我。
「我冇唔想啊，只係應該係我講㗎嘛，冇預你會出聲。」我搖頭。
「咩應唔應該啊？」
「咁係我追你㗎嘛，連貫少少，都應該係我開口㗎喎！畀你搶咗我支咪添。」我越諗越覺得怪？雖然其實冇咩問題。
「你都已經咁畀心機，所以我都可以主動啲，唔使乜都你做晒㗎。」婷婷不可置否：「不過既然你咁唔情願……好啦，咁就畀次機會你問我啦！」
婷婷又輕輕地講：「低能仔～」
我深深吸一口氣：「咁，施洛婷同學，你願唔願意做我女朋友？」
婷婷打岔：「我唔止係同學，同你一齊之後我仲想做小朋友㗎。」
我奸笑：「好，將來再同你生小朋友。」
婷婷推一推我個身：「邊個話同你生呀！我先唔理你。」
「好啦好啦……咁你願唔願意呀？」我再問。
「嗯——如果前面個小朋友話好，咁我都話好啦！」
婷婷隨手指住不遠處玩緊滑梯嘅細路仔：「就綠色衫個男仔啦！」
哇，得嗰幾歲大，聽得明咩叫拍拖、鍾意、一齊咩？
Well……嚟呀，得閒呀我哋！搞掂呢個小朋友，我就有女朋友啦！
我用一個「睇住嚟啦」嘅眼神望向婷婷，之後拉佢過去，聽我問、聽個小朋友答——佢大概四、五歲？好細粒，好似見到自己細個咁。
「Hello，想問你一個問題啊。」我俯身同小朋友打招呼。
「Hi。」第一吓，小朋友好cool咁答我。
隔咗兩秒之後，我尷尬地問：
「想問吓你，你覺得呢位姐姐肯唔肯同我一齊？一齊啫係——每日都一齊玩！」
小朋友擺擺手，好似我嘅解釋好多餘咁：「我知咩係一齊啦！我哋班有人已經拖手啦！好快就會有BB……咁你同姐姐如果一齊咗，係咪都會有BB㗎？」
「Err……」新一代嘅靈活令我無法招架。
「如果係嘅話，咁就唔肯啦。」小朋友續道。
喂！！！
點解話唔肯呀！！！
婷婷喺隔籬偷笑：「點解㗎？」
「有BB好辛苦㗎！又要好肥，又要嘔，又要抽筋！」小朋友認真地答：「所以，你都係算啦，唔好要姐姐辛苦啦。」
「係囉係囉。」婷婷跟住點頭。
「咁如果唔會有BB呢，又可唔可以？」我再問。
「都唔可以喎。」
吓，又點解呀？綠色衫嘅小朋友，你做咩同我作對！
小朋友行前，更加近婷婷，抬頭：「姐姐好靚，我都想同姐姐一齊。」
𠱁得婷婷開心到呢。
婷婷微微曲膝，笑得好歡樂但又努力忍住：「你仲細個啊，將來會遇到靚過姐姐好多、好多倍嘅女仔！」
「咁我都唔要哥哥同你一齊，佢可能會好似阿宇整喊泳泳咁整喊你㗎，我唔想姐姐喊。」
邊個係阿宇、邊個係泳泳……用啲𡃁仔嚟同我比，真係好咩？
我忍唔住出聲：「我唔會㗎，我會對姐姐好好！」
小朋友突然感觸：「男人呢……都係信唔過㗎。」
？？？
你將來都係男人嚟㗎！
「總之唔肯！」小朋友篤定。
大佬，啫係唔係咁玩㗎嘛，咁啫係點啊；唔通你話唔肯，婷婷就真係唔肯。
然後，
下一秒，
婷婷拖住我隻手，話：
「我會信吓呢個哥哥㗎，佢好好㗎，你將來大個咗都會係咁。」
我愕然，呢次，係我第一次拖婷婷嘅手。
「真嘅？」小朋友問。
「係。」婷婷點頭。
「如果佢蝦你，你同我講，我保護你！」
「好啊。」
佢哋完全無視咗我——都好嘅，事關，我又忍唔住扯咗旗……尷尬！
婷婷鬆開我隻手，摸摸小朋友個頭。
「拜拜哥哥姐姐，我要繼續玩啦。」
小朋友都有佢嘅Friend子，等緊佢返去組團玩捉伊人。
「拜拜。」
我哋轉身。
婷婷望住我，手掌向天咁遞隻手埋嚟：「小心整唔見我啊，而家我有大佬保護㗎啦。」
我同婷婷十指緊扣。
「又畀你lead住添……明明佢話唔肯㗎嘛。」
「咁我肯吖嘛～」婷婷嗲我。
我同婷婷嘅手心相連，漸漸出咗手汗，但冇人咁放開。
我突然覺得好感動。
「好似養咗好耐嘅豬，終於夠肥夠大隻，我可以劏嚟食咁……」
「你咩比喻嚟㗎，邊個係豬？」婷婷不滿。
「你～將來會畀我儲到肥肥白白。」我扮吓豬叫。
「哼，唔理你啦。」婷婷睥一睥我：「咁我肥咗你仲要唔要我？」
「要。你永遠都係我世界第一嘅愛人，最靚最可愛，冇得彈！」
「第一愛人？你仲有好多個愛人？」
點解咁似「十萬個激嬲女友嘅理由」……
「我意思係你喺我心目中永遠係第一，無嘢可以比得上你。」我補飛。
「你都係，你都係我世界第一嘅愛人。」婷婷莞爾，温柔地講。
我哋去買雪糕，一路行，一路食。
牽手，好似真係從此我哋有咗不可割斷嘅扣連，好温暖、温柔、舒適、自然。一路上，就算我哋唔講嘢，都唔會唔舒服，好似大家都用晒所有精力，去感覺呢一刻。
原來初戀係咁嘅感覺，比雪糕甜二萬三千倍。
我愛你。