麥東冬: （十五）發現

東冬一路行返屋，一路回味啱啱段對話，笑容滿面。
去到樓下公園，佢想坐低飲埋杯嘢先返屋企。

今晚喺公園流連同散步嘅人都唔少，東冬行咗一陣先搵到空凳坐低。
佢咬住飲管，聚精會神咁凝望每一個坐低嘅人，每一個行過嘅路人。

『點解最近都唔見永晴，早知之前問佢拎電話啦。』東冬心諗，一種擔心嘅感覺亦隨之浮現。

依種不安感令佢聯想起啱啱禾姍嘅說話。





『原來有件咁嘅意外？』
東冬拎起個電話，想搵一下資料。
佢輸入「太古 跳樓壓途人」，接著搜尋。

『哇...連討論區都有講依件事嘅，睇咗新聞報導先。』

「...【香果日報】太古男子墮樓壓死少女...」

『吓...』東冬㩒入去條連結。





「......男子鄭炳堯(55歲)，疑因工作問題於12日黃昏在太古川安閣跳樓，壓中一名周姓少女。墮樓男子當場證實死亡，少女送院後也告不治。警方初步調查，案件無可疑......

……鄭姓男子墮樓發出巨響。路過公園的少女周永晴(23歲)不幸被墮樓男子壓到肩膀，由於沖擊力太大，被彈開至旁邊草叢......

……周少女的同伴表示當天是為了去附近新開的書店才會出現在公園，沒想到會遇上悲劇，心情沒法平伏.......」














『可能...係咁啱同名啫...?』

東冬放低個電話唔敢再睇。
佢開始回想一切有關於永晴嘅事。

佢諗起每次見到永晴都有種不尋常嘅寒意。

佢諗起同永晴傾偈嘅時侯，旁邊嘅人都會用好奇怪嘅目光望住自己。

佢諗起永晴每次都話想繼續留喺公園，從來都無聽過佢要返屋企。





東冬依一刻思緒混亂不堪。
可能係心理作用，佢忽然感覺到衫袖被拉一拉，全身雞皮疙瘩。
佢將只係飲咗一半嘅飲品丟入垃圾桶，起身離開公園，急步回家。