「遙遙......」擔心咗幾個月嘅路小姐終於聽到姨甥女把聲,佢嘅淚水忍唔住流出嚟。

「等等!同你玩嗰個姐姐係小黑姐姐?」原本溫馨嘅一刻瞬間被阿時打破,佢用力捉住遙遙嘅膊頭,緊張噉問。

「係啊......」遙遙有啲被佢嚇到。

「你冇講大話?噉佢而家仲喺度?」阿時即刻追問,抱起搖搖,準備一有發現唔妥就逃跑。

「唔見咗喇......」遙遙回望自己剛才踎低嘅位置,尋找小黑姐姐嘅身影。當搵到之後,就用手指指向某個方向:「啊!見到喇,喺嗰邊!」





一抹血紅色喺嗰個位置一閃而過,快到阿時根本睇唔清楚。

「點算好啊......」阿時抱緊遙遙,用聲音抖震講。

「你就係路千遙?」電話裡面嘅孫師傅問,阿時靠近電話一齊聽。

「嗯......」遙遙不安噉望一望阿時,見佢點點頭先回答。

「你想唔想救返迷路女童?」孫師傅直接問。





「想!」遙遙諗都唔洗諗。

「OK,只要你聽話,我哋就會幫你救迷路女童,做唔做到?」孫師傅滿意噉再問,語氣好似哄騙細路女一樣。

「做到。」遙遙堅定噉答。

「好,真乖女。」孫師傅讚賞佢一吓,然後再對阿時講:「易琛時,你喺嗰個空間唯一可以相信嘅,只有路千遙。佢可以喺嗰度生存幾個月,相信都並唔簡單,會知道少少嘢。我哋會喺外面幫你哋諗辦法,你哋都要努力堅持到最後。」

得到鼓勵嘅阿時,總算有搵到些少嘅方向,唔再迷惘。





「哥哥,小黑姐姐走咗喇,快啲跟上去。」遙遙心急噉拉住阿時嘅手臂,希望可以追上剛才一閃而過嘅血紅色。

「點解?」阿時好唔情願,佢唔明點解明知道對方會殺自己,遙遙都要跟上去。

「因為小黑姐姐會帶我哋返去啊。」遙遙呢句說話其實之前已經重複咗幾次。

易琛時,你喺嗰係空間唯一可以相信嘅,只有路千遙......

阿時覺得雙腳好沉重,佢想向遙遙指嘅反方向逃跑,但腦海不斷重複住孫師傅嘅說話。佢並唔係唔相信遙遙嘅說話,只係唔敢去信。佢實在太怕迷路女童,亦唔信對方會幫佢哋。

「啊!」阿時突然大叫,聲音喺空曠嘅影廳迴響,佢煩躁噉摷亂自己嘅頭髮。遙遙被佢嘅動作嚇親,都唔敢再用力拉佢。

「遙!快啲帶住我追上去!」阿時總算下定決心,要離開就要博一博。

遙遙拖住阿時跑出戲院,然後四圍張望同尋找。





「搵到喇!係小黑姐姐!」遙遙用手指指住。

阿時順住佢指嘅方向望,只見到遠處有一對血紅色嘅大眼,定定噉望住佢哋。嗰隻眼喺黑暗嘅背景襯托下,格外明亮。阿時心驚之餘,總覺得嗰雙血紅色嘅眼,有種熟悉嘅感覺。

未等阿時思考完而家嘅情況,雙眼嘅主人已經轉身離開。敏捷嘅動作同嬌小嘅身影,並唔似人類所擁有。

阿時睇唔清楚佢嘅真身,同遙遙一齊跑電梯追上去,上到二樓,商場嘅最頂層。

「哇!」

一上到去,就見到兩架小朋友玩嘅搖搖車仔,放正喺電梯口,阻擋住佢哋嘅路。一架係警車公仔,另一架就係漢堡包。佢哋都係笑容可掬嘅表情,搭配四圍陰森嘅環境,令人覺得好唔舒服。

阿時拖住遙遙,小心翼翼噉想喺旁邊攝過。無論行左邊定行右邊,兩架車都識自己去移動,阻礙佢哋。





「可惡......你哋到底想點啊?」阿時好煩躁,用力踢咗其中一部機兩吓,但佢哋依然唔讓路。

「遙,我哋由另一邊上去喇。」阿時無奈噉轉身同遙遙落返去,想由商場另一邊嘅電梯上去。

「喵......」

行到一半,佢哋突然聽到上層傳嚟熟悉嘅貓叫聲。抬起頭,發現一隻黑貓跳到警車嘅頭上面。

黑貓條頸綁住紅色嘅蝴蝶結,用血紅色嘅貓眼盯住阿時同遙遙,畀人感覺高高在上。呢隻黑貓阿時認得,正正就係帶佢嚟呢個異空間嗰隻。

「係小黑姐姐!」遙遙興奮噉望住黑貓。

「小黑姐姐......係貓?」阿時聽到之後,覺得好不可思議。

呢隻黑貓係小黑姐姐,而追殺佢哋嘅迷路女童又係叫小黑姐姐,阿時覺得自己被遙遙搞到好混亂。佢突然靈光一閃,有一個大膽嘅猜測。





唔通呢隻黑貓,就係迷路女童嘅真身?只要捉到佢,就可以搵到離開嘅方法?

黑貓已經喺警車上面跳返落嚟,企喺玻璃嘅旁邊,定定噉望住佢哋,好似喺度等佢哋過去。

阿時先協助遙遙爬過警車,然後先到佢自己爬。

「呃!」阿時突然感覺肚嘅位置被狠狠撞擊,佢痛苦噉叫咗一聲。當佢回過神,佢已經被飛機車撞飛喺半空。

「砰!」

沉重嘅警車自己都喺半空掉返落嚟,電梯因為受到重擊而斷開。 殘肢連埋警車一齊跌落地下嗰層,發出好大嘅聲響。

「啊......」而阿時就被撞飛,跌落一樓。佢瞓喺地下,痛苦噉抱住肚嘅位置。





「哥哥!」遙遙好擔心,衝到邊緣嘅位置。

「唔好過嚟!」阿時即刻忍住痛爬起身,大聲喝止住遙遙。佢怕遙遙再行前一步,就會好似警車一樣跌落地下嗰層,粉身碎骨。

「哥哥......」遙遙企喺邊緣,唔肯離開半步。

「哥哥冇事。遙遙乖,呢度危險,行返後少少。」阿時抬起頭,努力擺出一個令人安心嘅笑容安慰遙遙。見遙遙行到旁邊較為安全嘅位置,佢都總算鬆一口氣。

而家電梯已經斷開,阿時一定要行商場另一邊或者用其他方式先上到二樓。

睇怕暫時要同遙遙分開行......

阿時並唔放心留底遙遙一個人喺度,附近太唔安全喇。而遙遙旁邊仲有黑貓同漢堡包車,雖然暫時都冇太大嘅動靜,但隨時都會攻擊遙遙。

如果自己唔快啲同遙遙會合,又怕拎住刀嘅迷路女童趕到嚟。剛才發生噉大聲響,恐怕迷路女童已經發現。

「遙遙,你喺度等我,哥哥好快就上嚟接你!」無辦法之下,阿時唯有選擇先分開一陣。

遙遙目送阿時離開之後,不安噉抱住黑貓,踎喺角落等阿時接佢。

阿時跑到遙遙睇唔到嘅位置,終於忍唔到痛,跪喺地下。額頭不停冒出冷汗,連呼吸都變得辛苦。佢揭開衫一睇,發現肚嘅位置已經有一個又大又明顯嘅瘀青。

「琛時......搵到你喇......」未等阿時回復狀態,一把熟悉又恐怖嘅聲音,再次出現。

阿時抬起頭,果然見到遠處有一抹紅色嘅身影。

迷路女童拎住刀,一步一步接近阿時,威脅噉問:「你收埋遙遙喺邊?」

「可惡啊......偏偏喺呢個時候......」阿時勉強企喺身逃跑,但受傷嘅佢好快就被追上。

迷路女童撲向阿時,騎喺佢身上。將手上嘅刀舉起,向佢嘅心臟狠狠落刀,阿時下意識用手去擋。

「噹!」

「啊!」

手腕上一直戴住嘅玉鈪咁啱阻擋咗迷路女童嘅攻擊,裂開兩邊,碎片整到迷路女童嘅雙眼。佢痛苦噉緊閉雙眼,鬆開阿時。

阿時趁住迷路女童幾秒嘅停滯,即刻拎返起裂開嘅玉鈪,逃跑去隔離嘅店舖匿埋。

阿時匿好之後,一轉過頭就見到一個成身血嘅男人坐喺自己隔離,佢忍唔住低聲驚叫一聲:「哇!」

男人緩緩轉過頭望住佢,阿時一眼就認出佢係就剛才電影裡面嘅主角,Hiro。阿時驚恐噉爬到角落,縮起自己嘅身體。

「輸咗喇?」Hiro神情呆滯噉問。

「輸咗?輸咗咩?」阿時感覺到Hiro似乎唔會傷害自己,強忍住心裡面嘅恐懼,聲音抖震噉問。

「你被迷路女童捉到,就已經輸咗。只有死咗先見到我,我哋以後會一齊困喺呢個空間,做個朋友?」Hiro向阿時伸出自己血淋淋嘅友誼之手。

「我的確係被迷路女童捉到,但我成功走甩,仲未死!我一定要出返去現實世界!」阿時避開佢隻手,激動噉反駁。

「其實喺戲院裡面,我一直坐喺你哋前面,但你似乎一啲感覺都冇。」Hiro並冇介意阿時嘅唔禮貌,語氣平靜噉講。

佢講完之後,阿時瞬間覺得好心寒,打咗個冷震。

「我都唔知點解突然睇到,但我真係未死......」阿時抱住頭,連自己都開始唔確定,腦海一片混亂。

「你睇落仲咁細個,係幾可惜嘅......」Hiro安慰阿時。

雙方沉默咗幾分鐘,阿時突然開口問:「要點先可以贏啊?」

「你已經輸咗喇,同我一樣。」Hiro以為阿時接受唔到事實,想自欺欺人。所以佢再重複一次,希望點醒阿時。

「我未輸,要點先可以贏到迷路女童?」阿時固執噉問。

「唉......」Hiro無奈噉嘆咗一口氣:「剛才你喺戲院應該都睇到,我玩一個人捉迷藏玩出禍。」

「嗯......」阿時吞一吞口水。

「要贏其實好簡單。口要含住鹽水,搵出迷路女童嘅真身,噴向佢。然後講三次係我贏咗,遊戲就會完結。」Hiro簡單噉向阿時解釋一個人捉迷藏嘅規矩。