自從上左大學，我開始會去唔同嘅平行世界（粵文故事）: 表世界2020年9月14日

表世界2020年9月14日

嚟到咗台灣已經一段時間啦，宿舍都住得慣嘅。

你話我點解嚟咗台灣？

因為我嚟咗台灣讀書囉！讀嘅係某間台灣知名國立大學嘅中文系⋯⋯

但實際咁講返一句，我都係隨便搵個比較有興趣嘅台灣嘅大學學士學位收我姐。





對前途一無所知嘅我基本上覺得佢肯收我就入㗎啦，根本冇考慮過嗰一科嘅工作前景係點樣。

晏晝起身嘅時候宿舍裏面嘅房間剩低我，

雖然本身係有另外三個嘅室友，但始終學期開頭都唔係好熟所以大家冇咩交集，大家各自咁樣返學。

而我今日嘅堂好似係晏晝四點，講關於一啲啲中國現代戲劇嘅嘢，因為覺得幾得意所以就揀課嘅時候就揀咗呢一個。

梳洗完、整理好書枱、將琴日嘅衫從廁所嘅晾衫架攞返落嚟擺喺衣櫃⋯⋯呢啲都係我打算之後日常做嘅嘢





整理好晒所有嘢之後執埋書包就準備出門口去食午餐啦。

從大學嘅宿舍要去到學校嘅大門係由山頂行去山腳，所以我都預留左少少時間，大概20分鐘嘅路程。

有啲人話我呢邊係美食嘅沙漠，但我就認為因為始終我嚟咗唔係好耐，所以都唔係認識好多餐廳⋯⋯

最後就揀咗一間香港都有嘅連鎖舖頭食咗個飯。

食完個飯仲有充足嘅時間，我本身以為要上堂之前一粒鐘去到課室，點知⋯⋯





去到嘅時候前一堂嘅老師仲未落堂，當然啦因為上一堂仲未落堂，結果我就喺門口嗰度等咗成一粒鐘。

無聊睇吓手機，睇吓IG。

仲有Call一call直屬嘅師姐同埋同學過嚟上堂先（因為太無聊啦）。

上堂前10分鐘，我都終於見到我嘅直屬師姐，同佢傾咗一陣最近嘅入學事情同要注意嘅嘢，直到4:10嘅鐘聲響起。

結果等多咗10分鐘⋯⋯

老師人呢？

結果老師都遲咗一段時間先入嚟⋯⋯

好彩呢一堂老師都講咗好多唔同課堂嘅入門問題，我都唔係覺得好無聊而且都覺得好有趣。





到咗課堂嘅尾聲，或者話過咗一粒半鐘左右，老師仲要提早落堂。

雖然係幾好嘅，但係意猶未盡，不過都只好等下個星期一正式上堂（因為學校仲有加簽嘅情況，所以仲未算係正式上堂）。

探索下附近嘅餐廳，食咗一餐豐富嘅晚餐之後九點幾就上返左山嘅宿舍。

梳洗、整理今日嘅筆記、預備今日冇帶到嘅文具⋯⋯

最後今日就結束啦⋯⋯