全實景系列《香檳大厦 1:55 am 行人止步》重製版 (已完結): 第五章：【好奇害死貓】

21:30 – 香檳大廈B座八樓

Fiona一邊將間房執拾乾淨，一邊等客人嚟撳鐘。佢望一望個鐘：「仲有三個鐘先收工…」

平時喺等客期間，Fiona無乜嘢做時都係玩下手機、睇下電視。如果唔好彩嗰日全日都無客嘅話，其實真係會等到「發霉」。
 
一樓一嘅行業好被動，亦都好波動。月頭啲男人出糧、心癢癢可能會多啲上嚟幫襯；賽馬日又會多咗男人去刨下馬仔，反而少咗人上嚟一樓一玩；月尾份糧用得七七八八，手緊之下啲男人可能淨係想做下手作仔(斜骨/打飛機)而唔想開大(做愛)，搵錢自然又少啲。不過以上呢啲波動對於姐姐仔嘅生意影響都唔係最大關鍵，如果你樣靚身材正，所有波動通通都唔係問題。
 




正所謂：「你的身材如何，你的生意也必如何。」呢句嘢喺一樓一界別仍然通行。
 
Fiona開始覺得有啲悶，明明上個鐘仲有部LED電視機仔可以睇下，雖然條天線收得唔係幾好，睇上去有好多雪花，但係畫面唔清，都仲可以有啲聲聽下會無咁悶。

「而家少咗部電視機，連個閉路電視都無埋，仲可以做啲乜嘢好？」Fiona望住嗰部跌咗落地下嘅電視機，心諗：「既然無嘢做，就唯有執下啲安全套同潤滑劑，睇下有乜嘢唔齊可以擺返啲出嚟都好。」
 
Fiona喺床下底拉出一個紙盒，裡面放滿三包一百個裝嘅安全套。佢拆開一其中袋，用手抽起一疊放入去床頭個籐籃裡面。

Fiona停咗一停，又再望下地下部LED電視機。計埋今次，佢已經係第六次望住部跌壞咗嘅電視。
 




「點解阿Ken會推跌部電視？」Fiona諗唔明：「好地地睇錄影片段，只係需要撳部機嘅掣啫，無需要突然推跌部電視掛？」

佢亦唔知道點解阿Ken個樣好似好驚青咁，又標晒汗又口震震咁，就算見到鬼都唔駛咁驚吧。

「咪住……見鬼？」Fiona打咗個突。

「唔通真係見鬼？」Fiona靈光一閃，閃出呢個字，然後心底隨即湧起一股寒意。

恐怖，其實係一個好神奇嘅概念，就好似你一個人喺屋企，所有燈突然間熄晒，第一時間會諗係咪跳掣？燒Fuse？但當同時聽到或者睇到其他嘢，例如係一塊鏡或者樓上跌嘢聲，腦海中略過一啲同「恐怖」相關嘅念頭，咁樣當燈熄滅嗰一刻，腦海就已經唔單止係諗到跳掣咁簡單。





諗到呢度，Fiona企起身，望到床頭塊全身鏡時，佢被鏡入面嘅自己嚇咗一跳。

Fiona絕對唔係一個大膽嘅女仔，雖然佢都知道呢啲只係一個可能情況。

「應該唔係嘅……」佢唯有安慰自己。

不過阿Ken嘅反應實在令佢覺得好好奇，佢想知道阿Ken究竟睇到啲乜嘢。

正所謂：「好奇害死貓。」

人好奇起上嚟，心癢癢嘅感覺真係幾難頂。講到底，要借閉路電視睇嘅人係阿Ken，睇完乜都唔講嘅人又係阿Ken，宜家仲要犧牲埋部電視機。雖然間房係租嘅，傢俬電器都係包租公承包，但都要賠償嘅。

Fiona決定搞清楚做咩事。佢攞起部電話，的起個心肝「姑持」手袋，就走過對面房搵Yolanda。

Yolanda同Fiona一樣，都有一套閉路電視系統。





喺八樓嘅姐姐仔房之中，就只有Fiona同Yolanda兩個有一整套閉路電視系統。雖然Yolanda嘅鏡頭未必完全影晒Fiona想睇嘅範圍，不過香檳大廈走廊唔太闊，無影到十足都有九成。

一行出房門口，成個八樓都聽到一陣陣誇張嘅叫床聲，吸引咗部份男人駐足欣賞。Fiona隔離條短走廊嘅姐姐仔係來自北方嘅佳麗，成日都會用呢一招去吸引客人注意，而佢往往聽到都會嗤之以鼻。

「阿倩、阿倩，開門呀！」Fiona拍Yolanda房門，門上掛咗「請按鐘」嘅牌，代表Yolanda無客。

不論係Fiona，定係Yolanda，呢啲通通都唔會係姐姐仔嘅真名。就算個名用咗好耐，當下次去到富士或皇冠嘅新場開工，佢哋都可以改名做Toyota或者Honda，改名呢啲嘢真係可以好隨心。

只有姊妹之間，先會用真名交流，而且只限於真正嘅好姊妹。Fiona同Yolanda，係香檳走淨嘅最後兩個本地姐姐仔，情同姊妹。

Fiona一邊拍門，一邊望住自己間房嗰道輕輕掩埋咗嘅門。上次門鎖壞咗，開咗足足大半日先開到，所以佢叫包租公整兩隻耳仔，可以外加個鎖頭嚟鎖門。何況，佢只係過去Yolanda嗰邊一陣，仲要係打開門，隨時都可以睇到對面情況。

Yolanda打開房門，身穿一套粉色性感透視長裙，Fiona一見，用手摸摸衣服質地就話：「嘩，Satame？靚嘢喎，有無買多件畀我先？」





「買埋你嗰份啦，不過今日無帶返嚟，我聽日攞畀你。」Yolanda懶洋洋地說：
「衰嘢丫，咁捨得駛錢嘅？」Fiona入去Yolanda間房，充滿住香薰精油嘅味道。佢攞起檯上面枝精油睇：「薰衣草味…」當佢睇到個標價時，實在係嚇咗一跳：「嘩？$1,288蚊得12ml咁貴？」
 
「唔貴啦﹗仲有隻貴啲嘅我都無買。呢一隻香薰精油聽人講對皮膚好好㗎﹗駛唔駛幫你買返枝？」Yolanda講得好興奮。
 
「近排好好生意咩？」Fiona好奇一問。
 
「一般般啦，咪又係咁﹗邊有你生意好丫﹗」Yolanda回答，又反問：「你未收工咩？」

「講呢啲丫真係﹗喂，我其實想借你呢邊個cam睇下呀。」Fiona問。

「有咩嘢睇呀？」Yolanda「碌」住自己部電話，行埋床邊坐低：「自己嚟啦，唔好阻住我Shopping﹗」
 
「淘寶？」Fiona問。
 




「我無淘好耐啦，要買嘢梗係去官網訂㗎啦﹗」Yolanda擰轉部電話畀Fiona睇：「Channel玫瑰金限量版手袋，全球只得5000個咋﹗」
 
Fiona伸咗條脷出嚟表示好「乸利」，無再答佢就走去閉路電視機嗰邊，佢一望個螢幕，就見到一個熟悉嘅身影出現喺四格畫面入面。

佢見到一個男人企喺不遠處嘅嗰道爛門前面，郁都唔郁咁望住入面。

因為驚認錯人，Fiona將個頭哄到埋一埋個電視度睇，的確有八成似一個佢識嘅人。
 
「點解佢會一個人喺度嘅？」Fiona心想。
 
Fiona索性挨住道門，伸出上半身去走廊度望過去，除咗即刻有幾個男人望過嚟打量佢一番之外，佢隔住人群都可以肯定嗰個喺一個佢識嘅人，仲好奇怪點解佢會喺呢個時間上嚟。

其實Fiona同呢個人唔係好熟，只係見過幾次，但由於一直有合作關係，所以都有保持住聯絡。幾個月前，呢個人曾經向Fiona提出喺佢嚟M唔方便嘅日子，借出間房，畀佢哋用嚟幫啲上嚟嘅男人做測試。 Fiona最初有猶豫，但見對方成日都有派人上嚟做正經嘢，有時又送啲禮物仔畀佢哋，結果就答應咗呢個請求，每月一日例假免費借畀佢用。

Fiona索性行出廊，走過去同佢講笑：「Hi，黃經理，未見過你會咁夜上嚟㗎喎，係咪收工後想搵下餘興節目呢？」





黃經理似乎聽唔到Fiona嘅聲音，仍然郁都唔郁。

Fiona繼續講落去：「你啲同事今日先嚟過派套咋…」佢拍一拍黃經理手臂。

就係呢一拍，黃經理似乎突然扎醒咗，然後擰轉身。幾乎嚇到Fiona。

黃經理滿頭大汗，成個樣好似攰咁，同幾個月之前精神奕奕嘅佢真係差好遠。

「Na姐。」黃經理望咗佢一陣，魂魄先慢慢返嚟，有氣無力咁問：「你知唔知道……呢道門後面……係乜嘢地方……？」

(待續)