麥東冬: （三十一）吊墜

東冬？！

佢嘅聲音大到隔住車門我都聽到。
但架車短短幾秒已經駛走咗，我來不及反應。

見到佢啱啱跌親，我開始有內疚感。

我係咪應該返去搵佢？

過咗兩個站我先回過神，決定落車返去太古公園。




途中我好不安，躊躇著點向佢解釋好。

喺遠處已經見到佢坐咗喺公園。

我慢慢行去佢身旁，見到佢拎住副爛咗嘅眼鏡，雙目無神。

「咁早嘅今日…」裝作若無其事嘅我隨意講句開場白。
「等咗你幾日啦。」

佢平時都唔會咁冷淡，似乎真係嬲咗我...





我慌忙解釋：「對唔住啊，掛住周圍搵朋友幫手搵吊墜，無同你講。」

「伊琳同我講佢搵過你，係咪因為佢同你講咗啲咩？」佢微微抬起頭問。

坐低喺佢身旁，我繼續解釋：「唔係啊，唔關佢事啊。佢仲話我知原來吊墜仲喺附近，所以我先扚起心肝去搵！」

「咁你可以同我講聲嘛！如果唔係我咁啱去緊搵梓軒，我都見唔到你！」

「吓咁你依家仲唔去…？」我輕聲問。





「我推咗佢喇。」佢將上身傾前，望向前方。

望住佢背面，我感覺到佢真係好擔心我。

「其實你唔使為我做咁多嘢…我唔想影響你所以我先唔想成日見咋…」

「你肯講真話？」佢擰轉頭對我講。


我沉默一陣，再開口：「我好似從來都無話畀你知粒吊墜點解咁重要？」

東冬搖頭。

「我細個嗰陣有養狗仔㗎，我哋同一日出世，但佢喺我哋14歲嗰年開始病，最後走咗。我媽咪知我好唔開心，所以將狗仔嘅骨灰整咗做吊墜畀我當手鍊戴住。佢同我一齊嚟依個世界，一直陪住我，所以好想帶埋佢一齊走，唔想留低佢喺度。」我盡量用平淡嘅語氣講。





東冬坐返直個人，期待嘅眼神希望我繼續講落去。