「唔好啊!」迷路女童發出刺耳嘅尖叫聲。

「噗......」Hiro將口裡面嘅鹽水用力噴向手上嘅公仔。

鹽水浸濕咗公仔之後,迷路女童已經冇力再去反抗,眼神呆滯。

「係我贏咗,係我贏咗,係我贏咗......哈哈哈......我終於都贏咗喇。」Hiro終於都露出笑容。佢接觸到鹽水嘅地方都好似嚴重燒傷一樣,冒起大量水泡,睇起嚟好恐怖。

「Hiro......」阿時好擔心眼前嘅新朋友。





「快啲返去喇,我仲要做最後嘅儀式。」Hiro催促佢哋離開。

異空間因為失去咗迷路女童嘅靈力支撐開始崩潰,發生猛烈嘅地震。阿時感激噉點點頭,雙手忍痛撐起自己嘅身體,拖住遙遙向出口跑。

玻璃門依然鎖住,推唔開。眼見地震越嚟越強烈,阿時內心都好急躁。

「喵~」

突然聽到熟悉嘅貓叫聲,轉身一睇,果然見到一隻綁住紅色蝴蝶結嘅黑貓。





阿時已經知道呢隻黑貓係迷路女童嘅化身,所以警惕噉睥實佢。用保護者嘅姿態,將遙遙拉到自己身後。

黑貓輕輕推一推其中一道比較鬆動嘅玻璃門,阿時鼓起勇氣接近黑貓,順利推開嗰道沉重嘅門。

一出到商場,地震已經完全消失咗,感覺只有商場裡面先有地震。走出呢個危險嘅地方,總算鬆咗一口氣。

「小黑姐姐,快啲過嚟。」遙遙伸出手,想抱埋黑貓出去呢個就快倒塌嘅商場。

「喵~」





黑貓閃身避開,並冇跟佢哋離開。只係輕叫一聲,好似向佢哋講再見,然後轉身慢慢行返入商場嘅深處。

「小黑姐姐!」遙遙並唔想放棄。但阿時唔理佢嘅反抗,抱起佢,快速逃離現場。

阿時帶住遙遙返到噴水池附近,件衫嘅膊頭位置未落水,都已經被遙遙嘅眼淚浸濕。

「哇啊!」

面對遙遙嘅失控大喊,阿時揦手唔成勢噉幫佢抹眼淚。見佢喊得咁犀利,都有啲心噏。

「只要緣分未盡,就仲有機會再見。」阿時輕聲安慰佢。

「真......真嘅?」遙遙可憐噉問。

「真,哥哥唔會呃你。」阿時堅定噉點頭。





阿時小心翼翼噉抱起遙遙,走入噴水池,搵到離開異空間嘅門。打開次後,門後白色嘅強光照到佢哋擘唔開對眼,失去意識。

「阿時......阿時......」

隱約聽到有人一邊叫自己嘅名,一邊拍打佢嘅臉頰。阿時擘大眼,就見到叔叔易玄光,仲有一對男女喺自己旁邊,擔心噉望住自己。

「嘶......好痛,發生咩事啊?」阿時唔小心郁到自己手臂嘅傷口,只覺得成身都好攰同好痛。

佢奇怪地發現自己身上出現大大少少嘅傷勢,而且一隻手緊緊拖住一個細路女嘅手,細路女安靜噉瞓喺佢隔離。佢哋兩個都好似啱啱游完水,成身濕曬。

「佢係邊個?呢度邊度嚟?」阿時好奇問易玄光。

「你完全唔記得?」易玄光懷疑噉問。





「吓?」阿時而家覺得自己成舊雲噉,一頭霧水。

「送咗佢哋去醫院先喇。」路小姐心急噉抱起遙遙,都唔介意遙遙身上嘅水整濕自己件衫,而遙遙嘅媽媽只係喺遠處呆滯噉望住佢哋。

遙遙足足瞓咗一日,清醒之後,一擘大眼就見到眼前雪白一片。佢安靜噉望住天花板發咗好耐吽哣,直到路小姐發現佢已經醒咗。

「遙遙,有冇咩唔舒服啊?同姨姨講啊。」路小姐溫柔噉撫摸遙遙嘅額頭。

遙遙眼神好迷惘,路小姐再問佢好幾個問題,都完全冇反應。路小姐覺得唔對路,所以打電話搵埋易玄光佢哋過嚟。

易玄光嚟到之後,同遙遙打招呼:「遙遙,你記唔記得我?」

遙遙擰頭。

「噉隔離呢個姐姐呢?」易玄光問。





遙遙依然擰頭。

「噉記唔記得自己叫咩名啊?」易玄光繼續追問。

「我叫遙遙?」遙遙唔肯定噉答。

易玄光皺起眉頭,然後拉路小姐埋一邊,對佢講:「我剛才問過我侄仔有關佢哋喺異空間發生嘅事,佢都完全唔記得。」

「但遙遙連我都唔記得!」路小姐個心而家好亂。

「你冷靜啲先,我哋再問吓佢喇......」易玄光拍拍佢嘅膊頭,安慰佢。

面對大人一連串嘅問題,遙遙都答唔記得。佢只感覺自己好似發咗個好長好沈重嘅夢,呢個夢帶畀佢嘅感受好複雜,但一瞓醒又唔太記得夢嘅內容。





喺夢裡面有一個著住飄逸紅裙嘅姐姐同遙遙講咗好多嘢,詳細內容已經唔記得。但夢裡面嘅溫馨氣氛,令佢好深刻。感覺呢位姐姐好錫同好珍惜自己,所以佢更加沉迷,唔想忘記。

遙遙努力想去回想,只記起零星嘅畫面。姐姐畀咗份禮物佢,叫遙遙以後用自己嘅力量去保護自己,唔好再受傷。然後喺佢耳邊講再見,就留遙遙一個喺原地,轉身離開。任由佢點去叫喊,都冇再回頭。

到底呢份禮物裡面係咩嚟?冇人知道。

遙遙有試過同易玄光佢哋提起呢個夢,佢哋都認為佢夢裡面嘅姐姐就係迷路女童。而遙遙嘅失憶,就係迷路女童送畀佢嘅禮物。目的係唔想遙遙有任何痛苦嘅回憶,所以佢哋再觀察遙遙一段時間,肯定冇唔妥,都冇謂再深究同迫佢記起。

遙遙嘅媽媽同佢男朋友被控告虐兒,而遙遙就交由公公婆婆一家去照顧。

忘記一段痛苦嘅回憶,重新開始,對遙遙嚟講係一件好事。不過遙遙間中諗起呢個夢,總覺得好心噏,好似忘記咗唔少重要嘅人同事。

所有嘅事,就只係一場夢,遙遙好快就會唔記得。同迷路女童呢個都市傳說一樣,隨住時間,會慢慢被人遺忘。冇人再提起......