麥東冬: （三十三）心中

過去嘅幾晚我同東冬都無再見面。
我用依幾晚嘅時間整頓好心情，最後決定遵守承諾去踩單車。

所以今日，同之前去Cafe一樣，我預先去到目的地等東冬同禾姍。
沿路上我不斷提醒自己要擺低唔開心嘅事，而且希望一切都會順利。


喺月台等咗好耐，終於見到佢哋兩個落車。
東冬左望右望，我估係搵緊我。





我慢慢跟喺佢哋後面，保持住一定嘅距雜。
上到地面，我先醞釀足夠嘅勇氣上前去到東冬身旁。

「喂。」我望住前方講。

東冬顯然被嚇一嚇，輕輕撞咗落禾姍度。

「怎麼了？」禾姍問，同時望向我依邊。

「沒事…」東冬答完禾姍之後，對住我瞇起眼微笑著。





沿路我哋三個並肩而行，其實無見東冬幾日，我已經有好多說話想同佢講。
但我只係可以默默咁睇住佢哋兩個傾偈。
佢哋依種咁簡單正常不過嘅相處，對我嚟講原來係咁遙不可及。


喺租單車嘅場地，佢哋兩個各自租咗一架車。

「唔好意思啊老闆，我依架想換架有後座嘅。」東冬向單車老闆講。





老闆、禾姍同我都同時望向佢。

「哦無問題...你哋坐嗰陣小心啲就得喇。」老闆對東冬同禾姍講。

我見到禾姍面向側邊偷笑，再偷望東冬。而東冬咩都無講，只係對我笑一下。


去到單車徑，臨出發前東冬問禾姍：「欸其實啊...我騎腳踏車不是很厲害，等一下速度可以慢一點嗎？」

「當然可以啊！我也想輕輕鬆鬆的看風景。」

東冬坐上單車，向我打一打眼色示意叫我坐上後座。

『係咪真係得㗎...我以前都未試過咁坐，我依家仲要係...』我呆咗咁企喺單車側邊，有啲猶豫。
佢趁禾姍唔為意，一手拉咗我上車，再將我對手圍住佢條腰，我亦無奈就範。





「準備好了嗎？開車囉！」東冬講。
我同禾姍異口同聲：「嗯！」

今日天氣好好啊，有啲陽光但又唔太熱，有時仲會有一陣微涼嘅風吹過。
望住沿路嘅風景，好似所有煩惱喺依一刻都唔再重要，只係想好好咁享受依一刻。

「你諗緊咩？」我問佢。

「無啊諗緊首歌即嘛。」佢擰一擰轉頭細細聲講。

「唱出嚟吖。」

「一陣又話我發音唔準...」





「唔會啊，我想聽。」

「是你給阮一個夢   未記人生的苦澀   真正想要對你講   甘擱有別項
是你放阮一個人   走過風雨的思念   真正想要對你講   心中無別人......」

我合埋眼，將耳仔貼落佢背脊，想將每個音都聽得透徹。
身貼身嘅距離，再次令我有股暖流運行全身。

最近有種直覺，好似一切隨時都會完結。

雖然佢喺我身邊嘅時候，都會有一種強烈嘅安全感，但就係因為依種安全感，令我覺得好不安。
我唔知道如果無咗佢嘅話，我會變成點樣。


我緊緊咁攬住佢，好想好想以後都同佢一齊。