惡靈指數100%: 古怪嘅細路女
「呃咳咳......呃......」
「嗯哈哈哈哈......」
一見到糖，就抅起細路女唔太好嘅回憶。腦海回響住自己嘅乾嘔聲，同記憶中某個男人嘅取笑聲重疊。
拆開糖紙，裡面彩色嘅糖好靚好吸引，散發出陣陣香甜嘅氣味。糖中間嘅色彩好似識流動一樣，隱約變換住唔同嘅顏色。
細路女因為緊張，手指微微用力，唔小心喺糖嘅外殼整出一個小缺口。佢望入去，發現糖裡面有一條黑色小蟲將頭微微露出嚟。
細路女嚇咗一跳，佢驚恐咁將糖掉落地下。黑色嘅小蟲卡喺缺口出唔到嚟，帶住沉重嘅外殼喺地下慢慢蠕動。
「粒糖有咩問題？快啲食啊。」男人滿臉笑容，扮到完全唔知情咁。
呢個男人係媽媽嘅男朋友，媽媽好愛好愛佢。就算自己被打、經常被眼前嘅男人整蠱，媽媽都只係默默咁注視，甚至轉身離開。因為媽媽嘅默許，令細路女一向唔敢拒絕男人嘅要求。
喺男人嘅目光注視下，細路女用微微抖震嘅手，將地下嘅糖執返起嚟，放入口......
甜美嘅糖，其實糖衣毒藥。亮麗嘅外殼低下，其實包住一條活生生而且醜陋嘅黑色小蟲。
明明想直接吞咗粒糖，但黑色小蟲喺幾番掙扎之後，終於喺小缺口爬出嚟，重獲自由。感覺到小蟲喺自己嘴裡面不停蠕動，細路女只係想作嘔。
「唔好浪費啊......」男人注意到細路女想將蟲嘔返出嚟，佢瞬間收起笑容，用威脅嘅語氣對細路女講。
「嗯......」細路女驚恐咁應咗一聲，就努力想將小蟲吞落肚。
小蟲嘅求生意欲好強，不停咁想向外邊爬。細路女盡量避開唔敢咬條蟲，足足吞咗好幾啖口水先成功將蟲吞落肚。
事後細路女始終都係忍唔住生理反應，不停乾嘔。
「嗯哈哈哈哈......」耳邊只有男人惡作劇成功嘅取笑聲。
靈媒先生同其他大人一樣，用懷疑嘅目光望住細路女，開聲打斷佢嘅思緒：「當然唔會，啲糖我今日先買......」
細路女注意到之後，心跳漏咗一拍，忍住嘔心嘅感覺，將糖快速放入口，想即刻吞落肚。無奈佢喉嚨實在太細，卡住咗，令佢差啲呼吸唔到：「咳咳咳......」
「你唔鍾意嘅話可以唔洗迫自己食啊......」靈媒先生緊張咁幫佢拍一拍後背，方便佢將粒糖咳返出嚟。
「好食......」普通嘅糖，令細路女覺得好驚豔。
靈媒先生開始意識到細路女嘅家庭背景好複雜，細路女嘅價值觀嚴重扭曲，動靜都過分嘅小心翼翼。除咗外表之外，其他地方都完全唔似一個五歲嘅細路。
靈媒先生沉思咗一陣，對佢講：「我唔會將你除靈，返去啦。」
細路女唔死心咁問：「咁請你做我師傅，教我用靈能力。」
佢覺得只要能自己夠學識用靈能力，就可以自己幫自己除靈。
靈媒先生拍一拍佢嘅頭，再補充一句：「我唔會教你，無論任何嘅能力就好，只可以用嚟幫人，絕對唔可以用嚟傷害人或者自己嘅心。」
細路女聽到之後，失望咁低下頭。
「但有其他問題嘅話，都可以上嚟搵我嘅。」靈媒先生喺西裝袋度拎出一張卡片，遞俾細路女，然後自豪咁對佢講：「我係除靈界嘅新星，易玄光。好好記住，多啲向同學宣傳吓啊。」
「真係？我仲可以再上嚟？」細路女若寵受驚咁抬起頭望住易玄光。
「嗯！你聽日再過嚟啦！」易玄光覺得自己反正都冇咩生意做，都唔介意得閒幫吓個細路女糾正返個思維。
細路女接過卡片之後，慎重咁袋好，然後重新抱起自己裝烏龜嘅寵物箱。烏龜好迷你，長度應該只有一個十蚊嘅大小，嬌小可愛。
由細路女嘅動作可以睇得出，佢將烏龜仔當朋友同家人一樣珍惜。間中會同烏龜仔傾偈，但其實純粹係佢自己自言自語。
聽到佢無厘頭嘅自言自語，易玄光都只係得啖笑，呢個都算係細路女佢唯一可愛同似返五歲嘅地方。
細路女不時偷瞄眼前嘅大哥哥，覺得佢同自己認知中嘅大人好唔同，令佢忍唔住親近同信任對方。佢猶豫咗一陣，決定大膽開口問：「既然我以後仲會嚟，咁可唔可以俾青青暫時住喺你度啊？」
「隻烏龜叫青青？」易玄光伸過頭過去，好奇咁望一望烏龜仔。
「係，媽媽話青青太臭，叫我掉咗佢。但係......」細路女平時最聽媽媽嘅說話，無論媽媽提出咩要求都會照做。但今次佢緊緊抱住寵物箱，好明顯係唔舍得。
除咗剛才一剎那嘅瘋狂，眼前嘅細路女每個動作都小心翼翼，乖巧到令人心痛。難得佢能夠露出期盼同信任嘅眼神，令人唔忍心去拒絕。
「可以，但我只係俾個位佢住，唔會理佢，你要自己負責照顧佢啊。」易玄光一時心軟，就應承咗。
「嗯！約定啦！」細路女好驚喜，心情好咁跳住離開。
結果等咗幾個月，細路女都冇再出現過......
易玄光一回過神，即刻拉細路女去安全地方：「小妹妹你行遠啲，我要救其他哥哥姐姐先。」
易玄光掂到細路女隻手嘅時候，被佢身上嘅溫度嚇一嚇：「你點解凍到好似冰咁？乖乖地等我。」
細路女收起笑容，呆呆咁睇住易玄光將車裡面嘅人一個個咁搬到佢旁邊。佢疑惑咁問：「點解要救佢哋？」
明明佢哋班人尖酸刻薄，都唔係咩好人......
「哈哈哈......幾個月冇見，你依然都係咁古怪。因為佢哋係我嘅客人啊，出咗咩事我負擔唔起。」易玄光無奈咁笑。
「我唔明......」單純嘅細路女始終都諗唔明，唔俾錢嘅點解都算係客人。
喺易玄光打電話叫救護車期間，細路女負責睇住昏迷嘅四個人。
其中一個受輕傷嘅女仔終於清醒過嚟，困惑咁望一望四圍嘅環境。當見到細路女之後，一臉驚恐咁用雙手支撐起身體，不停後退。
「救命啊......係你......你係佢！」佢用抖震嘅手指細路女，有啲語無倫次。
見到佢狼狽可笑嘅樣，細路女忍唔住咧嘴偷笑，然後行埋去，細聲喺佢耳邊講：「姐姐，你唔係特登嚟搵我咩？你醒咗，而家我哋可以一齊玩，開唔開心？」
「啊！！！」
突然聽到有女性刺耳嘅尖叫聲，只係喺附近打電話嘅易玄光即刻趕返過去。
原本昏迷嘅四個年輕人都唔見咗，現場得返細路女一個。
寒風輕輕吹過，吹過樹葉，發出「沙啦沙啦」嘅聲。細路女踎喺地下，專心咁研究飄到佢腳邊嘅落葉。
易玄光覺得好詭異，正常如果嗰幾個年輕人醒返，離開嘅時候，佢都應該會發現。
「佢哋去咗邊？」
「去咗尋寶......我話咗俾佢哋知，收埋寶藏嘅地方。」細路女一邊用輕快嘅語氣天真咁講，一邊玩地下嘅落葉。
寶藏？
易玄光覺得好頭痛，完全理解唔到嗰班十幾二十歲青少年嘅思想。
「咁你呢？你住喺邊？我送你返屋企。」易玄光雖然好攰，但始終唔放心細路女一個人。
「你可以送我返屋企？」細路女呆咗一吓，終於抬起頭，認真咁問佢。
「當然，都唔知你屋企啲大人諗咩，咁夜仲俾你一個細路出街。」易玄光抬頭望一望天色，而家已經係凌晨。
「約定啦......」
一陣風吹過，吹起易玄光凌亂嘅短髮，細路女輕輕喺佢耳邊留低一句說話。
易玄光即刻回頭，但已經唔見細路女嘅身影。細路女剛才企嘅地方，只係剩低幾片樹葉，被風吹起，喺空中飛舞。
「我哋仲會再見......」
細路女嘅聲音，再次喺易玄光耳邊響起。但太過於虛無縹緲，好似風咁，吹過就即刻消散。所有都好似幻覺一樣，好冇真實感。
第二日起身，易玄光只係覺得身體異常嘅沉重，好攰。瞓過頭嘅佢，食埋早餐先慢吞吞咁行返公司。
同平常唔一樣，佢喺遠處已經見到有客人企喺佢公司門口等佢。見到佢返嚟，都心急咁衝上去迎接佢。
見到其中一個男仔拎住攝錄機，易玄光有種不祥嘅預感，以為佢哋真係打算將自己放上網，話佢扮靈媒呃人。
「易師傅終於返嚟啦！」
「救吓我哋啊！」
「幾多錢我哋都會俾㗎！」
佢哋一臉恐懼，捉住易玄光求救。你一言我一語咁同時一齊講嘢，聽到人頭痛。
「停停停！一個一個講，到底發生咩事啊？你哋琴晚靈探完，唔係仲好地地咁走去尋寶咩？」易玄光面對呢啲屎忽痕又鍾意一齊圍威喂嘅年輕人，心裡面只有唔耐煩。
「尋寶？邊個同你講㗎......」
幾個年輕人聽到之後，臉色瞬間變得蒼白。只感覺背後有一陣寒意，不自覺咁退後，遠離易玄光。
「啊！！！」
琴晚車禍後，第一個清醒嘅女仔突然驚恐咁抱住頭尖叫，好似精神失常咁。
「係佢！一定係佢啊！係迷路......唔唔......」
女仔未講完，拎住攝錄機嘅男仔突然伸出手，迅速咁掩蓋住女仔嘅嘴，阻止女仔將之後嘅說話講出嚟。
女仔不停掙扎，拍打佢嘅手，但佢反而更加用力。佢全程低下頭望住地下，身體忍唔住抖震，唔敢抬頭望向易玄光嘅方向。
佢偷瞄自己攝錄機嘅螢幕，正在錄影嘅畫面裡面，出現紅色嘅裙角......
迷路女童而家轉化為惡靈嘅指數係81%......