麥東冬: 《後續》（二）

「吓你要過台灣？！」梓軒擘大個口，痴住喺嘴唇邊嘅嗰條菜都就跌出嚟。

「係啊當轉吓環境囉，做幾年嘢啫。」我答佢。

「咁你係去做咩啊…？」

「我申請咗禾姍間公司，不過唔係台北，而係嘉義嗰邊嘅分店。」

「你果然仲未忘記依個女人！！」





我一笑而過。

「揼低我一個喺香港！唔制啊！！」梓軒激動嚷著，然後又扮喊。


但我明白佢嘅心情。


伊琳、禾姍、永晴，對我嚟講都係好重要嘅人，亦都係曾經離我而去嘅人。






每一日我都要喺太古度過，而每一次經過樓下公園，都提醒緊我同你嘅相遇、經歷同道別。

我遏制唔到自己嘅思緒。


有時半夜扎醒，發現啱啱夢到嘅你都只係幻像。

我開始唔敢再入睡，因為我唔想再面對由天堂跌落地獄嘅反差。






點解你要咁殘忍，留我自己一個喺度掛住你？


我唔想再留喺度喇。

今次到我任性一次。